အမေရိကန်အစိုးရရဲ့ သဘောထား အမြင်အာဘော်ကို တင်ပြပါမယ်။
မြန်မာနိုင်ငံမှာ ၂၀၂၁ ခုနှစ် စစ်တပ်က အာဏာသိမ်းပြီးနောက်ပိုင်း ဒီမိုကရေစီ အနာဂတ်ကို လိုလားသူတွေအပေါ် စစ်အစိုးရက ဖိနှိပ်ရက်စက် ကြမ်းကြုတ်မှုတွေ အရှိန်မြှင့် လုပ်ဆောင်လာခဲ့ပါတယ်။ အမျိုးသား၊ အမျိုးသမီးနဲ့ ကလေးသူငယ် ထောင်ပေါင်းများစွာ သေဆုံးခဲ့ရသလို လေကြောင်း တိုက်ခိုက်မှုတွေကြောင့် စာသင်ကျောင်းတွေနဲ့ ဘုရားကျောင်း ဝတ်ပြုရာနေရာတွေ ပျက်စီးခဲ့ရပြီး အရပ်သား ၁.၆ သန်းကျော် အိုးမဲ့အိမ်မဲ့ ဖြစ်ခဲ့ရပါတယ်။
မြန်မာနိုင်ငံမှာ ပိုမို ဆိုးရွားလာနေတဲ့ အခြေအနေက ဆိုးရွားလှတဲ့ လူ့အခွင့်အရေး အကျပ်အတည်းကို ကိုယ်စားပြုပြီး ဒေသတွင်း တည်ငြိမ်ရေးကို ပိုမိုခြိမ်းခြောက်လာနေကြောင်း အရှေ့အာရှနဲ့ ပစိဖိတ်ရေးရာ ဒုတိယ လက်ထောက် နိုင်ငံခြားရေးဝန်ကြီး Melissa Brown က မကြာသေးမီက လွှတ်တော် ထွက်ဆိုချက်မှာ ပြောခဲ့ပါတယ်။
မြန်မာ့ အကျပ်အတည်းကို ဖြေရှင်းနိုင်ဖို့က “မြန်မာစစ်တပ်ကို နောက်ကြောင်းပြန်လှည့်စေဖို့ တွန်းအားပေးရမယ်” လို့ ဒုလက်ထောက် နိုင်ငံခြားရေးဝန်ကြီး Brown က ပြောပါတယ်။
“ပိတ်ဆို့ အရေးယူမှုတွေ လုပ်ဆောင်တာက လူ့အခွင့်အရေးချိုးဖောက်မှုတွေနဲ့ ရက်စက်ကြမ်းကြုတ်မှုတွေ ကျူးလွန်နေတဲ့ စစ်အစိုးရအပေါ် တာဝန်ခံမှု တာဝန်ယူမှုကို မြှင့်တင်ပေးမှာ ဖြစ်သလို သူတို့ရဲ့ အကျိုးစီးပွားတွေကိုလည်း ကြီးကြီးမားမား ထိခိုက်စေမယ့် လက်နက်တခု ဖြစ်ပါတယ်။ အာဏာသိမ်းပြီးကတည်းက စစ်တပ် ဦးဆောင်တဲ့ နိုင်ငံတော်အုပ်ချုပ်ရေးကောင်စီ ခေါင်းဆောင် အမြောက်အမြားကို ပိတ်ဆို့ အရေးယူမှုတွေ ချမှတ်ထားပါတယ်။ စစ်အစိုးရရဲ့ ဖိနှိပ်မှုတွေကို ထောက်ပံ့ပေးတဲ့ အဓိက ဝင်ငွေလမ်းကြောင်းတွေအပေါ် အားစိုက် ပစ်မှတ်ထားပြီး ပြင်းပြင်းထန်ထန် အရေးယူနေပါတယ်။”
“နိုင်ငံပိုင်ဘဏ်တွေကို အရေးယူတာက စစ်အစိုးရရဲ့ နိုင်ငံခြားငွေ သုံးစွဲနိုင်ခွင့်ကို ပြင်းပြင်းထန်ထန် ကန့်သတ်ထားပြီး လက်နက်ဝယ်ယူရာမှာ အသုံးပြုတဲ့ လမ်းကြောင်းကို ဖယ်ရှားလိုက်နိုင်ပါတယ်” လို့ ဒုလက်ထောက် နိုင်ငံခြားရေးဝန်ကြီး Brown က မှတ်ချက်ပြုပါတယ်။
