Accessibility links

Breaking News

၂၀၂၃ ခုနှစ် အမေရိကန်ပြည်ထောင်စုအောက်မေ့ဖွယ်နေ့


Arlington Memorial Day
Arlington Memorial Day

မေလရဲ့ နောက်ဆုံးတနင်္လာနေ့မှာ အမေရိကန်တွေဟာ အောက်မေ့ဖွယ်နေ့ကို ကျင်းပကြပါတယ်။ တိုင်းပြည်နဲ့ လူမျိုးအတွက် အသက်စွန့်ပြီး စွန့်လွှတ်အနစ်နာခံ စစ်မှုထမ်းခဲ့တဲ့ အမျိုးသား၊ အမျိုးသမီးတွေကို အောက်မေ့သတိရတဲ့ နေ့တနေ့ပါ။

“အာလင်တန်မှာ၊ ဥရောပက သင်္ချိုင်းတွေမှာ၊ နိုင်ငံတဝန်းက မြို့ကြီးပြကြီးတွေမှာ သူတို့ဟာ ဂုဏ်သိက္ခာ ကြီးစွာနဲ့ လဲလျောင်း အိပ်စက် အနားယူနေကြပါတယ်။ အမေရိကန်လူထုရဲ့ ချစ်လှစွာသော သား၊ သမီးတွေဟာ ရဲရဲဝံ့ဝံ့ စွန့်စားကာ လူသား သမိုင်းမှာ အခြားမည်သည့် အယူအဆနဲ့မှမတူတဲ့ ‘အမေရိကန်ပြည်ထောင်စု’ ဆိုတာကို ထိန်းသိမ်းစောင့်ရှောက် ကာကွယ်ခဲ့ကြပါတယ်” လို့ သမ္မတ ဂျိုးဘိုင်ဒင်က ပြောပါတယ်။

“ဒီနေ့မှာတော့ တတိုင်းပြည်လုံးက သူတို့ကိုဆင်ခြင် အောက်မေ့ပြီး ကျွန်တော်တို့ဟာ မြင့်မြတ်တဲ့ ထုံးတမ်းစဉ်လာတရပ်ကို ဆောင်ရွက်သမှုပြုနေကြပါတယ်။”

အမှန်တကယ်လည်း အောက်မေ့ဖွယ်နေ့ဟာ နိုင်ငံရဲ့ လွတ်လပ်ခြင်း တရားကို အာမခံနိုင်ဖို့ အတွက် အဆုံးစွန်သော စွန့်လွှတ်အနစ်နာခံမှုတွေ ပြုလုပ်ခဲ့တဲ့ အမေရိကန်နိုင်ငံသားတွေအတွက် အသက်ရှင် ကျန်ရစ်သူတွေက ကျေးဇူး ကြွေးတင်နေတာပဲလို့ ကိုယ်စားပြု ပြောနိုင်ပါတယ်။ တချို့က တိုက်ပွဲမှာ ကျဆုံးခဲ့တယ်၊ တချို့က ရောဂါဘယနဲ့ ကွယ်လွန်ခဲ့ရတယ်။ တချို့ကတော့ နိုင်ငံရပ်ခြားက အကျဉ်းထောင်တွေမှာ ပျောက်ဆုံးသွားခဲ့ရပြီး လုံးဝ အိမ် ပြန်မလာနိုင် ဖြစ်ခဲ့ကြရတယ်။ အများစုက မိမိနိုင်ငံရဲ့ အတွေးအခေါ်နဲ့ လွတ်လပ်ခြင်းတွေတွေကို ကာကွယ်ရင်း ငယ်ငယ်ရွယ်ရွယ်နဲ့ သေဆုံးခဲ့ကြတယ်။ မြောက်အာဖရိက၊ ဥရောပ၊ ပစိဖိတ်၊ အာရှနဲ့ အရှေ့အလယ်ပိုင်း ဒေသတွေမှာလည်း တခြားသူတွေရဲ့ လွတ်လပ်ခြင်း အတွက် တိုက်ပွဲဝင်ရင်း ထောင်နဲ့ချီ ကျဆုံးခဲ့ရပါတယ်။

