តទៅនេះ គឺជាបទវិចារណកថាដែលឆ្លុះបញ្ចាំងអំពីឧត្តមគតិ និងស្ថាប័នអាមេរិកាំង
នៅថ្ងៃចន្ទ សប្តាហ៍ទី៣ក្នុងខែកុម្ភៈ ប្រជាពលរដ្ឋអាមេរិកាំងប្រារព្ធទិវាប្រធានាធិបតី។ ទិវាប្រធានាធិបតីនេះជាការរំឭកការទទួលស្គាល់ប្រធានាធិបតីគ្រប់រូបរបស់សហរដ្ឋអាមេរិក ទាំងក្នុងពេលអតីតកាលនិងពេលបច្ចុប្បន្ន ជាពិសេសគឺលោក George Washington និងលោក Abraham Lincoln ដែលថ្ងៃកំណើតរបស់ពួកអស់លោកមានគម្លាតពីគ្នាត្រឹមតែ១០ថ្ងៃប៉ុណ្ណោះ គឺលោក Washington បានកើតនៅថ្ងៃទី២២ ខែកុម្ភៈ និងលោក Lincoln បានកើតនៅថ្ងៃទី១២ ខែកុម្ភៈ។
ទោះជាយ៉ាងនេះក៏ដោយ ការប្រារព្ធទិវានេះលើកដំបូងនិងជាបន្តបន្ទាប់ ការទទួល ស្គាល់ជាផ្លូវការនូវថ្ងៃឈប់សម្រាកក្នុងឆ្នាំ១៩៧១ មិនបានប្តូរឈ្មោះថ្ងៃកំណើតរបស់លោក Washington ទៅជាទិវាប្រធានាធិបតីនោះទេ ហើយក៏មិនបានប្រារព្ធដល់លោក Lincoln ដែរ។ វាគឺជាថ្ងៃសម្តែងការដឹងគុណ និងការទទួលស្គាល់ប្រធានាធិបតីទី១ របស់ប្រទេស គឺលោក George Washington។
លោក George Washington បានដឹកនាំកងទ័ពឧទ្ទាមប្រយុទ្ធឈ្នះសង្គ្រាមដែលបានទទួលឯករាជ្យពីការគ្រប់គ្រងរបស់អង់គ្លេស។ លោកទទួលបានប្រជាប្រិយភាពយ៉ាងខ្លាំង។ ការប្រារព្ធថ្ងៃខួបកំណើតរបស់លោកដែលត្រូវបានកត់ត្រាទុកនោះគឺនៅឆ្នាំ ១៧៧៨ នៅជំរំរដូវរងារបស់កងទ័ពឧទ្ទាមនៅតំបន់ Valley Forge ដែលនៅមិនឆ្ងាយពីទីក្រុង Philadelphia។ នៅពេលនោះ អ្នកវាយស្គរ និងអ្នកផ្លុំខ្លុយមួយក្រុមបានធ្វើការប្រគុំតន្ត្រីសម្រាប់ថ្ងៃខួបកំណើតរបស់លោកនៅខាងមុខទីស្នាក់ការរបស់លោក។ ក្រោយមក លោក Washington បាននិយាយថា ការប្រារព្ធពិធីនេះ «បានចាប់ផ្តើមក្នុងលក្ខណៈជាការប្រមាថដល់ព្រះមហាក្សត្រ George (ព្រះមហាក្សត្ររបស់ចក្រភពអង់គ្លេសនាពេលនោះ)»។
លោក Washington មិនមែនជាអ្នកដែលស្វះស្វែងរកឱ្យមានការគោរពនិងអបអរសាទរដល់រូបលោកនោះទេ ក៏ប៉ុន្តែលោកបានយល់ពីភាពចាំបាច់សម្រាប់អ្នកដឹកនាំដែលត្រូវមានបុគ្គលលក្ខណៈជាអ្នកបង្រួបបង្រួម ជាបុគ្គលដែលអាចប្រមូលផ្តុំប្រជាពលរដ្ឋ និងជំរុញឱ្យពួកគេធ្វើការរួមគ្នាដើម្បីភាពល្អប្រសើររបស់ប្រទេសថ្មី។
ពលរដ្ឋអាមេរិកបានប្រារព្ធខួបកំណើតរបស់លោក Washington ដោយមិនផ្លូវការក្នុងរយៈពេលប៉ុន្មានឆ្នាំបន្ទាប់ពីលោកបានទទួលមរណភាពនៅឆ្នាំ១៧៩៩។ នៅខែកុម្ភៈ បានក្លាយជាថ្ងៃបុណ្យជាតិនៅឆ្នាំ១៨៧៩ ហើយច្បាប់ផ្លាស់ប្តូរការប្រារព្ធទិវានេះទៅថ្ងៃចន្ទនៃសប្តាហ៍ទីបីក្នុងខែកុម្ភៈ បានចូលជាធរមាននៅឆ្នាំ១៩៧១។
លោក Washington បានធ្វើជាគំរូសម្រាប់មេដឹកនាំទាំងឡាយណាដែលបន្តវេនពីលោកនៅក្នុងដំណែងដ៏ខ្ពស់បំផុតរបស់ប្រទេស។ លោកបានបង្កើតប្រព័ន្ធហិរញ្ញវត្ថុហើយបានដឹកនាំសហរដ្ឋអាមេរិកដែលជាប្រទេសក្មេងខ្ចីមួយតាមរយៈការតស៊ូយ៉ាងស្វិតស្វាញដើម្បីជម្នះការលំបាក ដែលមិនយូរប៉ុន្មានបានផ្តល់កំណើតដល់រដ្ឋាភិបាលមួយដែលមានស្ថិរភាព ប្រជាធិបតេយ្យ និងគោរពច្បាប់។ តាមរយៈការចាកចេញពីតំណែងដោយស្ម័គ្រចិត្ដ បន្ទាប់ពីកាន់តំណែងរយៈពេលពីរអាណត្តិដោយក្នុងមួយអាណត្តិមានរយៈពេល៤ឆ្នាំ ហើយនឹងតាមរយៈការធានានូវការផ្ទេរអំណាចដោយសន្តិវិធីទៅឱ្យមេដឹកនាំដែលត្រូវបានជ្រើសរើសឱ្យបន្តតំណែងនោះ លោក George Washington បានធ្វើជាគំរូដ៏សំខាន់មួយសម្រាប់ប្រធានាធិបតីនាពេលអនាគតទាំងអស់៕