“စစ်အစိုးရက ပြည်သူ လူထုကို အကြမ်းဖက်မှုနဲ့ ဖိနှိပ်မှုတွေ ဆက်လုပ်နေမယ်ဆိုရင် ဒီကဏ္ဍတွေမှာ ပြင်းထန်တဲ့ အရေးယူမှုတွေ အရှိန်မြှင့်လုပ်ဖို့ကျမတို့ ကောင်းကောင်း ပြင်ဆင်ထားပြီး ဖြစ်ပါတယ်။ တိုက်ခိုက်မှုတွေနဲ့အကြမ်းဖက်မှုတွေကို ရပ်ကို ရပ်ရပါမယ်။”
ပိတ်ဆို့အရေးယူတွေ ချိတ်ဆက် လုပ်ဆောင်နိုင်ဖို့အတွက်လည်း အမေရိကန်ပြည်ထောင်စုက ဦးဆောင်ပြီး ဗြိတိန်၊ ကနေဒါ၊ သြစတြေးလျနဲ့ ဥရောပသမဂ္ဂ အပါအဝင် မဟာမိတ်တွေ၊ မိတ်ဖက်နိုင်ငံတွေနဲ့ ညှိနှိုင်းဆောင်ရွက်နေပါတယ်။
စီးပွားရေး ဖိအားတွေအပြင် စစ်အစိုးရကို အထီးကျန်စေပြီး နိုင်ငံတကာရဲ့ ယုံကြည်လက်ခံမှု မရစေဖို့ အတွက်လည်း သံတမန်ရေးအရ အရေးယူ ဆောင်ရွက်မှုကလည်း အရေးကြီးကြောင်း ဒုလက်ထောက် နိုင်ငံခြားရေးဝန်ကြီး Brown က ပြောပါတယ်။
“သမ္မတ ဘိုင်ဒန်က မနှစ်က ကမ္ဘောဒီးယားမှာကျင်းပတဲ့ အာဆီယံဆက်စပ် ထိပ်သီးအစည်းအဝေးတွေမှာ မြန်မာနိုင်ငံ ဒီမိုကရေစီအရေးကို အလေးပေး ပြောကြားခဲ့ပါတယ်။ ဒုတိယသမ္မတ Harris ကလည်း အင်ဒိုနီးရှားမှာ အလားတူ လုပ်ဆောင်ခဲ့ပါတယ်။ နိုင်ငံခြားရေးဝန်ကြီး Blinken၊ အတိုင်ပင်ခံ Chollet နဲ့ ကျမတို့ရဲ့ ခေါင်းဆောင်ပိုင်း အားလုံးက အာဆီယံအဖွဲ့ ဥက္ကဋ္ဌလုပ်ခဲ့တဲ့ အင်ဒိုနီးရှားနဲ့အတူ မြန်မာအရေး အလေးပေးပြီး သံခင်းတမန်ခင်းတွေ ဆက်လက်လုပ်ဆောင်နေပါတယ်။”
မြန်မာ့ အကျပ်အတည်း ဖြေရှင်းနိုင်ရေးနဲ့ မြန်မာနိုင်ငံမှာ ဒီမိုကရေစီနဲ့ လူ့အခွင့်အရေးကို လေးစားတဲ့ လမ်းကြောင်းဆီ ပြန်သွားနိုင်ရေး ဆက်လက် တွန်းအားပေးဆောင်ရွက်ဖို့ အမေရိကန်ပြည်ထောင်စုကအလေးအနက် သန္နိဋ္ဌာန်ချထားပါတယ်။
အမေရိကန်အစိုးရရဲ့ သဘောထားအမြင်အာဘော်ကို တင်ပြခဲ့တာ ဖြစ်ပါတယ်။ ဒီတင်ပြချက်တွေဟာ အမေရိကန်အစိုးရရဲ့ သဘောထားအမြင်တွေဖြစ်ပြီး VOA ရဲ့အာဘော်မဟုတ်ကြောင်း သိစေအပ်ပါတယ်။