“လွတ်လပ်မှုဆိုတာ ဘယ်တော့မှအလကား မရပါဘူး။ ဒီမိုကရေစီက ချန်ပီယံတွေကို အမြဲတမ်း လိုအပ်နေပါတယ်” လို့ သမ္မတ ဘိုင်ဒင်က ပြောပါတယ်။ “မျိုးဆက်တိုင်းဟာ ဒီမိုကရေစီရဲ့ မဟာရန်သူတွေကို အနိုင်ယူကြရတယ်။ မျိုးဆက်တိုင်းမှာ သူတို့ရောကျွန်တော်တို့ပါ ချစ်ခင်မြတ်နိုးအပ်တဲ့ အရာအတွက် မိမိရဲ့ သွေးကိုပေးဆပ် သွန်းလောင်းလိုစိတ်နဲ့ သူရဲကောင်းများ မွေးဖွားလာကြပါတယ်။

“ဒီနေ့ ကျွန်တော်တို့ သူတို့ကို အမှတ်ရ အောက်မေ့နေပါတယ်။ လွတ်လပ်မှုဟာ စွန့်လွှတ် အနစ်နာခံမှုနဲ့ ထိုက်တန် ကြောင်းလည်း ကျွန်ုပ်တို့ ထပ်လောင်း ကတိပြုပါတယ်။ ဒီမိုကရေစီဟာ ပြီးပြည့်စုံမှု မရှိပါဘူး။ ဘယ်တုန်းကမှ မပြည့်စုံခဲ့ပါဘူး။ ဒါပေမယ့် ဒီ့ အတွက် တိုက်ပွဲဝင်ရကျိုးနပ်ပါတယ်။ လိုအပ်ရင် ဒီ့အတွက် အသက်ကို စွန့် ထိုက်ပါတယ်” လို့ သမ္မတ ဘိုင်ဒင်က ပြောပါတယ်။

“ဒီမိုကရေစီဟာ ခရီးလမ်းတလျှောက်မှာ ဆုံးရှုံးခဲ့ရသူတွေနဲ့ မြင့်မြတ်စွာ တည်ဆောက်ထားတဲ့ ကျွန်တော်တို့ရဲ့ တိုင်းပြည်အတွက် အကြီးမားဆုံး လက်ဆောင်ပါပဲ။ ကျွန်တော်တို့ရဲ့ ဒီမိုကရေစီဟာ ပြည်ထောင်စုကို ပြီးပြည့်စုံစေရေး စဉ်ဆက်မပြတ်လုပ်ဆောင်စေပါတယ် — ကျွန်တော်တို့ဟာ ပြီးပြည့်စုံအောင်မလုပ်ဆောင်နိုင်သေးပါဘူး။ ဒါပေမယ့် တိုင်းပြည်တဝန်းက ပြည်သူများအတွက် အခွင့်အလမ်း၊ သာယာဝပြောမှုနဲ့ တရားမျှတမှုဆိုင်ရာ တံခါးတွေကို ဖွင့်လှစ်ပေးနိုင်ဖို့ ကျွန်တော်တို့ဟာ ဘယ်တော့မှ ကြိုစားအားထုတ်နေမှုကို ရပ်တန့်သွားမှာ မဟုတ်ပါဘူး။”

“ဒါက ကျွန်တော်တို့ ခေတ်ကြီးရဲ့ တာဝန်ပါပဲ” လို့ သမ္မတ ဘိုင်ဒင်က ပြောပါတယ်။ “အောက်မေ့ဖွယ်နေ့ဟာ သူတို့အတွက် ကျွန်တော်တို့ ခေတ္တ နားပြီး ဆုတောင်းကြတဲ့ နေ့သက်သက် မဟုတ်ဘဲ သူတို့ ပေးဆပ်ခဲ့ရတာတွေ ထိုက်တန်ဖို့ရာ အတွက် စည်းလုံးညီညွတ်စွာနဲ့ နေ့စဉ်လုပ်ဆောင်ကြရမယ့် ကတိကဝတ်တစ်ခု ဖြစ်ရပါမယ်။”

၂၀၂၃ ခုနှစ် အမေရိကန်ပြည်ထောင်စုအောက်မေ့ဖွယ်နေ့
please wait

No media source currently available

0:00 0:03:46 0:00

XS
SM
MD
LG