ប្រធានាធិបតីសហរដ្ឋអាមេរិកលោក Joe Biden និងបណ្ដាមេដឹកនាំមកពីក្រុមប្រទេសប្រជាធិបតេយ្យដែលគេស្គាល់ថា G-7 បានប្រកាសអំពីការតាំងចិត្តរបស់ខ្លួននៅក្នុងការដោះស្រាយបញ្ហាពលកម្មដោយបង្ខំនៅក្នុងខ្សែសង្វាក់ផ្គត់ផ្គង់សាកល ការគំរាមកំហែងជំរិតទារប្រាក់តាមអ៊ីនធឺណិត និងអំពើពុករលួយ។
សហរដ្ឋអាមេរិកនិងដៃគូរបស់ខ្លួននៃក្រុមប្រទេស G-7 នៅតែមានការព្រួយបារម្ភខ្លាំងអំពីការប្រើប្រាស់ពលកម្មដោយបង្ខំគ្រប់ទម្រង់ទាំងអស់នៅក្នុងខ្សែសង្វាក់ផ្គត់ផ្គង់សាកល ដែលក្នុងនោះរួមមានទាំងពលកម្មដោយបង្ខំដែលជ្រោមជ្រែងដោយរដ្ឋលើក្រុមងាយរងគ្រោះផងដែរដូចជាជាតិសាសន៍អ៊ុយហ្គ័រ (Uyghur) និងក្រុមជាតិសាសន៍ភាគតិច និងក្រុមអ្នកកាន់សាសនាភាគតិចផ្សេងទៀតនៅក្នុងតំបន់ Xinjiang ប្រទេសចិន ជាដើម។
វិស័យកសិកម្ម វិស័យថាមពលព្រះអាទិត្យ និងវិស័យកាត់ដេរ គឺជាខ្សែសង្វាក់ផ្គត់ផ្គង់ចម្បងដែលគួរឲ្យព្រួយបារម្ភនៅក្នុងតំបន់ Xinjiang។ មេដឹកនាំនានា បានយល់ស្របលើសារៈសំខាន់នៃការគោរពសិទ្ធិមនុស្ស និងបានប្ដេជ្ញាការពារបុគ្គលនានាពីពលកម្មដោយបង្ខំ។
បន្ថែមពីលើនេះទៀត បណ្ដាប្រទេសនៃក្រុមប្រទេស G-7 បានតាំងចិត្តរួមគ្នាដោះស្រាយបញ្ហាគំរាមកំហែងពីបណ្ដាញឧក្រិដ្ឋជំរិតទារប្រាក់តាមអ៊ីនធឺណិត។
កន្លងមក គេឃើញមានការយាយីតាមអ៊ីនធឺណិតគួរឲ្យកត់សម្គាល់ដែលប៉ះពាល់ដល់ហេដ្ឋារចនាសម្ព័ន្ធ ក្រុមហ៊ុនផលិតកម្មនិងអេឡិចត្រូនិក និងមន្ទីរពេទ្យរបស់ក្រុមប្រទេស G-7 និងប្រទេសផ្សេងៗទៀត។
សហគ្រាសឧក្រិដ្ឋកម្មតាមអ៊ីនធឺណិតឆ្លងប្រទេសមានឥទ្ធិពលលើហេដ្ឋារចនាសម្ព័ន្ធ រូបិយប័ណ្ណអេឡិចត្រូនិក និងបណ្ដាញលាងលុយកខ្វក់ និងដៅគោលដៅលើជនរងគ្រោះនៅទូទាំងពិភពលោក។
ទាំងរដ្ឋាភិបាលនិងទាំងវិស័យឯកជនត្រូវតែធ្វើការជាមួយគ្នាដើម្បីធានាថា ហេដ្ឋារចនាសម្ព័ន្ធចាំបាច់នានាអាចទប់ទល់ជាមួយនឹងការគំរាមកំហែងនេះបាន។
