តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
នៅក្នុងសន្និសីទស្តីពីការស្តារឡើងវិញរបស់អ៊ុយក្រែននៅទីក្រុងឡុងដ៍ រដ្ឋមន្ត្រីការបរទេសស.រ.អ.លោក Antony Blinken បានប្រកាសថា ស.រ.អ.នឹងផ្តល់ជំនួយបន្ថែមជាង១,៣ពាន់លានដុល្លារដើម្បីជួយអ៊ុយក្រែនឱ្យស្តារប្រទេសជាតិឡើងវិញពីការលុកលុយដ៏ឃោរឃៅនិងកំពុងបន្តរបស់រុស្ស៊ី។
លោកបាននិយាយថា៖ «ការស្តារឡើងវិញគឺមានលើសពីការធ្វើឱ្យប្រាកដប្រជាថា ប្រជារាស្ត្រមានអ្វីៗដែលពួកគេត្រូវការដើម្បីរស់នៅ...ការរើបឡើងវិញគឺជាការចាក់គ្រឹះសម្រាប់ឱ្យអ៊ុយក្រែនចម្រើនលូតលាស់ល្អប្រសើរជាប្រទេសឯករាជ្យមួយមានសន្តិសុខ ចូលរួមពេញលេញជាមួយអឺរ៉ុប ទាក់ទងនឹងផ្សារនៅទូទាំងពិភពលោក ជាប្រទេសប្រជាធិបតេយ្យមួយចាក់ឫសតាមនីតិរដ្ឋ ជាកន្លែងមួយដែលជនជាតិអ៊ុយក្រែនទាំងអស់គ្នាមានសេចក្តីថ្លៃថ្នូរ សិទ្ធិមនុស្ស និងឱកាសដើម្បីសម្រេចសក្តានុពលពេញលេញរបស់ពួកគេ»។
ដើម្បីសម្រេចគោលដៅនេះ ប្រាក់ចំនួន ៥២០ លានដុល្លារនៃជំនួយបន្ថែមរបស់ស.រ.អ.នេះនឹងធ្វើវិនិយោគក្នុងការជួយកែលម្អវិស័យថាមពល ប្រាក់ចំនួន ៦៥៧ លានដុល្លារនឹងត្រូវប្រើសម្រាប់ជួយធ្វើឱ្យការឆ្លងកាត់ព្រំដែន ផ្លូវរទេះភ្លើង កំពង់ផែនិងហេដ្ឋារចនាសម្ព័ន្ធសំខាន់ៗឯទៀតៗនៃប្រទេសអ៊ុយក្រែនមានភាពទំនើប។
លោក Blinken បានពោលថា៖ «យើងនឹងផ្តល់ប្រាក់បន្ថែម ១០០ លានដុល្លារទៀតសម្រាប់ធ្វើឱ្យប្រព័ន្ធគយនិងប្រព័ន្ធឯទៀតៗនៃប្រទេសអ៊ុយក្រែនតភ្ជាប់អ៊ីនធឺណិត និងកាត់បន្ថយអំពើពុករលួយ។ ហើយយើងនឹងផ្តល់ប្រាក់ ៣៥ លានដុល្លារដើម្បីជួយធុរកិច្ចនិងពួកសហគ្រិនអ៊ុយក្រែនតាមរយៈការផ្តល់ប្រាក់និងការធានារ៉ាប់រងដែលកាត់បន្ថយការប្រថុយប្រថានសម្រាប់ក្រុមអ្នកបណ្តាក់ទុនក្នុងប្រទេសអ៊ុយក្រែន»។
ការគាំទ្រថ្មីនេះមានឡើងបន្ថែមលើប្រាក់ជាង២០ពាន់លានដុល្លារដែលស.រ.អ.បានផ្តល់ឱ្យក្នុងជំនួយសេដ្ឋកិច្ចនិងជំនួយអភិវឌ្ឍន៍ដល់ក្រុមអ្នកធ្វើការនិងអាជីវករអ៊ុយក្រែន និងបន្ថែមលើប្រាក់ជាង ២,១ ពាន់លានដុល្លារក្នុងជំនួយមនុស្សធម៌ដែលស.រ.អ.ផ្តល់ឱ្យប្រទេសនេះ។
លោករដ្ឋមន្ត្រី Blinken បានមានប្រសាសន៍ថា៖ «បន្ថែមលើជំនួយសេដ្ឋកិច្ចនិងអភិវឌ្ឍន៍និងជំនួយមនុស្សធម៌ ស.រ.អ.នឹងបន្តបណ្តាក់ទុនក្នុងការប្រឹងប្រែងរយៈពេលយូររបស់អ៊ុយក្រែនដើម្បីពង្រឹងអភិបាលកិច្ចល្អ តម្លាភាព ការទទួលខុសត្រូវខ្ពស់។ យើងនឹងពង្រឹងវិស័យយុត្តិធម៌និងស្ថាប័នប្រឆាំងនឹងអំពើពុករលួយ ពង្រឹងសង្គមស៊ីវិលនិងសារព័ត៌មានសេរីរបស់ប្រទេសនេះ...រដ្ឋាភិបាលអ៊ុយក្រែនបានប្រឹងប្រែងក្នុងការពង្រឹងស្ថាប័នទាំងនេះ ទោះជាខ្លួនប្រយុទ្ធដើម្បីការរស់របស់ខ្លួនក៏ដោយ»។
លោករដ្ឋមន្ត្រី Blinken បានគូសបញ្ជាក់ថា ជាការមានសារៈសំខាន់ដែលពិភពលោកនឹងនឹកឃើញហេតុដូចម្តេចបានជាអ៊ុយក្រែនត្រូវការការកសាងនិងការរើបឡើងវិញ។ លោកបានពោលថា៖ «រុស្ស៊ីបានបំផ្លិចបំផ្លាញប្រទេសអ៊ុយក្រែន ហើយរុស្ស៊ីនឹងត្រូវបង់សោហ៊ុយនៃការកសាងប្រទេសអ៊ុយក្រែនជាថ្មីឡើងវិញ»។
លោករដ្ឋមន្ត្រី Blinken បានប្រកាសថា៖ «រហូតដល់ពេលនោះ យើងនឹងបន្តឈរជាមួយប្រជារាស្ត្រអ៊ុយក្រែន នៅពេលពួកគេធ្វើពលិកម្មដ៏ធំបំផុតដើម្បីការពារ កសាងជាថ្មីនិងគិតគូរប្រទេសពួកគេជាថ្មីឡើងវិញ»៕