តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
កាលពីពេលថ្មីៗនេះ ក្រសួងការបរទេសស.រ.អ.បានរៀបចំពិធីប្រគល់ពានរង្វាន់ស្ត្រីក្លាហានអន្តរជាតិប្រចាំឆ្នាំរបស់ខ្លួន។
អនុរដ្ឋមន្ត្រីការបរទេសស.រ.អ.ខាងសន្តិសុខស៊ីវិល លទ្ធិប្រជាធិបតេយ្យ និងសិទ្ធិមនុស្សលោកស្រី Ezra Zeya បាននិយាយថា ពួកស្ត្រីដែលទទួលកិត្តិយសនេះបានធ្វើការដើម្បីធ្វើឱ្យប្រាកដថា ប្រព័ន្ធច្បាប់របស់ប្រទេសពួកគេការពារមនុស្សទាំងអស់ដោយមិនគិតពីភេទ ជំនឿ ឬសាវតាររបស់ពួកគេនោះទេ។
លោកស្រីបាននិយាយថា៖ «ហើយនៅពេលណាប្រព័ន្ធទាំងនោះមិនអាច ឬនឹងមិនការពារពលរដ្ឋគ្រប់គ្នាបាន ក្រុមស្ត្រីទាំងនេះប្រយុទ្ធដើម្បីកែប្រែពួកគេ។ ពួកគេបានបំបែករបាំង បង្កើនការប្រឹងប្រែងនិងបំផុសគំនិតស្ត្រីវ័យក្មេងឯទៀតៗដើម្បីឱ្យដើរតាមការដឹកនាំរបស់ពួកគេ»។
ជ័យលាភីម្នាក់ក្នុងចំណោមជ័យលាភីទាំងអស់ដែលត្រូវបានទទួលស្គាល់ គឺលោកស្រីបណ្ឌិត Zakira Hekmat។ កើតនៅក្នុងប្រទេសអាហ្វហ្គានីស្ថាន លោកស្រីបណ្ឌិត Hekmat បានបង្កើតសមាគមសាមគ្គីភាពជនភៀសខ្លួនអាហ្វហ្គានីស្ថានក្នុងប្រទេសតួកគី ហើយបានជួយជនជាតិអាហ្វហ្គានីស្ថានជាច្រើននាក់ឱ្យមានការការពារជាជនភៀសខ្លួន និងឱ្យបានទទួលការជ្រកកោន។
លោកស្រី Alba Rueda ប្រេសិតពិសេសរបស់ប្រទេសអាហ្សង់ទីនខាងភេទនិងយេនឌ័របានជួយឱ្យមានការអនុម័តច្បាប់កូតាការងាររបស់ក្រុមជនប្តូរភេទ។
នៅក្នុងសាធារណរដ្ឋអាហ្វ្រិកកណ្តាល លោកស្រីសាស្ត្រាចារ្យ Daniele Darlan ត្រូវបានទទួលស្គាល់ដោយសារការការពាររបស់លោកស្រីដល់រដ្ឋធម្មនុញ្ញរបស់ប្រទេសជាតិ។
លោកស្រី Doris Rios នៃប្រទេសកូស្តារីកាមានទាក់ទិននឹងការផ្តើមគំនិតជាច្រើនដើម្បីកែលម្អជីវភាពក្រុមជនជាតិដើម។
លោកស្រី Meaza Mohammed អ្នកកាសែតជើងចាស់អេត្យូពី បានរាយការណ៍អំពីពួកអ្នកនៅរស់ពីអំពើហិង្សាខាងយេនឌ័រ ហើយបានធ្វើការដើម្បីស្វែងរកការព្យាបាលជនរងគ្រោះទាំងនេះ។
នៅក្នុងប្រទេសហ្ស៊កដានី លោកស្រី Hadeed Abdel Aziz ជាអ្នកបង្កើតមជ្ឈមណ្ឌលយុត្តិធម៌សម្រាប់ជំនួយខាងច្បាប់ដែលផ្តល់សេវាដល់បុគ្គលងាយរងគ្រោះរាប់ពាន់នាក់ជារៀងរាល់ឆ្នាំ។
លោកស្រី Bakhytzhan Toregozhina មកពីប្រទេសកាហ្សាក់ស្ថានជាសកម្មជនសង្គមស៊ីវិលដែលបានធ្វើយុទ្ធនាការការពារសិទ្ធិមនុស្សក្នុងប្រទេសលោកស្រីជាច្រើនទសវត្សរ៍មកហើយ។
លោកស្រីសមាជិកាព្រឹទ្ធសភាម៉ាឡេស៊ី Datuk Ras Adiba Radzi បានចំណាយពេលភាគច្រើននៃជីវិតអាជីពលោកស្រីក្នុងការជំរុញនិងឧបត្ថម្ភផ្ចុងផ្តើមសិទ្ធិមនុស្សដោយប្រើកម្មវិធីរបស់លោកស្រីសម្រាប់លាតត្រដាងអំពើអយុត្តិធម៌ក្នុងសង្គមម៉ាឡេស៊ី។
លោកស្រីឧត្តមសេនីយ៍ត្រី Bolor Ganbold មកពីប្រទេសម៉ុងហ្គោលីបានក្លាយជាឧត្តមសេនីយ៍ស្រីទីមួយក្នុងកងយោធពលម៉ុងហ្គោលីកាលពីឆ្នាំ២០២២។
លោកស្រី Bianka Zalewska ជាអ្នកកាសែតប៉ូឡូញម្នាក់ដែលបានចងក្រងឯកសារអំពីការឈ្លានពានរបស់រុស្ស៊ីក្នុងប្រទេសអ៊ុយក្រែនតាំងពីឆ្នាំ២០១៤ ហើយបាននិយាយការពារប្រជាជនអ៊ុយក្រែនជាងមួយទសវត្សរ៍មកហើយ។
លោកស្រី Yuliia Paievska នៃប្រទេសអ៊ុយក្រែនបានល្បីឈ្មោះដោយសារការងាររបស់លោកស្រីក្នុងការថតវីដេអូដោយសម្ងាត់ ហើយបានបញ្ជូនវីដេអូទាំងនេះទៅក្រៅប្រទេសដែលជាឯកសាររៀបរាប់អំពីអំពើឃោរឃៅរបស់កងកម្លាំងរុស្ស៊ីនៅទីក្រុង Mariupol។
ហើយជាទីបញ្ចប់ ពានរង្វាន់ Madeleine Albright Honorary Group Award ត្រូវបានប្រគល់ជូនក្រុមស្ត្រីនិងនារីបាតុករនៃប្រទេសអ៊ីរ៉ង់។
រដ្ឋមន្ត្រីការបរទេសស.រ.អ.លោក Antony Blinken បានមានប្រសាសន៍ថា៖ «ចំពោះក្រុមស្ត្រីដែលទទួលរង្វាន់របស់យើង ស.រ.អ.មានមោទនភាពក្នុងការស្ថិតនៅក្បែរពួកលោកស្រី នៅពេលដែលក្រុមរបស់លោកស្រីនិងពួកជនឯទៀតៗបានធ្វើការប្រយុទ្ធតូចតាចរាប់រយជារៀងរាល់ថ្ងៃ។ ហើយយើងនឹងនៅទីនោះជាមួយក្រុមលោកស្រីក្នុងរយៈពេលយូរ»៕
