តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ក្នុងឆ្នាំ២០២២នេះ សាធារណរដ្ឋប្រជាធិបតេយ្យប្រជាមានិតកូរ៉េបានបង្ហោះមីស៊ីលផ្លោង៣១គ្រឿងដោយមានរួមបញ្ចូលមីស៊ីលផ្លោងអន្តរទ្វីប៦គ្រឿង មីស៊ីលផ្លោងមានវង់ប្រតិបត្តិការមធ្យមមួយគ្រឿង និងយ៉ាងហោចណាស់កាំជ្រួចមានល្បឿនលឿនជាងសំឡេងពីរគ្រឿង។ ការបង្ហោះមីស៊ីលទាំងនេះបានរំលោភលើសេចក្តីសម្រេចចិត្តជាច្រើនរបស់ក្រុមប្រឹក្សាសន្តិសុខអ.ស.ប.។ បន្ថែមលើនេះ របាយការណ៍នានាបញ្ជាក់ថា រដ្ឋាភិបាលក្រុងព្យុងយ៉ាងកំពុងប្រុងប្រៀបធ្វើតេស្តនុយក្លេអ៊ែរជាលើកដំបូងក្នុងរយៈពេលប្រាំឆ្នាំ។
នៅក្នុងការប្រឈមនឹងការបង្ករឿងទាំងនេះ ស.រ.អ.បានដាក់ស្នើសេចក្តីសម្រេចចិត្តមួយក្នុងក្រុមប្រឹក្សាសន្តិសុខអ.ស.ប.កាលពីខែឧសភាដើម្បីពង្រឹងការដាក់ទណ្ឌកម្មលើសាធារណរដ្ឋប្រជាធិបតេយ្យប្រជាមានិតកូរ៉េហៅ DPRK អំពីការបង្ហោះមីស៊ីលផ្លោងរបស់ខ្លួន។ តែយ៉ាងណាក៏ដោយក៏ក្នុងពេល១៥ឆ្នាំនេះ មានការខ្វែងគំនិតគ្នាមួយប្រកបដោយគ្រោះថ្នាក់នៅក្នុងក្រុមប្រឹក្សាសន្តិសុខអ.ស.ប.ទាក់ទិននឹង DPRK។ នៅពេលដែលប្រទេសជាសមាជិក១៣បានបោះឆ្នោតគាំទ្រសេចក្តីសម្រេចចិត្តនេះ ប្រទេសរុស្ស៊ីនិងសាធារណរដ្ឋប្រជាមានិតចិន ដែលជាសមាជិកអចិន្ត្រៃយ៍ពីរនៃក្រុមប្រឹក្សាសន្តិសុខបានបោះឆ្នោតវ៉េតូជំទាស់នឹងសេចក្តីសម្រេចចិត្តនេះ ដែលនាំឱ្យវាបរាជ័យ។
កាលពីថ្ងៃទី៨ មិថុនានៅក្នុងការពិភាក្សាគ្នាមួយនៅក្នុងមហាសន្និបាតអ.ស.ប.អំពីការបោះឆ្នោតវ៉េតូដោយប្រទេសរុស្ស៊ី និងសាធារណរដ្ឋប្រជាមានិតចិន លោកឯកអគ្គរដ្ឋទូត Jeffrey DeLaurentis ទីប្រឹក្សាជាន់ខ្ពស់ខាងកិច្ចការនយោបាយនៃស្ថានបេសកកម្មស.រ.អ.ប្រចាំអ.ស.ប. បាននិយាយថា ការបោះឆ្នោតវ៉េតូទាំងនេះបង្ហាញ«ការយល់ព្រមទាំងស្រុង»ដល់សកម្មភាពប្រកបដោយគ្រោះថ្នាក់ និងធ្វើឱ្យមានអស្ថិរភាពនៃសាធារណរដ្ឋ DPRK។ លោកបានថ្លែងថា «សមាជិក១៣ប្រទេសនៃក្រុមប្រឹក្សាសន្តិសុខបានបញ្ជូនសារខ្លាំងមួយទៅឱ្យសាធារណរដ្ឋ DPRK ថា អាវុធមហាប្រល័យ និងការអភិវឌ្ឍន៍មីស៊ីលផ្លោងរបស់ខ្លួននឹងមិនត្រូវអត់ឱនឱ្យបានទេនិងដើម្បីបញ្ជូនសញ្ញាមួយដល់ពួកអ្នកធ្វើឱ្យរីកសាយអាវុធថា គួរមានផលវិបាកសម្រាប់អាកប្បកិរិយាពួកគេផងដែរ។ ប្រទេសពីរមិនបានធ្វើដូច្នេះទេ»។
លោកឯកអគ្គរដ្ឋទូត DeLaurentis បានកត់សម្គាល់កាលពីដើមឆ្នាំនេះថា រុស្ស៊ី និងសាធារណរដ្ឋ PRC បានសន្យាអំពី«ភាពដៃគូគ្មានកម្រិត»។
លោកបាននិយាយថា «យើងសង្ឃឹមថា ការបោះឆ្នោតវ៉េតូទាំងនេះមិនមែនជាការបញ្ចាំងឱ្យឃើញភាពដៃគូមួយត្រូវដាក់លើផលប្រយោជន៍រួមនៃអង្គការនេះ ឬលើផលប្រយោជន៍រួមនៃស្ថាប័នពហុភាគីដែលមានអាណត្តិធ្វើឱ្យប្រាកដអំពីសុវត្ថិភាព និងសន្តិសុខរបស់យើងទាំងអស់គ្នាទេ»។
ស.រ.អ.បាននិយាយច្រើនដងមកហើយថា ខ្លួនស្វះស្វែងឱ្យមានការសន្ទនាគ្នាជាមួយរដ្ឋាភិបាលក្រុងព្យុងយ៉ាងដោយគ្មានលក្ខខ័ណ្ឌ ហើយនៅតែមានការសន្យាធ្វើឱ្យមានមាគ៌ាការទូតមួយជាមួយសាធារណរដ្ឋ DPRK។ ស.រ.អ.បាននិយាយច្បាស់លាស់ដែរថា ជាមួយពួកសម្ព័ន្ធមិត្តខ្លួន ខ្លួននឹងរក្សាឱ្យមានសមត្ថភាពធ្វើឱ្យរារាំងដល់ការធ្វើសង្គ្រាម ហើយនឹងធ្វើឱ្យមានការអនុវត្តការដាក់ទណ្ឌកម្មពហុភាគីនិងឯកតោភាគីទាំងអស់ផងដែរ។
នៅឯអ.ស.ប. លោកឯកអគ្គរដ្ឋទូត DeLaurentis បានប្រកាសថាស.រ.អ.នឹងបន្តធ្វើការ«ជាទៀងទាត់ ដោយយកចិត្តទុកដាក់និងប្រកបដោយតម្លាភាពជាមួយក្រុមប្រឹក្សាសន្តិសុខ ពួកសម្ព័ន្ធមិត្តនិងក្រុមដៃគូរបស់យើង និងពួករដ្ឋជាសមាជិកទាំងអស់ដែលចង់បញ្ឈប់កម្មវិធីអាវុធមហាប្រល័យនិងកម្មវិធីមីស៊ីលផ្លោងមិនត្រឹមត្រូវតាមច្បាប់របស់សាធារណរដ្ឋ DPRK ព្រមទាំងប្រព្រឹត្តតាមគុណតម្លៃនៃការមិនរីកសាយអាវុធផងដែរ»៕
