ဒီဇင်ဘာ ၂၅ ရက်နေ့ဟာ ခရစ်ယာန်ဘာသာဝင်တို့အတွက် အရေးကြီးလှတဲ့ နေ့ထူးနေ့မြတ်တွေထဲက တစ်ခုအပါအဝင်ဖြစ်ပြီး၊ လွန်ခဲ့တဲ့ နှစ်ပေါင်း ၂ ထောင်လောက်မှာ ယေရှုခရစ်တော် ဖွားမြင်ခြင်းအထိမ်းအမှတ်နေ့အဖြစ် ကျင်းပဆင်နွှဲကြတာလည်းဖြစ်ပါတယ်။ ယေရှုခရစ်တော်ကို ပြန်လည်ရှင်သန်ထမြောက်သူ၊ လူသားတို့ရဲ့ ကယ်တင်ရှင်နဲ့ လောကရဲ့ အလင်းတန်းအဖြစ် ခရစ်ယာန်ဘာသာဝင်တို့ကသတ်မှတ် ကြပါတယ်။
ခရစ်တော်ဖွားမြင်တဲ့နေ့ရက်အတိအကျကိုတော့ မသိနိုင်ကြသလို ဒီဇင်ဘာ ၂၅ ရက်နေ့ကို ယေရှုခရစ်တော်ဖွားမြင်တဲ့နေ့ဖြစ်လာရတဲ့ အကြောင်းရင်းလည်း ရှင်းရှင်းလင်းလင်းမရှိပါဘူး။ ဒါပေမယ့်လည်း အဲဒီနေ့ဟာ Winter Solstice ဆိုတဲ့ ဒက္ခိဏယာဉ်စွန်းတန်းလို့ခေါ်တဲ့ တောင်ဘက်အစွန်ဆုံးကို နေမင်းကြီးရောက်တဲ့ ရက်တွေနဲ့လည်း နီးကပ်နေပါတယ်။
ကမ္ဘာတဝန်းက ရှေးခေတ်လူအတော်များများကတော့ ဒီကာလဟာ ဆောင်းရာသီရဲ့ မှိန်ပြပြနေ့အလင်းရောင်တွေကနေ နွေဦးရာသီရဲ့ ရှည်လျားပြီးနေအလင်းရောင်စူးရှတဲ့ နေ့ရက်တွေဆီရောက်တော့မယ့် အလှည့်အပြောင်းကာလနဲ့ သဘာဝတရားကြီးရဲ့ အသစ်တဖန်ပြန်စတဲ့ လက္ခဏာတွေမြင်ရတဲ့ ကာလလည်းဖြစ်ပါတယ်။ ယေရှုဟာ လောကရဲ့ အလင်းတန်းဖြစ်တယ်လို့ ခရစ်ယာန်တို့ကယုံကြည်တဲ့အတွက် ဒီကာလမှာ ယေရှုခရစ်တော်ဖွားမြင်ခြင်းအထိမ်းအမှတ် ကျင်းပဖို့ သင့်လျော်တဲ့ အချိန်ဖြစ်တယ်လို့ အစောပိုင်းခရစ်ယာန်ဘာသာဝင်တို့ ယုံကြည်ကြတာဟာ ကျိုးကြောင်းဆီလျော်ပါတယ်။
သက္ကရာဇ်၂၂၁ ခုနှစ်နောက်ပိုင်း၊ ဒီဇင်ဘာ ၂၅ ရက်နေ့ကို ယေရှုခရစ်တော် ဖွားမြင်တဲ့နေ့အဖြစ်လူတွေ တဖြည်းဖြည်းလက်ခံလာခဲ့တာပါ။ အဲဒီနောက်ပိုင်းသိပ်မကြာခင်မှာပဲ ခရစ်ယာန်စာရေးဆရာတွေက နေမင်းကြီးပြန်လည်မွေးဖွားခြင်းနဲ့ ဘုရားသခင်ရဲ သားတော်ဖွားမြင်ခြင်း ကို ချိတ်ဆက်ပြောဆိုလာကြပါတယ်။
