តទៅនេះ គឺជាបទវិចារណកថាដែលឆ្លុះបញ្ចាំងឱ្យឃើញពីទស្សនៈរបស់រដ្ឋាភិបាលសហរដ្ឋអាមេរិក
សហគមន៍អន្តរជាតិខ្វល់ខ្វាយដោយត្រឹមត្រូវអំពីការគំរាមកំហែងដល់សន្តិភាពនិងសន្តិសុខអន្តរជាតិដោយសាធារណរដ្ឋប្រជាធិបតេយ្យប្រជាមានិតកូរ៉េហៅ DPRK មានរួមការបាញ់បង្ហោះមីស៊ីលផ្លោង ការប្រុងប្រៀបពិសោធនុយក្លេអ៊ែរ និងការវាយ ប្រហារ cyber ប្រឆាំងនឹងហេដ្ឋារចនាសម្ព័ន្ធរូបិយបណ្ណ crypto ដែលផ្តល់ប្រាក់កាសសម្រាប់កម្មវិធីអាវុធមហាប្រល័យរបស់ពួកគេ។
តែប្រទេស ៣១ មានរួមសហរដ្ឋអាមេរិក ជប៉ុន សាធារណរដ្ឋកូរ៉េ និងប្រទេសជាតិរាប់សិបទៀតនៅទូទាំងពិភពលោក កាលពីពេលថ្មីៗនេះបានបង្វែរការយកចិត្តទុកដាក់របស់ពួកគេទៅលើការរំលោភលើសិទ្ធិមនុស្សរងគ្រោះដោយក្រុមជនរស់នៅក្នុងសាធារណរដ្ឋប្រជាធិបតេយ្យប្រជាមានិតកូរ៉េ ហើយពួកគេបានចេញផ្សាយសេចក្តីថ្លែងការណ៍រួមគ្នាមួយអំពីបញ្ហានេះ។ ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាជាតិលោកស្រី Linda Thomas-Greenfield បានថ្លែងអំពីសេចក្តីថ្លែងការណ៍រួមនេះបន្ទាប់ពីការប្រជុំបិទទ្វារនៃក្រុមប្រឹក្សាសន្តិសុខអង្គការសហប្រជាជាតិ។
ក្នុងនាមប្រទេសទាំង៣១នេះ លោកស្រីឯកអគ្គរដ្ឋទូតអាមេរិក Linda Thomas-Greenfield បានកត់សម្គាល់ថា រដ្ឋាភិបាលនៃសាធារណរដ្ឋ DPRK ជា«អ្នករំលោភមួយក្នុងបណ្តាពួកអ្នករំលោភអាក្រក់បំផុត»លើសិទ្ធិមនុស្សនៅក្នុងពិភពលោក។ មនុស្សជាង១សែននាក់ត្រូវបានចាប់ឃុំឃាំងនៅក្នុងជំរំគុកនយោបាយដែលនៅទីនោះពួកគេរងគ្រោះដោយសារការរំលោភផ្សេងៗមានរួមការធ្វើទារុណកម្ម ការបង្ខំឱ្យធ្វើការជាទម្ងន់ ការប្រហារជីវិត ទូរភិក្ស និងអំពើហិង្សាផ្អែកលើយេនឌ័រ។
លោកស្រីបាននិយាយថា «ក្រុមជនដែលមិនឋិតនៅក្នុងជំរំគុកនយោបាយត្រូវបានបដិសេធសិទ្ធិមនុស្សជាមូលដ្ឋាន មានរួមសេរីភាពខាងការនិយាយស្តីបញ្ចេញមតិ ខាងការទទួលព័ត៌មាន និងសេរីភាពខាងការគិតពិចារណាផងដែរ»។
