តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ការវាយប្រហារដោយខុសច្បាប់របស់ប្រទេសរុស្ស៊ីលើប្រទេសអ៊ុយក្រែន ប្រាកដជាមានផលប៉ះពាល់អវិជ្ជមាននៅទូទាំងពិភពលោក។ ប្រទេសដែលមិនទាក់ទិននឹងសង្គ្រាមនេះក៏បានរងការលំបាកដែរ។ ការឈ្លានពាននេះ នាំឱ្យមាន«ការទង្គុកទង្គើខ្លាំង និងជាប្រវត្តិសាស្ត្រក្នុងវិស័យថាមពល» ក្នុងទីផ្សារសាកល ហើយជាកត្តាមួយក្នុងចំណោមកត្តាធំៗដែលនាំឱ្យការលូតលាស់សេដ្ឋកិច្ចកាលពីឆ្នាំទៅ ថមថយមកនៅតែ ៣,១% ប៉ុណ្ណោះ។ នេះបើតាមរបាយការណ៍មួយចេញផ្សាយដោយអង្គការកិច្ចសហប្រតិបត្តិការសេដ្ឋកិច្ច និងការអភិវឌ្ឍកាលពីខែវិច្ឆិកា ឆ្នាំ២០២២។
អ្វីដែលធ្ងន់ធ្ងរជាងនេះ គឺផលវិបាកសម្រាប់មនុស្សដែលត្រូវការជំនួយស្បៀងអាហារ។ នៅពេលផ្នែកខ្លះនៃទ្វីបអាហ្វ្រិកនិងមជ្ឈិមបូព៌ាប្រឈមនឹងវិបត្តិស្បៀងអាហារមិនធ្លាប់មានពីពេលមុន រុស្ស៊ីបានរារាំងសមត្ថភាពរបស់អ៊ុយក្រែនក្នុងការដាំដុះដំណាំអាហារ និងដឹកជញ្ជូនកសិផលចេញពីកំពង់ផែសមុទ្រខ្មៅរបស់ខ្លួន។
ប៉ុន្តែគ្មាននរណារងទុក្ខវេទនាជាងក្រុមជនស៊ីវិលអ៊ុយក្រែនដែលស្ថិតនៅក្រោមការវាយប្រហារដោយចេតនារបស់កងយោធារុស្ស៊ីក្នុងសង្គ្រាមនេះទេ។ ក្នុងពេល១៤ខែកន្លងទៅនេះ ការិយាល័យអគ្គស្នងការអ.ស.ប.ខាងសិទ្ធិមនុស្សបានកត់ត្រាថា ជនស៊ីវិលជិត២ម៉ឺន ៤ពាន់នាក់បានស្លាប់។ តែយ៉ាងណាក៏ដោយក៏ទីភ្នាក់ងារ UNHCR កត់សម្គាល់ថា តួលេខពិតប្រាកដមានច្រើនជាងនេះ។
អ្នកតំណាងបម្រុងរបស់ស.រ.អ.ខាងកិច្ចការនយោបាយពិសេសនៅអ.ស.ប.លោក Robert Wood បាននិយាយថា «គ្មានប្រទេសណាមួយបង់ខាតច្រើនជាងប្រទេសអ៊ុយក្រែនទេ។ ក្រោយពេល១៤ខែ...យើងមិនទាន់បានបញ្ចប់ការរងទុក្ខខាងមនុស្សធម៌បណ្តាលមកពីសង្គ្រាមគ្មានការបង្ករឿងរបស់រុស្ស៊ីប្រឆាំងនឹងអ៊ុក្រែននៅឡើយទេ។ ការស្លាប់កើនឡើងដោយសារការវាយប្រហារដោយមីស៊ីលនិងដ្រូនរបស់រុស្ស៊ីលើមជ្ឈមណ្ឌលជនស៊ីវិលនៅអ៊ុយក្រែន»។
លោក Wood បាននិយាយថា «ពីថ្ងៃទី១ ដល់ថ្ងៃទី៤ ខែឧសភា រុស្ស៊ីបានវាយប្រហារតាមអាកាសចំនួន ១៤៥ លើកនៅទូទាំងអ៊ុយក្រែន។ ការវាយប្រហារទាំងនេះមានន័យថា ជាមធ្យមមានការវាយប្រហារដោយមីស៊ីល ដ្រូន ឬគ្រាប់បែកលើសពីមួយដង ជារៀងរាល់ម៉ោង ក្នុងរយៈពេល២៤ម៉ោងក្នុងមួយថ្ងៃ បីថ្ងៃជាប់ៗគ្នា។ ក្នុងពេលតែបីថ្ងៃនោះ ការវាយប្រហាររបស់រុស្ស៊ីបានសម្លាប់ និងធ្វើឱ្យរបួសជនស៊ីវិលជាង១០០នាក់ មានរួមទាំងកូនក្មេងយ៉ាងតិច ៥ នាក់ផងដែរ»។
លោកឯកអគ្គរដ្ឋទូត Wood បានថ្លែងថា នៅពេលជាមួយគ្នានេះ «អង្គការមនុស្សធម៌បានរាយការណ៍អំពីស្ថានភាពអាក្រក់ជាងមុនក្នុងតំបន់ជួរមុខ ហើយនាំឱ្យខ្វះអគ្គិសនី ស្បៀងអាហារ និងប្រេងឥន្ធនៈ ដែលជារបស់ត្រូវការចាំបាច់»។
លោកបានពោលថា «ការបង្កើនការវាយប្រហាររបស់លោកប្រធានាធិបតី Vladimir Putin លើហេដ្ឋារចនាសម្ព័ន្ធសំខាន់ៗរបស់អ៊ុយក្រែន គឺគំរាមកំហែងដល់យើងទាំងអស់គ្នា...រុស្ស៊ីមិនយកចិត្តទុកដាក់សម្រាលផលប៉ះពាល់នៃសង្គ្រាមរបស់ខ្លួនប្រឆាំងនឹងអ៊ុយក្រែនទេ ដូចគ្នានឹងការដែលប្រទេសនេះមិនបានបង្ហាញការយកចិត្តទុកដាក់ពិតប្រាកដក្នុងកិច្ចចរចា ឬការទូត»។
លោកឯកអគ្គរដ្ឋទូត Wood បានមានប្រសាសន៍ថា «ជាថ្មីទៀត យើងអំពាវនាវឱ្យរុស្ស៊ីបញ្ឈប់ការវាយប្រហាររបស់ខ្លួនលើពលរដ្ឋអ៊ុយក្រែន និងដកកងកម្លាំងខ្លួនទាំងស្រុងចេញពីដែនដីអ៊ុយក្រែន។ មានតែរុស្ស៊ីទេ ដែលមានអំណាចបញ្ឈប់សង្គ្រាមនេះដែលខ្លួនបានចាប់ផ្តើមធ្វើដោយឥតសមហេតុផលនោះ»៕
បទវិចារណកថា៖ ការបង់ខាតច្រើនដល់សកម្មភាពប្រទេសរុស្ស៊ី