ဒါပေမယ့်လည်း ခရစ္စမတ်ဇာတ်လမ်းတွေရဲ့ အနှစ်သာရကတော့ မျှော်လင့်ချက်၊ ချစ်ခြင်းမေတ္တာ၊ ငြိမ်းချမ်းမှုနဲ့ ပျော်ရွှင်မှုအတွက် သတင်း စကား တွေသာဖြစ်ပါတယ်။ ဘာသာတရားအပေါ် ယုံကြည်သက်ဝင်သူတွေကြားမှာရောဘာသာတရားကို ယုံကြည်သက်ဝင်မှုမရှိတဲ့ အခြား ဘာသာဝင်တွေကြားမှာပါလိုလားကြတဲ့အရာလည်းဖြစ်ပါတယ်။ လူသားအားလုံး အချင်းချင်း ဖေးမကူညီဖို့၊ ဝိုင်းဝန်းစောင့်ရှောက်ဖို့ နဲ့ မေတ္တာတရားတွေထားကြဖို့ အခိုင်အမာတိုက်တွန်းလိုက်တဲ့ သတင်းစကားလည်းဖြစ်ပါတယ်။
ခရစ္စမတ်ကာလမှာ ခရစ်ယာန်တွေက လူသားအားလုံးအတွက် ငြိမ်းချမ်းရေးနဲ့ ချစ်ခြင်းမေတ္တာအတွက်ဆုတောင်းပေးတာ၊ ပေးကမ်းစွန့်ကြဲတာ၊ ပျော်ရွှင်မှုနဲ့ မျှော်လင့်ချက်တွေကိုဆောင်ကြဥ်းပေးနိုင်အောင် စကားလုံးနဲ့ရော အပြုအမူတွေနဲ့ပါ ဆောင်ရွက်ဖို့ ဖြစ်ပါတယ်။ ခရစ်စမတ်မှာ ကိုယ့်မိသားစု၊ မိတ်ဆွေ သူငယ်ချင်းနဲ့ အိမ်နီးချင်းတွေအပြင် သူစိမ်းတွေကိုပါ ချစ်ခြင်းမေတ္တာနဲ့ ကြင်နာမှုနဲ့ ရက်ရောမှုတွေပြသရမယ့် အခါသမယလည်းဖြစ်ပါတယ်။
“ ပြန်လည် ဆင်ခြင်သုံးသပ်ကြတဲ့ကာလ၊ မျှော်လင့်ချက်တွေနဲ့ ပြန်ပြီးဆန်းသစ်လာတဲ့ ခုလိုကာလမှာ “O Holy Night” ဆိုတဲ့သီချင်းကို ကျနော်တို့ ဆိုကြပါလိမ့်မယ်လို့ သမ္မတ Joe Biden က ဒီဇင်ဘာလအစောပိုင်းမှာကျင်းပခဲ့တဲ့ နိုင်ငံတော် ခရစ္စမတ်သစ်ပင် မီးထွန်းပွဲတွင် ပြောကြားခဲ့ပါတယ်။ သီချင်းထဲက စာသားထဲမှာ “ ယေရှုခရစ်တော်ရဲ့ တရားဥပဒေက ချစ်ခြင်းမေတ္တာ၊ သူ့ရဲ့ သမ္မာကျမ်းစာက ငြိမ်းချမ်းရေး”ဖြစ်တယ်ဆိုတဲ့ အပိုဒ်လည်း ပါပါတယ်၊ နိုင်ငံတော်နဲ့ နိုင်ငံသူနိုင်ငံသားတွေအတွက် ကျနော့်ရဲ့ ထာဝရ ဆုတောင်းစကားကလည်း လွတ်လပ်မှုနဲ့ ချစ်ခြင်းမေတ္တာ၊ ဂရုဏာတရားနဲ့ လူ့ဂုဏ်သိက္ခာ ဆိုတဲ့ အလင်းရောင်ကို ဆက်ပြီးရှာဖွေနိုင်ပါစေ” လို့ပဲ ဆုတောင်းပေးလို ပါတယ်လို့လည်း သမ္မတ ဂျိုးဘိုင်ဒန်က ပြောကြားခဲ့ပါတယ်။