ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດຂໍປະນາມຢ່າງແຮງ ຕໍ່ການທີ່ພວກເຈົ້າໜ້າທີ່ຮົງກົງ ຈັບກຸມພະກາດີນານ ໂຈເຊັບ ເຊັນ ອາຍຸ 90 ປີ ອະດີດພະສັງຄະຮາດຮົງກົງ ແລະເປັນຜູ້ຕ້ອງຕິພັກຄອມມູນິສຈີນ ແລະພວກນັກເຄື່ອນໄຫວເພື່ອປະຊາທິປະໄຕອີກ 3 ຄົນ ທ່ານນາງມາກກາເຣັດ ອຶງ ນັກກົດໝາຍແລະອະດີດສະມາຊິກສະພານິຕິບັນຢັດ, ທ່ານຫຸຍ ໂປ-ເຄິງ ນັກປາດແລະອະດີດອາຈານສອນ ແລະທ່ານນາງເດນີສ ໂຮ ດາລາແລະກໍເປັນນັກຮ້ອງ.
ບຸກຄົນທັງ 4 ເປັນຜູ້ທີ່ໄດ້ຮັບການແຕ່ງຕັ້ງໃຫ້ເປັນຜູ້ບໍລິຫານກອງທຶນບັນເທົາທຸກດ້ານມະນຸດສະທຳ 612 ຊຶ່ງໃນເວລານີ້ໄດ້ຖືກຍຸບໄປແລ້ວ ແລະກອງທຶນນີ້ໄດ້ຖືກສ້າງຕັ້ງຂຶ້ນໃນປີ 2019 ເພື່ອສະໜອງການຊ່ວຍເຫຼືອທາງດ້ານການເງິນແລະດ້ານກົດໝາຍຕໍ່ພວກທີ່ເຂົ້າຮ່ວມໃນການເດີນຂະບວນປະທ້ວງເພື່ອປະຊາທິປະໄຕຢູ່ໃນຮົງກົງ.
ພວກເຂົາເຈົ້າໄດ້ຖືກກ່າວຫາຢ່າງບໍ່ຖືກຕ້ອງ ແລະຖືກຈັບໃນວັນທີ 11 ພຶດສະພາຜ່ານມາ ໃນການສົມຮູ້ຮ່ວມຄິດກັບກຳລັງຕ່າງປະເທດແລະໃນເວລາຕໍ່ມາກໍໄດ້ຖືກປ່ອຍດ້ວຍການປະກັນໂຕ ແຕ່ອາດຈະຖືກຕັດສິນໂທດຈຳຄຸກຕະຫຼອດຊີວິດ.
ໂຄສົກກະຊວງການປະຕ່າງປະເທດສະຫະລັດ ທ່ານເນດ ໄພຣສ໌ ກ່າວວ່າ “ໃນການຈັບກຸມພວກນັກເຄື່ອນໄຫວອະວຸໂສເຫຼົ່ານີ້ ນັກວິຊາການແລະຜູ້ນຳທາງສາສະໜາ ພາຍໃຕ້ອັນທີ່ເອີ້ນວ່າກົດໝາຍຄວາມໝັ້ນຄົງແຫ່ງຊາດ ເຈົ້າໜ້າທີ່ຮົງກົງອີກຄັ້ງນຶ່ງໄດ້ສະແດງໃຫ້ເຫັນວ່າ ພວກເຂົາເຈົ້າຈະໃຊ້ທຸກວິທີທາງ ເພື່ອປິດປາກປິດສຽງພວກຄັດຄ້ານລັດຖະບານແລະຕັດຮອນສິດທິແລະອິດສະຫຼະພາບໄດ້ຮັບການປົກປ້ອງນັ້ນ.
ຮອງໂຄສົກຫຼັກຂອງທຳນຽບຂາວ ທ່ານນາງແຄຣີນ ຊັງ-ປີແອ ຮຽກຮ້ອງໃຫ້ “ເຈົ້າໜ້າທີ່ ສປ ຈີນ ແລະຮົງກົງ ຢຸດເຊົາໃນການແນເປົ້າໝາຍໃສ່ພວກສະໜັບສະໜຸນຮົງກົງ” ໂດຍໃຫ້ຂໍ້ສັງເກດວ່າ “ອິດສະຫຼະພາບໃນການສະແດງຄວາມຄິດຄວາມເຫັນ ແມ່ນມີຄວາມສຳຄັນ ຕໍ່ຄວາມອຸດົມຮັ່ງມີຂອງສັງຄົມທີ່ໝັ້ນຄົງ.”
