Accessibility links

Breaking News

បទវិចារណកថា៖ ការផ្តល់​កិត្តិយស​ជូន​អ្នកកាសែត​អង់អាច​ក្លាហាន


រូបឯកសារ៖ អ្នកតស៊ូ​មតិ​ផ្នែក​សេរីភាព​សារព័ត៌មាន ប្រមូល​ផ្តុំ​គ្នាតវ៉ា​​នៅ​ខាង​ក្រៅ​តុលាការ​ក្នុង​ទីក្រុង​ហុងកុង។

តទៅនេះ គឺជា​បទ​វិចារណកថា​ដែល​ឆ្លុះ​បញ្ចាំង​អំពី​ទស្សនៈ​របស់​រដ្ឋាភិបាល​សហរដ្ឋ​អាមេរិក

ប្រធាន​ទីភ្នាក់ងារ​សហរដ្ឋ​អាមេរិក​សម្រាប់​អភិវឌ្ឍន៍អន្តរជាតិ (USAID) លោក​ស្រី Samantha Power កាលពី​ពេល​ថ្មី​ៗ​នេះ បាន​ស្វាគមន៍​ជ័យ​លាភី​រង្វាន់ Kurt Schork Awards សម្រាប់​ឆ្នាំ​នេះក្នុង​វិស័យ​កាសែត​អន្តរជាតិ។ រង្វាន់​នេះ ផ្តល់​កិត្តិយស​ជូន​ពួក​អ្នក​កាសែត​ក្លាហាន​ ហើយ​ជា​រឿយៗ​មិនត្រូវ​បាន​គេទទួល​ស្គាល់​ចំពោះ​សេចក្តីរាយការណ៍​របស់​ពួកគេស្តីពី​ជម្លោះ អំពើ​ពុក​រលួយ​ និង​ភាព​អយុត្តិធម៌។

ជ័យ​លាភី​នៅ​ឆ្នាំ​នេះ រួមមាន​អ្នក​កាសែត​ជនជាតិ​អាមេរិកាំង​ដើម​កំណើត​អ៊ីរ៉ង់​លោក Jason Motlagh អ្នក​កាសែត​ជន​ជាតិ​ប្រេហ្ស៊ីល​លោក Rafael Soares និង​លោក Khabat Abbas មកពី​ប្រទេស​ស៊ីរី។

រង្វាន់ Kurt Schork សម្រាប់​វិស័យ​កាសែត​អន្តរជាតិ ដែល​បាន​បង្កើតឡើង​កាលពី២០ឆ្នាំមុន ត្រូវ​បាន​គេ​ដាក់​ឈ្មោះ​លោក Kurt Schork អ្នក​កាសែត​អាមេរិកាំង​ដែល​ត្រូវ​បាន​គេ​សម្លាប់​នៅ​ក្នុង​ប្រទេស​សៀរ៉ា​ឡេអូន​ ខណៈពេល​ដែល​បំពេញ​ការងារ​ឲ្យ​ទីភ្នាក់ងារ​ព័ត៌មាន Reuters នៅ​ក្នុង​ឆ្នាំ២០០០។

ដើម្បី​ទទួល​ស្គាល់​ពី​សារៈសំខាន់​នៃ​សារព័តមាន​សេរី ទីភ្នាក់ងារ​សហរដ្ឋ​អាមេរិក​សម្រាប់​អភិវឌ្ឍន៍​អន្តរជាតិ​ ឬ USAID បាន​ជួយ​គាំទ្រ​អ្នក​កាសែត​នៅ​ក្នុង​ប្រទេស​ជាង​៣០​ ដោយ​ការការពារ​និង​ជំនួយ​ខាង​ផ្លូវ​ច្បាប់​សម្រាប់​អ្នក​ដែល​ស្ថិត​នៅ​ក្រោម​ការគំរាម​កំហែង។ ប្រធាន​ទីភ្នាក់ងារ USAID លោកស្រី Samantha Power បាន​មាន​ប្រសាសន៍​ថា «កម្មវិធី​របស់​យើង បាន​ជួយ​ជំរុញ​ឲ្យ​មាន​វិស័យ​ព័ត៌មាន​ឯករាជ្យ​និង​ផ្អែក​លើ​ការពិត ដែល​យើង​ដឹង​ថា​ ជាគ្រឹះ​សម្រាប់​សង្គម​លូតលាស់​ និងសេដ្ឋកិច្ច​រុងរឿង»។

អ្នក​កាសែត​ជារឿយៗ ជួបប្រទះ​ហានិភ័យ​ក្នុង​ការនិយាយ​ការពិត ​និង​ផ្តល់​ព័ត៌មាន​ដល់​សាធារណជន។ ប្រធាន​ទីភ្នាក់ងារ USAID លោក​ស្រី Power បាន​ថ្លែង​ថា៖

«នេះ​ជាការពិត​ជាក់​ស្តែង​នៃ​អ្នក​កាសែត​ដែល​យើង​កំពុង​ផ្តល់​កិត្តិយស​ដែល​បាន​រាយការណ៍​អំពី​សង្គ្រាម​នៅ​ប្រទេស​អាហ្វហ្គានីស្ថាន ការសម្លាប់​ដោយ​គ្មាន​ការជំនំជម្រះ​នៅ​ក្នុង​ប្រទេស​ប្រេហ្ស៊ីល អំពើ​ឃោឃៅ​ដ៏​ខ្លោចផ្សា​នៅ​ប្រទេស​ស៊ីរី ការ​ប្រើប្រាស់​ពលកម្ម​កុមារ​នៅ​ក្នុង​ប្រទេស​ប៉ាគីស្ថាន​ និង​ប្រព័ន្ធ​យុត្តិធម៌​ព្រហ្មទណ្ឌ​នៅ​ប្រទេស​នីហ្សេរីយ៉ា។ ការងារ​របស់​ពួកគេ បាន​បង្ហាញ​ការពិត​ពីសង្គ្រាម​និង​ជម្លោះ ហើយ​បាន​លាត​ត្រដាង​ពី​ការរំលោភ​សិទ្ធិ​មនុស្ស ការរើសអើង និង​អំពើ​ពុករលួយ។ ហើយ​ការតាំងចិត្ត​របស់​ពួកគេ​ដល់​ការនិយាយ​ការពិត មាន​សារៈ​សំខាន់​សម្រាប់​វិស័យ​សារព័ត៌មាន​នៅពេលនេះ»។

លោក​ស្រី Power បាន​មាន​ប្រសាសន៍​ទៀត​ថា «ការវាយ​ប្រហារ​លើ​អ្នក​កាសែត ការវាយ​ប្រហារ​លើ​រាងកាយ ការវាយ​ប្រហារ​ខាង​ផ្លូវ​ច្បាប់ ការវាយ​ប្រហារ​ខាង​នយោបាយ​និង​ការវាយ​ប្រហារ​លើ​សេរីភាព​ព័ត៌មាន កំពុង​កើនឡើង។ សហរដ្ឋ​អាមេរិក ឈរ​ជាមួយ​អ្នក​កាសែត​ដ៏​អង់​អាច​ក្លាហាន អង្គការ​បណ្តាញ​ព័ត៌មាន​ឯករាជ្យ​ និង​អ្នក​កាសែត​និង​អ្នកកាសែត​តាម​កិច្ចសន្យា​នៅ​ទូទាំង​ពិភពលោក​ដែល​បំពេញ​ការងារ​ដ៏​សំខាន់​របស់​ខ្លួន ​ថ្វី​បើ​មាន​ការគំរាម​កំហែង​ទាំង​នេះ​ក៏ដោយ៕

XS
SM
MD
LG