ពលរដ្ឋមកពីប្រទេសឯទៀតៗក៏បានរងគ្រោះដោយសារការរំលោភ មានរួមការប្រហារជីវិត ការសម្លាប់ ការតាមឃ្លាំមើល ការធ្វើទុក្ខបុកម្នេញ ការចាប់ពង្រត់ និងការបង្ខំឱ្យទៅប្រទេសពួកគេវិញ។ ក្នុងនាមនៃពួកអ្នកតំណាងដូចលោកស្រី លោកស្រីឯកអគ្គ រដ្ឋទូត Thomas-Greenfield បានសម្តែងកង្វល់ជាពិសេសអំពីស្ថានភាពសិទ្ធិមនុស្សនៃពួកពលរដ្ឋសាធារណរដ្ឋកូរ៉េដែលត្រូវបានឃុំឃាំងនៅក្នុងសាធារណរដ្ឋ DPRK ការចាប់ពង្រត់ និងការបាត់ខ្លួនដោយបង្ខំនៃក្រុមពលរដ្ឋជប៉ុននិងសាធារណរដ្ឋកូរ៉េ និងអំពីពួកអ្នកទោសសង្គ្រាមដែលមិនត្រូវបានបញ្ជូនទៅប្រទេសពួកគេវិញ។
សេចក្តីថ្លែងការណ៍ដោយពួកអ្នកតំណាងទាំង៣១បានកត់សម្គាល់ថា ការរំលោភលើសិទ្ធិមនុស្សរបស់របបគ្រប់គ្រងនេះដែលកំពុងមានធ្វើ«មានជាប់ទាក់ទងជាមួយកម្មវិធីអាវុធខុសច្បាប់និងនាំឱ្យមានអស្ថិរភាពរបស់ប្រទេសកូរ៉េខាងជើង»។ ប្រព័ន្ធបង្ខិតបង្ខំរបស់របបគ្រប់គ្រងនេះបានបង្វែរប្រភពធនធានទៅកាន់ការអភិវឌ្ឍន៍អាវុធ ទោះជាពលរដ្ឋកូរ៉េខាងជើងរងទុក្ខដោយសារការពិបាកខាងសេដ្ឋកិច្ចធ្ងន់ធ្ងរ និងការខ្វះអាហារូបត្ថម្ភក៏ដោយ។
ពួកអ្នកតំណាងប្រទេសទាំងនេះបានថ្លែងថា «ពិភពលោកទំនើបគ្មានកន្លែងសម្រាប់អំពើឃោរឃៅបែបនេះទេ។ យើងសរសើរ និងគាំទ្រការប្រឹងប្រែងទាំងអស់ដើម្បីឱ្យក្រុមអ្នកប្រព្រឹត្តល្មើសមានការទទួលខុសត្រូវដល់សកម្មភាពរបស់ពួកគេ»។
សេចក្តីថ្លែងការណ៍នេះចែងថា «ការគំរាមកំហែងលើសិទ្ធិមនុស្សទាំងនេះគំរាមកំហែងសន្តិភាពនិងសន្តិសុខអន្តរជាតិ ហើយដល់ពេលវេលាហើយសម្រាប់ឱ្យក្រុមប្រឹក្សាសន្តិសុខដោះស្រាយបញ្ហានេះជាសាធារណៈ។ យើងសុំដល់សមាជិកទាំងអស់នៃក្រុមប្រឹក្សាសន្តិសុខឱ្យគាំទ្រការនិយាយត្រួសៗដោយចំហមួយនៅឆ្នាំ២០២៣ដែលនៅពេលនោះយើងអាចពិភាក្សាគ្នាអំពីការរំលោភលើសិទ្ធិមនុស្សនិងការរំលោភឯទៀតៗប្រព្រឹត្តដោយអាជ្ញាធរនៃសាធារណរដ្ឋប្រជាមានិតកូរ៉េ ការប៉ះពាល់ដល់សន្តិ ភាពនិងសន្តិសុខ និងស្វែងរកវិធីបញ្ចូលសិទ្ធិមនុស្សទៅក្នុងការទូតសន្តិភាពនិងសន្តិសុខនៅក្នុងឧបទ្វីបកូរ៉េ»៕
បទវិចារណកថា៖ ការរំលោភសិទ្ធិមនុស្សដោយសាធារណរដ្ឋប្រជាធិបតេយ្យប្រជាមានិតកូរ៉េគំរាមកំហែងសន្តិសុខអន្តរជាតិ
រូបឯកសារ៖ នៅក្នុងការក្លែងធ្វើមួយ ទាហានកូរ៉េខាងត្បូងម្នាក់បានទទួលបទពិសោធន៍នូវស្ថានភាពដែលត្រូវបានឃុំនៅក្នុងគុកក្នុងកូរ៉េខាងជើងនៅឯការតាំងពិព័រណ៍សង្គ្រាមកូរ៉េនៅក្នុងប្រទេសកូរ៉េខាងត្បូង។