តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ (USAID) នឹងផ្ដល់ជំនួយមនុស្សធម៌ជាង ៣១១ លានដុល្លារបន្ថែមទៀតដល់ប្រជាពលរដ្ឋចំនួន ៣ លាន ៨ សែននាក់ដែលខ្វះខាតស្បៀងអាហារនៅក្នុងតំបន់សាហែល (Sahel) និងតំបន់ Lake Chad Basin នៅទ្វីបអាហ្វ្រិក។
ការរួមចំណែករបស់ទីភ្នាក់ងារ USAID នៅពេលនេះមានដូចជាអង្ករ ធញ្ញជាតិ ប្រេងបន្លែ និងអាហារដែលផលិតឡើងជាពិសេសសម្រាប់អ្នកខ្វះអាហារូបត្ថម្ភធ្ងន់ធ្ងរ បន្ថែមពីលើបណ្ណម្ហូបអាហារនិងសាច់ប្រាក់សម្រាប់ការទិញម្ហូបអាហារនានានៅតាមផ្សារក្នុងស្រុក។
ថវិកានេះក៏ផ្ដល់ផងដែរនូវការគាំទ្រផ្នែកផ្លូវចិត្តសម្រាប់សហគមន៍នានាដែលរងការប៉ះពាល់ដោយសារសង្គ្រាម ក៏ដូចជាផ្ដល់ជម្រកគ្រាអាសន្ន ទឹកបរិភោគ និងជំនួយផ្នែកអនាម័យ។
ការផ្ដល់ជំនួយបន្ថែមនេះបានធ្វើឡើងនៅចំពេលដ៏សំខាន់មួយ ស្របពេលដែលសហរដ្ឋអាមេរិកប៉ាន់ប្រមាណថា មនុស្សជាង ៣៥ លាននាក់នឹងប្រឈមនឹងកង្វះស្បៀងអាហារនៅក្នុងអំឡុងពេលរដូវខ្វះខាតខាងមុខដែលនឹងចូលមកដល់នៅតំបន់អាហ្វ្រិកខាងលិច។ រដូវខ្វះខាតនេះគឺជាដំណាក់កាលនៅចន្លោះរដូវដាំដុះនិងរដូវច្រូតកាត់ចាប់ពីខែឧសភាដល់ខែសីហា នៅពេលដែលជាទូទៅសហគមន៍កសិកម្មនានាអស់ស្បៀងអាហារ។
នៅក្នុងតំបន់សាហែល ស្ថានការណ៍គឺកាន់តែយ៉ាប់យ៉ឺនខ្លាំងឡើងដោយសារតែការប្រមូលផលបានតិចតួច និងផលប៉ះពាល់នៃសង្គ្រាមដែលនៅបន្តធ្វើឱ្យហិនហោចដល់ស្ដុកស្បៀងអាហារនិងធនធានផ្សេងៗរបស់គ្រួសារនីមួយៗ។ ករណីនេះបានបណ្ដាលឱ្យមនុស្សជាង ២០ លាននាក់ត្រូវការជំនួយស្បៀងអាហារ។
តំបន់ Lake Chad Basin គឺជាតំបន់មួយនៅតំបន់អាហ្វ្រិកខាងលិចដែលគ្របដណ្ដប់ប្រទេសកាមេរូន ឆាដ នីហ្សេ និងនីហ្សេរីយ៉ា។ នៅក្នុងរយៈពេល ១២ ឆ្នាំចុងក្រោយនេះ អំពើហិង្សាដែលបង្កឡើងដោយក្រុមភេរវកម្មឥស្លាមបូកូហារ៉ាំ (Boko Haram) និងក្រុមភេរវកម្មអាយស៊ីសអាហ្វ្រិកខាងលិច (ISIS-West Africa) បានធ្វើឱ្យមនុស្ស ១១ លាន ១ សែននាក់ត្រូវការជំនួយមនុស្សធម៌ខ្លាំងក្លាបំផុត។ មនុស្សជិត ៣ លាននាក់បានបង្ខំចិត្តចាកចេញពីផ្ទះសម្បែងរបស់ខ្លួន ហើយកង្វះទីជម្រកគ្រប់គ្រាន់ កង្វះទឹកស្អាត និងកង្វះអនាម័យជាមូលដ្ឋាន ក៏ដូចជាអសន្តិសុខស្បៀងអាហារធ្ងន់ធ្ងរផងដែរគឺមាននៅទូទាំងតំបន់ Lake Chad Basin។
សហរដ្ឋអាមេរិកបានផ្ដល់ជំនួយជាង ៩៤៤ លានដុល្លារទៅឱ្យតំបន់ Lake Chad Basin និងតំបន់សាហែលតាំងពីខែតុលា ឆ្នាំ ២០២០ មក។
ដើម្បីបង្ហាញអំពីការតាំងចិត្តរបស់រដ្ឋបាលលោកប្រធានាធិបតី Joe Biden នៅក្នុងការបង្កើនកិច្ចសហប្រតិបត្តិការនិងការចូលរួមជាមួយនឹងទ្វីបអាហ្វ្រិក ទីភ្នាក់ងារ USAID បានចូលរួមកាលពីពេលថ្មីៗនេះនៅក្នុងមហាសន្និបាតប្រចាំឆ្នាំរបស់អង្គការសម្ព័ន្ធភាពសាហែល (Sahel Alliance) ជាលើកដំបូងបង្អស់ក្នុងនាមជាសមាជិកពេញសិទ្ធិ។
ឋានៈជាសមាជិកពេញសិទ្ធិនេះនឹងផ្ដល់ឱកាសថ្មីដល់ទីភ្នាក់ងារ USAID នៅក្នុងការធ្វើជាដៃគូជាមួយនឹងម្ចាស់ជំនួយ វិស័យឯកជន និងរដ្ឋាភិបាលម្ចាស់ផ្ទះ ដើម្បីជួយពង្រឹងកិច្ចប្រឹងប្រែងអភិវឌ្ឍន៍និងកិច្ចប្រឹងប្រែងកែទម្រង់នៅក្នុងតំបន់សាហែល។
សហរដ្ឋអាមេរិកនឹងបន្តស្វែងរកមធ្យោបាយនានាដើម្បីដោះស្រាយតម្រូវការកើនឡើងផ្នែកមនុស្សធម៌នៅតំបន់អាហ្វ្រិកខាងលិច៕
បទវិចារណកថា៖ សហរដ្ឋអាមេរិកបំពេញតាមតម្រូវការស្បៀងអាហារនៅក្នុងតំបន់អាហ្វ្រិកខាងលិច
រូបឯកសារ៖ ជនភៀសខ្លួនអង្គុយនៅមាត់ទ្វារផ្ទះរបស់ពួកគេនៅឯជំរំជនភៀសខ្លួន Minawao នៅភាគខាងជើងប្រទេសកាមេរូន។