តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ប្រទេសអែលសាល់វ៉ាឌ័រ ក្វាតេម៉ាឡា និងហុងឌូរ៉ាសមានអំពើហិង្សា អំពើពុករលួយនិងការលូតលាស់សេដ្ឋកិច្ចមានកម្រិត ដែលនាំឱ្យមានជនចំណាកស្រុកមិនធម្មតាពីប្រទេសទាំងនេះ មកកាន់សហរដ្ឋអាមេរិក។ បន្ថែមពីលើនេះ ប្រទេសទាំងបីនេះ ស្ថិតនៅក្នុងអ្វីដែលគេស្គាល់ថា ជា«តំបន់របៀងរាំងស្ងួត» ដែលជាតំបន់ព្រៃត្រូពិកសោះកក្រោះនៅតាមឆ្នេរមហាសមុទ្រប៉ាស៊ីហ្វិកនៃតំបន់កណ្តាលទ្វីបអាមេរិកដែលអាចរងគ្រោះដោយងាយដោយសារការប្រែប្រួលអាកាសធាតុ។ កាលពីខែវិច្ឆិកា ប្រទេសក្វាតេម៉ាឡា និងហុងឌូរ៉ាស មានខ្យល់ព្យុះសង្ឃរាពីរ គឺខ្យល់ព្យុះ Eta និង Iota។ ហេតុការណ៍ទាំងនេះ បានរួមចំណែកដល់ការខាតបង់ខ្លាំងដល់គ្រួសាររាប់លាននិងនាំឱ្យមានការខូចខាតច្រើនដល់កសិកម្មផងដែរ ជាពិសេស ក្នុងការធ្វើកសិកម្មខ្នាតតូចសម្រាប់តែមួយរស់ ដោយកាន់តែបង្កឲ្យមានអសន្តិសុខស្បៀងខ្លាំងឡើង។
ទីភ្នាក់ងារអភិវឌ្ឍអន្តរជាតិសហរដ្ឋអាមេរិក (USAID) ផ្តល់ប្រាក់ប្រមាណ១១២លាន ដុល្លារក្នុងជំនួយមនុស្សធម៌ ដើម្បីជួយស្រោចស្រង់ជីវិតមនុស្ស សម្រាប់ជំនួយម្ហូបអាហារគ្រាមានអាសន្ន សេវាកម្មអាហារូបត្ថម្ភ ទឹកស្អាតសម្រាប់បរិភោគ ទីជម្រក កម្មវិធីធ្វើឱ្យមានប្រាក់ចំណូល និងកិច្ចខិខំប្រឹងប្រែងកាត់បន្ថយហានិភ័យនៅក្នុងប្រទេសទាំងបីនេះ។ បន្ថែមលើនេះ ពីឆ្នាំសាពើពន្ធ២០១៨ ដល់ឆ្នាំ២០២០ ការិយាល័យខាងកិច្ចការប្រជាពលរដ្ឋ ជនភៀសខ្លួន និងចំណាកស្រុកនៃក្រសួងការបរទេសសហរដ្ឋអាមេរិក បានផ្តល់ប្រាក់២៤៨លានដុល្លារក្នុងជំនួយមនុស្សធម៌សម្រាប់ការឆ្លើយតបរបស់ប្រទេសម៉ិកស៊ិក និងតំបន់កណ្តាលនៃទ្វីបអាមេរិក ដើម្បីដោះស្រាយសេចក្តីត្រូវការរបស់ក្រុមជនភៀសខ្លួន ពួកអ្នកស្វះស្វែងសុំសិទ្ធិជ្រកកោន ក្រុមមនុស្សខ្ចាត់ព្រាត់នៅខាងក្នុងប្រទេសហៅកាត់ថា IDPs ព្រមទាំងដល់ពួកជនចំណាកស្រុកដែលអាចរងគ្រោះ ដោយមានរួមបញ្ចូលការឆ្លើយតបដល់វិបត្តិកូវីដ១៩ក្នុងឆ្នាំសារពើពន្ធ ២០២០ ផងដែរ។ ក្នុងចំនួនទឹកប្រាក់នេះ ប្រាក់ជិត៨៥លានដុល្លារគាំទ្រសកម្មភាពក្នុងប្រទេសអែលសាវ៉ាឌ័រ ក្វាតេម៉ាឡា និងហុងឌូរ៉ាស។
បន្ថែមលើនេះ ទីភ្នាក់ងារ USAID បានបញ្ជូនក្រុមឆ្លើយតបខាងជំនួយគ្រាមានមហន្តរាយ ហៅកាត់ថា DART ទៅកាន់តំបន់នោះផងដែរ។ ក្រុមអ្នកជំនាញនេះ នឹងវាយតម្លៃការខូចខាត សេចក្រីត្រូវការជាអាទិភាព សម្របសម្រួលជាមួយពួកដៃគូ និងពួកមន្ត្រីក្នុងមូលដ្ឋាន ហើយផ្តល់ជំនួយដែលត្រូវការជាបន្ទាន់ដល់ក្រុមគ្រួសារមានផលប៉ះ ពាល់ដោយសារវិបត្តិ និងសហគមន៍ក្នុងប្រទេសទាំងនេះ។
ជំនួយមនុស្សធម៌ផ្តល់ដោយរដ្ឋាភិបាលសហរដ្ឋអាមេរិកតាមរយៈទីភ្នាក់ងារ USAID និងក្រសួងការបរទេសសហរដ្ឋអាមេរិក ជាការបន្ថែមលើកម្មវិធីសហរដ្ឋអាមេរិកសម្រាប់ការអភិវឌ្ឍន៍ក្នុងរយៈពេលយូរក្នុងតំបន់នោះ។ សកម្មភាពបែបនេះ ត្រូវរៀបចំឡើងដើម្បីដោះស្រាយបុព្វហេតុជាឬសគល់នៃជនចំណាកស្រុកមិនធម្មតា និងការខ្ចាត់ព្រាត់ពីផ្ទះសំបែងដោយបង្ខំនៅក្នុងប្រទេសអែលសាល់វ៉ាឌ័រ ក្វាតេម៉ាឡា និងហុងឌូរ៉ាស់។ ជាផ្នែកនៃកម្មវិធីទាំងនេះ USAID ធ្វើការជាមួយរដ្ឋាភិបាល សង្គមស៊ីវិល និងវិស័យឯកជនក្នុងតំបន់ដើម្បីពង្រឹងឱកាសសេដ្ឋកិច្ច ពង្រឹងអភិបាលកិច្ចនិងសន្តិសុខ និងកសាងភាពមិនទ្រុឌទ្រោមខ្លាំងជាងមុនដល់ការប្រែប្រូលធាតុអាកាស។
ការជួយក្រុមជនខ្វះខាត ជាគុណតម្លៃស្នូលរបស់អាមេរិកាំង ហើយសហរដ្ឋអាមេរិកនៅតែប្តេជ្ញាជួយប្រជារាស្ត្រនៃប្រទេសអែលសាល់វ៉ាឌ័រ ក្វាតេម៉ាឡា និងហុងឌូរ៉ាស ឱ្យកែលម្អស្ថានភាពរបស់ពួកគេដើម្បីឱ្យពួកគេអាចកសាងជីវិតពួកគេដោយមានការទុកចិត្តនៅក្នុងប្រទេសពួកគេ៕