តទៅនេះ គឺជាបទវិចារណកថាដែលឆ្លុះបញ្ចាំងឱ្យឃើញនូវទស្សនៈរបស់រដ្ឋាភិបាលសហរដ្ឋអាមេរិក
កាលពីថ្ងៃទី១ ខែកុម្ភៈ ឆ្នាំ២០២១ បន្ទាប់ពីការចាញ់ការបោះឆ្នោតជាតិភ្លូកទឹកភ្លូកដី យោធាភូមាឬមីយ៉ាន់ម៉ាបានធ្វើរដ្ឋប្រហារ។ ពួកគេបានចាប់ខ្លួនពួកមេដឹកនាំស៊ីវិលដែលជាប់ឆ្នោត និងបានបង្ក្រាបលើការតវ៉ាប្រឆាំងដោយសន្តិវិធីដែលបានកើតមានឡើងបន្ទាប់។
ចាប់តាំងពីនោះមក របបយោធាបានប្រើប្រាស់វិធីហិង្សាកើនឡើងដើម្បីគាបសង្កត់លើប្រជាពលរដ្ឋខ្លួនឯង ធ្វើបាបយ៉ាងព្រៃផ្សៃបំផុតលើជនជាតិភាគតិច។
ដើម្បីរំឭកខួបដ៏អាក្រក់នេះ កាលពីថ្ងៃទី៣១ ខែមករា ប្រទេសអូស្ត្រាលី កាណាដា សហភាពអឺរ៉ុប សាធារណរដ្ឋកូរ៉េ ចក្រភពអង់គ្លេស និងសហរដ្ឋអាមេរិកបានចេញសេចក្តីថ្លែងការណ៍រួមមួយថ្កោលទោសការផ្ទួលរំលំនៃរដ្ឋាភិបាលជាប់ឆ្នោតតាមប្រជាធិបតេយ្យ និងសកម្មភាពជារឿយៗនៃរបបផ្តាច់ការយោធាដែលបានកើតឡើងជាបន្ទាប់។
សេចក្តីថ្លែងការណ៍រួមនោះបានបញ្ជាក់ថា«យើងថ្កោលទោសដោយទម្រង់យ៉ាងខ្លាំងបំផុតនៃអំពើហិង្សារាលដាលកាន់តែខ្លាំងឡើងរបស់របបយោធាភូមាដែលធ្វើឱ្យគ្រោះថ្នាក់ដល់ជនស៊ីវិល រួមទាំងការរំលោភសិទ្ធិមនុស្ស ហិង្សាផ្អែកលើសេពសន្ធវៈនិងយេនឌ័រ និងការធ្វើទុក្ខបុកម្នេញនិងការរើសអើងជាប្រព័ន្ធប្រឆាំងសាសនានិងជនជាតិភាគតិចទាំងអស់។ ការវាយប្រហារតាមអាកាសរបស់យោធាកំពុងសម្លាប់ជនស៊ីវិល បំផ្លាញសាលារៀន ផ្សារ ទីកន្លែងសក្ការៈបូជានិងមន្ទីរពេទ្យ ដោយមានការកើនឡើងជិត២៥ដងចាប់តាំងពីឆ្នាំ២០២១ មកដែលការណ៍នេះតំណាងឱ្យការវាយប្រហារជាមធ្យមចំនួន៣ដងក្នុងមួយថ្ងៃ។ ការកើនឡើងនៅក្នុងការវាយប្រហារតាមអាកាសក្នុងតំបន់មួយចំនួនដែលមិនមានជម្លោះបានកត់សម្គាល់នៃការរាលដាលដ៏ច្បាស់ក្រឡែតដោយយោធា»។
សេចក្តីថ្លែងការណ៍រួមនោះបានជំរុញឱ្យយោធាភូមាបន្ធូរបន្ថយហិង្សា អនុញ្ញាតឱ្យផ្គត់ផ្គង់និងចែកចាយជំនួយមនុស្សធម៌នៅទូទាំងប្រទេសនិងផ្តល់អាទិភាពការពារជនស៊ីវិល ខណៈដែលប្រកាន់ខ្ជាប់ឱ្យបានពេញលេញដល់ច្បាប់មនុស្សធម៌អន្តរជាតិ និងច្បាប់សិទ្ធិមនុស្សអន្តរជាតិ។
តាមអង្គការសហប្រជាជាតិ ក្នុងរយៈពេល៤ឆ្នាំនេះចាប់តាំងពីរដ្ឋប្រហារមក តម្រូវការជំនួយមនុស្សធម៌បានកើនឡើង២០ដង។ ជាង១ភាគ៣នៃប្រជាពលរដ្ឋដែលប្រហែល១៩លាន៩សែននាក់ឥឡូវនេះត្រូវការជំនួយមនុស្សធម៌ដើម្បីបំពេញតម្រូវការសំខាន់ ៗរបស់ពួកគេ។ មនុស្ស១៥លាន២សែននាក់ផ្សេងទៀតកំពុងត្រូវការជំនួយម្ហូបអាហារ ខណៈដែលឧបទ្ទវហេតុនៃជំងឺដែលអាចរារាំងបានកំពុងកើនឡើង។ ពលរដ្ឋភូមារាប់លាននាក់គ្មានទីកន្លែងរស់នៅ ទាំងនៅក្នុងប្រទេសនិងក្រៅប្រទេសភូមា។
ក្នុងពេលដ៏សំខាន់នេះ ឧក្រិដ្ឋកម្មឆ្លងកាត់ប្រទេស រួមមានផលិតផលនិងការជួញដូរថ្នាំញៀនណាកូទិក មជ្ឈមណ្ឌលបោកប្រាស់តាមអនឡាញនិងការជួញដូរមនុស្សកំពុងកើនឡើង។
សេចក្តីថ្លែងការណ៍រួមនោះបានបន្តទៀតថា«មាគ៌ានៅពេលបច្ចុប្បន្ននេះមិនមានចីរ ភាពសម្រាប់ភូមាឬតំបន់ទេ។ ឥឡូវនេះជាពេលវេលាសម្រាប់របបយោធាភូមាផ្លាស់ប្តូរមាគ៌ាជាបន្ទាន់។ យើងជំរុញយ៉ាងខ្លាំងឱ្យរបបយោធាភូមាបញ្ឈប់ហិង្សា រួមទាំងការធ្វើឱ្យគ្រោះថ្នាក់ដល់ជនស៊ីវិលនិងហេដ្ឋារចនាសម្ពន្ធស៊ីវិល ដោះលែងអ្នកទោសនយោបាយទាំងអស់ ហើយនឹងចូលរួមដោយស្មោះត្រង់និងការសន្ទនាដោយរួមបញ្ចូលគ្រប់ភាគីទាំងអស់។ ទាំងអស់នេះជាជំហានដ៏សំខាន់មុនដំបូងឆ្ពោះទៅកាន់អន្តរកាលដោយសន្តិវិធី ប្រជាធិបតេយ្យ ដែលឆ្លុះបញ្ចាំងនូវឆន្ទៈរបស់ប្រជាពលរដ្ឋមីយ៉ាន់ម៉ា៕