2020 թվականի օգոստոսին Նավալնիի դեմ իրականացվեց մահափորձ, երբ նա վերադառնում էր Սիբիր կատարած իր ուղևորությունից։ Գերմանիայում բուժում ստանալուց հետո նա վերադարձավ Ռուսաստան, որտեղ ձերբակալվեց, կեղծ մեղադրանքով կանգնեց դատարանի առջև և դատապարտվեց ազատազրկման։ ԱՄՆ-ի կառավարությունը համարում է, որ Ռուսաստանի Անվտանգության դաշնային ծառայության հետախուզական գործակալները թունավորել են Նավալնիին «Նովիչոկ» տեսակի նյարդակաթվածահարիչ նյութով։
Հոկտեմբերի 5-ին Հաագայում 45 պետությունները Ռուսաստանի Դաշնությանը հարցեր են ուղղել մահափորձի վերաբերյալ։ Հարցերի ներկայացումը համընկել է Քիմիական զենքի արգելման կազմակերպության (ՔԶԱԿ) Գործադիր խորհրդի նիստի հետ, որը 41 անդամ երկրներից բաղկացած մարմին է և որի գլխավոր խնդիրն է միջոցներ ձեռնարկել Քիմիական զենքի մասին կոնվենցիայի արդյունավետ իրականացումը և պահպանումը խթանելու համար։ Որպես Քիմիական զենքի մասին կոնվենցիայի մասնակից պետություն՝ Ռուսաստանը պարտավոր է հարցերի պատասխանները տալ 10 օրվա ընթացքում։
«Շատ կարևոր է, որ Ռուսաստանը մանրամասն ներկայացնի իր տարածքում քիմիական զենքի կիրառման հանգամանքների հետաքննության և պարզաբանման համար ձեռնարկված քայլերը», ասվում է 45 երկրների համատեղ հայտարարության մեջ։
ԱՄՆ Պետդեպարտամենտը առանձին հայտարարությամբ նշել է, որ «Միացյալ Նահանգները և միջազգային հանրության բազմաթիվ ներկայացուցիչներ վաղուց հստակություն են ակնկալում 2020 թվականի օգոստոսի 20-ին քիմիական զենքի միջոցով պարոն Նավալնիի դեմ Ռուսաստանի մահափորձի առնչությամբ, ինչպես նաև Ռուսաստանի՝ ՔԶԱԿ-ի հետ համագործակցելու մտադրության վերաբերյալ։ Հատկապես մտահոգիչ է թունավորման շուրջ Ռուսաստանի կողմից թափանցիկության և համագործակցության շարունակական բացակայությունը»։
«Քիմիական զենքի ցանկացած կիրառում անընդունելի է, և ցանկացած ոք, ով օգտագործում է այն, պետք է բացահայտվի և պատասխանատվության ենթարկվի... Նման գործողությունները չեն կարող անպատիժ մնալ», ասված է Պետդեպարտամենտի հայտարարության մեջ։ «Միացյալ Նահանգները կոչ է անում Ռուսաստանին պատասխանել հարցերին՝ իր պարտավորությունների համաձայն, և միջազգային հանրությանը հստակ բացատրություն տալ, թե ինչ քայլեր է ձեռնարել և ձեռնարկում՝ երաշխավորելու համար, որ Ռուսաստանի տարածքից քիմիական զենք այլևս չի կիրառվի»։
Սույն խմբագրականն արտացոլում է Միացյալ Նահանգների կառավարության պաշտոնական դիրքորոշումը։