តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
កត្តាដ៏សំខាន់មួយដែលឈានដល់ការដួលរលំរបបដឹកនាំរបស់លោក Bashar al-Assad នៅក្នុងប្រទេសស៊ីរីគឺការខ្វះការជួយជ្រោមជ្រែងដែលលោកធ្លាប់បានទទួលពីសម្ពន្ធមិត្តរបស់លោកដែលនោះគឺរុស្ស៊ី អ៊ីរ៉ង់ និងក្រុមហេសបូឡា (Hezbollah)។ សម្ពន្ធមិត្តទាំងនេះបានជួយគាំទ្ររបបដឹកនាំរបស់លោកនិងធ្វើឱ្យលោកបាននៅកាន់អំណាចអស់រាប់ទសវត្សរ៍។
នៅពេលដែលពួកឧទ្ទាមអ៊ិស្លាមបានដណ្តើមកាន់កាប់យ៉ាងឆាប់រហ័សនូវទីក្រុងនានារបស់ស៊ីរី សម្ពន្ធមិត្តរបស់លោក Assad ខកខានមិនបានជួយលោកដោយសារពួកគេជាប់រវល់នឹងកិច្ចការផ្សេងឬក៏បានចុះខ្សោយយ៉ាងខ្លាំង។ តួយ៉ាង រុស្ស៊ីកំពុងជាប់ធ្វើសង្គ្រាមនៅអ៊ុយក្រែន ហើយក្រុមហេសបូឡានិងអ៊ីរ៉ង់កំពុងមមាញឹកទប់ទល់នឹងវិធានការការពារខ្លួនរបស់អ៊ីស្រាអែល សហរដ្ឋអាមេរិក និងសម្ពន្ធមិត្តផ្សេងទៀត នៅក្រោយពេលដែលអ៊ីរ៉ង់និងក្រុមហេសបូឡាព្យាយាមពង្រីកសង្គ្រាមប្រឆាំងនឹងអ៊ីស្រាអែល។
លោក John Kirby ទីប្រឹក្សាផ្នែកសារគមនាគមន៍សន្តិសុខជាតិរបស់សេតវិមានបានបញ្ជាក់នៅក្នុងកិច្ចសម្ភាសន៍មួយជាមួយ VOA ថា តំបន់មជ្ឈិមបូព៌ាត្រូវបានផ្លាស់ប្តូរក្នុងកម្រិតមួយគួរសម។
លោកថ្លែងថា៖ «នៅពេលដែលអ៊ីរ៉ង់ភ្ញាក់ដឹងខ្លួនហើយក្រឡេកមើលតំបន់នោះ វាមានលក្ខណៈខុសប្លែកពីមុន ហើយសម្ពន្ធភាពនៃការតស៊ូរបស់ពួកគេបានបែកបាក់នៅទីកន្លែងជាច្រើន។ ...ពួកគេក៏មានការចុះខ្សោយផងដែរនូវសមត្ថភាពយោធាផ្នែកការពារដែនអាកាស»។
អ្នកនាំពាក្យក្រសួងការបរទេសសហរដ្ឋអាមេរិកលោក Matthew Miller បាននិយាយថា វានៅមិនទាន់ច្បាស់ទេថាតើថ្នាក់ដឹកនាំអ៊ីរ៉ង់នឹងវិនិច្ឆ័យបែបណាអំពីតថភាពថ្មីនេះ។
«ប្រសិនបើខ្ញុំជាពួកគេ ខ្ញុំនឹងក្រឡេកមើលលើទង្វើដែលពួកគេបានធ្វើក្នុងពេលជាងមួយទសវត្សរ៍ចុងក្រោយនេះនៃការព្យាយាមគាំទ្រភេរវកម្មនិងធ្វើឱ្យតំបន់មានអស្ថិរភាពបន្ថែមទៀត ដែលនេះជាយុទ្ធសាស្ត្រមួយដែលបានបរាជ័យ។ នៅពេលដែលអ្នកមើលលើការគាំទ្ររបស់ពួកគេលើក្រុមរណប គឺច្បាស់ណាស់ ពួកគេមានយុទ្ធសាស្ត្រដែលពួកគេបានអនុវត្តដើម្បីព្យាយាមគំរាមកំហែងប្រទេសអ៊ីស្រាអែលពីខាងក្រៅព្រំដែនរបស់អ៊ីស្រាអែល វាយប្រហារភេរវកម្មម្តងហើយម្តងទៀតលើជនស៊ីវិលនៅខាងក្នុងប្រទេសអ៊ីស្រាអែល និងវាយប្រហារភេរវកម្មលើអង្គភាពផ្សេងទៀតនៅជុំវិញតំបន់នោះ»។
លោក Miller បានសម្តែងនូវក្តីសង្ឃឹមថា អ៊ីរ៉ង់នឹងក្រឡេកមើលគោលនយោបាយដែលបរាជ័យរបស់ខ្លួនហើយនឹងជ្រើសរើសមាគ៌ានៃការកាត់បន្ថយភាពតានតឹងនិងមិនបន្តការប៉ុនប៉ងដើម្បីបង្កអស្ថិរភាពនិងគាំទ្រអំពើភេរវកម្មនោះទេ។
លោក Millerថ្លែងថា៖ «ខ្ញុំដឹងយ៉ាងច្បាស់ថាពួកគេនឹងមានការផ្លាស់ប្តូរចិត្តគំនិត ក៏ប៉ុន្តែខ្ញុំគិតថានោះគឺជាការវាយតម្លៃដ៏វៃឆ្លាត»។
របាយការណ៍កាលពីពេលថ្មីៗនេះរបស់នាយកស៊ើបការណ៍សម្ងាត់ជាតិសហរដ្ឋអាមេរិកបានកត់សម្គាល់ថា មានការជជែកដេញដោលជាសាធារណៈនៅក្នុងប្រទេសអ៊ីរ៉ង់កាលពីពេលថ្មីៗនេះអំពីអត្ថប្រយោជន៍បែបកម្លារារាំងនៃអាវុធនុយក្លេអ៊ែរ។ នាយកស៊ើបការណ៍សម្ងាត់ជាតិអាមេរិកក៏បានរាយការណ៍ផងដែរថា នៅពេលបច្ចុប្បន្ននេះអ៊ីរ៉ង់មានសារធាតុដែលអាចបំបែកបានគ្រប់គ្រាន់សម្រាប់អាវុធដូចនេះជាង ១០ គ្រឿង។
លោក Miller បានបញ្ជាក់ជាថ្មីនិងបានសង្កត់ធ្ងន់អំពីគោលនយោបាយដ៏យូរមកហើយរបស់សហរដ្ឋអាមេរិកថា៖ «យើងនឹងមិនអនុញ្ញាតឱ្យអ៊ីរ៉ង់បានអាវុធនុយក្លេអ៊ែរនោះទេ»៕
បទវិចារណកថា៖ តើអ៊ីរ៉ង់នឹងឆ្លើយតបបែបណានៅពេលប្រឈមនឹងតថភាពថ្មីមួយ?