ជាងនេះទៀត សកម្មភាពព្យាបាទតាមអ៊ីនធឺណិតត្រូវតែមានការស៊ើបអង្កេតនិងកាត់ទោស ហើយការការពាររួមតាមប្រព័ន្ធអ៊ីនធឺណិតត្រូវតែបង្កើតឡើង។ ប្រទេសនីមួយៗក៏ចាំបាច់ត្រូវដោះស្រាយបញ្ហាទង្វើឧក្រិដ្ឋនេះ ដែលកើតឡើងនៅក្នុងរង្វង់ព្រំដែនរបស់ខ្លួនផងដែរ។
ក្រុមប្រទេស G-7 ក៏បានឯកភាពគ្នាផងដែរនៅក្នុងការចាត់វិធានការរួមដើម្បីកម្ចាត់អំពើពុករលួយ។ កាលពីពេលថ្មីៗនេះ លោកប្រធានាធិបតី Biden បានប្រកាសថា កិច្ចប្រឹងប្រែងទប់ទល់នឹងអំពើពុករលួយ គឺជាស្នូលនៃប្រយោជន៍ជាតិរបស់សហរដ្ឋអាមេរិក និងបានចេញផ្សាយនូវអនុស្សរណៈនៃការសិក្សាស្រាវជ្រាវសន្តិសុខជាតិស្ដីពីការប្រយុទ្ធប្រឆាំងនឹងអំពើពុករលួយ (National Security Study Momorandum on the Fight Against Corruption) ដើម្បីលើកកម្ពស់កិច្ចការដ៏សំខាន់នេះ។
អំពើពុករលួយធ្វើឲ្យបាត់បង់ទំនុកចិត្តសាធារណៈ ធ្វើឲ្យរដ្ឋាភិបាលមិនសូវមានប្រសិទ្ធភាព ខ្ជះខ្ជាយធនធានសាធារណៈ និងស៊ីរូងគ្រឹះរបស់សង្គមប្រជាធិបតេយ្យ។ ជាងនេះទៀត អំពើពុករលួយបណ្ដាលឲ្យមានការខាតបង់ច្រើនដល់សេដ្ឋកិច្ច និងមិនយុត្តិធម៌ចំពោះពលរដ្ឋ។
រួមជាមួយនឹងបណ្ដាប្រទេសជាសមាជិកនៃក្រុមប្រទេស G-7 ដែលជាដៃគូរបស់ខ្លួន សហរដ្ឋអាមេរិកនឹងដោះស្រាយបញ្ហាប្រើប្រាស់មិនត្រឹមត្រូវនូវក្រុមហ៊ុនអសកម្មដែលមានតែឈ្មោះ ដាក់កំហិតលើលទ្ធភាពរបស់តួអង្គអាក្រក់ដែលចង់ប្រើលុយមិនស្អាតស្អំទិញអចលនទ្រព្យ កែលម្អការចែកចាយព័ត៌មានទាក់ទិននឹងអំពើពុករលួយ និងកែទម្រង់ជំនួយបរទេសដោយផ្ដោតអាទិភាពសំខាន់លើការប្រឆាំងនឹងអំពើពុករលួយ។ សហរដ្ឋអាមេរិកស្វាគមន៍ការតាំងចិត្តរបស់ក្រុមប្រទេស G-7 នៅក្នុងការចាត់វិធានការរួមគ្នាដើម្បីប្រយុទ្ធប្រឆាំងនឹងអំពើពុករលួយ។
ដូចដែលលោកប្រធានាធិបតី Biden បានបញ្ជាក់ដូច្នេះដែរ «សហរដ្ឋអាមេរិកត្រឡប់មកដឹកនាំពិភពលោកជាថ្មី រួមជាមួយនឹងបណ្ដាប្រទេសនានាដែលប្រកាន់ខ្ជាប់នូវគុណតម្លៃជ្រាលជ្រៅដូចសហរដ្ឋអាមេរិក»៕