ໃນຮອບຫຼາຍໆປີທີ່ຜ່ານມານີ້ ປັກກິ່ງໄດ້ເຂົ້າຄວບຄຸມຮົງກົງເພີ້ມຂຶ້ນ ໂດຍຈັບກຸມຄຸມຂັງພວກນັກເຄື່ອນໄຫວເພື່ອປະຊາທິປະໄຕ ທັບມ້າງກຸ່ມສັງຄົມພົນລະເຮືອນ ແລະບັງຄັບໃຫ້ອົງການສື່ມວນຊົນອິດສະຫຼະຕ້ອງໄດ້ອັດກິດຈະການລົງ. ສປ ຈີນ ໄດ້ລະເມີດອິດສະຫຼະພາບຂັ້ນພື້ນຖານຂອງປະຊາຊົນໃນຮົງກົງຫຼາຍຂຶ້ນ ຊຶ່ງອິດສະຫຼະພາບເຫຼົ່ານີ້ ໄດ້ຮັບການຄ້ຳປະກັນ ໃນຄຳປະກາດຮ່ວມ ລະຫວ່າງຈີນ ແລະອັງກິດ ເວລາການຄວບຄຸມຮົງກົງ ໄດ້ຖືກໂອນຈາກອັງກິດໄປໃຫ້ ສາທາລະນະລັດປະຊາຊົນຈີນໃນປີ 1997.
ການຈັບກຸມໄດ້ມີຂຶ້ນພຽງ 5 ມື້ ຫຼັງຈາກຜູ້ສະໝັກ ທີ່ໄດ້ຮັບການອະນຸມັດພຽງຄົນດຽວຂອງພັກຄອມມູນິສຈີນສຳລັບຕຳແໜ່ງຫົວໜ້າບໍລິຫານຮົງກົງຄືອະດີດຫົວໜ້າຮັກສາຄວາມສະຫງົບ ຂອງຮົງກົງ ທ່ານຈອນ ລີ ກາ-ຈິວ ເຂົ້າຮັບຕຳແໜ່ງ.
ຫຼັງຈາກອັນທີ່ເອີ້ນວ່າ “ການເລືອກຕັ້ງ” ຂອງລາວແລ້ວ ບັນດາລັດຖະມົນຕີການຕ່າງປະເທດຂອງກຸ່ມ ຈີ-7 ຊຶ່ງຮວມທັງການາດາ ຝຣັ່ງ ເຢຍຣະມັນ ອີຕາລີ ຍີ່ປຸ່ນ ສະຫະຣາຊະອານາຈັກ ແລະ ສະຫະລັດ ໄດ້ອອກຖະແຫຼງການ ສະແດງ “ຄວາມເປັນຫ່ວງຢ່າງເລິກເຊິ່ງ ກ່ຽວກັບຂັ້ນຕອນການເລືອກເອົາຫົວໜ້າບໍລິຫານຂອງຮົງກົງ ອັນເປັນສ່ວນນຶ່ງໃນການໂຈມຕີ ຕໍ່ການເມືອງ ແບບມີຫຼາຍພັກຝ່າຍແລະອິດສະຫຼະພາບຂັ້ນພື້ນຖານ ທີ່ຍັງດຳເນີນຢູ່ຕໍ່ມາ. ພວກເຮົາຈະສືບຕໍ່ ຮຽກຮ້ອງໃຫ້ຈີນ” ຊຶ່ງພວກທ່ານປະກາດວ່າ “ປະຕິບັດຕາມ ເພື່ອໃຫ້ເປັນການສອດຄ່ອງ ກັບຄຳປະກາດຮ່ວມລະຫວ່າງອັງກິດ ແລະຈີນ ແລະພັນທະທາງດ້ານກົດໝາຍອື່ນໆອີກດ້ວຍ.”
