តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
លោកស្រី Samantha Power ប្រធានទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ (USAID) បាននិយាយថា៖ «តាមការប៉ាន់ស្មាន មនុស្សជាង ២៥0.000 នាក់ ប្រឈមនឹងការខ្វះខាតក្នុងឆ្នាំ ២០២២ នេះ គឺមានលើសពីចំនួនច្រើនបំផុតរយៈពេលមួយទសវត្សរ៍រហូតមកដល់ឆ្នាំនេះ»។
លោកស្រី Power បានមានប្រសាសន៍ថា៖ «ជំងឺរាតត្បាតជាសាកលដ៏យូរមួយបន្តឆក់យកជីវិតមនុស្ស និងបាននាំឱ្យមានបញ្ហាធ្ងន់ធ្ងរដល់សេដ្ឋកិច្ច ហើយបានជំរុញឱ្យមនុស្សច្រើនថែមទៀតធ្លាក់ក្នុងវិបត្តិមនុស្សធម៌។ មានមនុស្សជាងមួយភាគរយនៃប្រជារាស្ត្រក្នុងពិភពលោក បានខ្ចាត់ព្រាត់ពីផ្ទះសម្បែង។ អសន្តិសុខស្បៀង មានកម្រិតខ្ពស់បំផុត មិនធ្លាប់មានពីពេលមុនៗ។ សង្គ្រាមរយៈពេលយូរ ភាពមានអាសន្នសាំញ៉ាំញឹកញយជាងមុន និងការប្រែប្រួលអាកាសធាតុ មានភាពធ្ងន់ធ្ងរជាងមុន ហើយបង្កើនការខាតបង់ និងមិនផ្តល់ផលប្រយោជន៍អ្វីសោះឡើយ»។
ថ្លែងនៅក្នុងការប្រជុំរបស់អ.ស.ប.តាមបណ្តាញវីដេអូអនឡាញអំពីសេចក្តីត្រូវការខាងមនុស្សធម៌សាកលក្នុងឆ្នាំ២០២២ លោកស្រី Power បានកត់សម្គាល់ថា តាមពិតដោយសារ«បុព្វហេតុចម្បងនៃសេចក្តីត្រូវការខាងមនុស្សធម៌ក្នុងពិភពលោកក្នុងពេលសព្វថ្ងៃនេះ មិនមែនបណ្តាលមកពីជំងឺរាតត្បាត ឬមហន្តរាយធម្មជាតិ តែបណ្តាលមកពីសង្គ្រាម»នោះ ដូច្នេះយើងត្រូវមានការផ្លាស់ប្តូររបៀបដោះស្រាយបន្ថែមពីលើសេចក្តីត្រូវការខាងប្រភពធនធានថែមទៀត។
លោកស្រី Power បានមានប្រសាសន៍ថា៖ «ឧទាហរណ៍ការប្រយុទ្ធគ្នាក្នុងប្រទេសយេម៉ែន ស៊ីរី សូម៉ាលី ស៊ូដង់ខាងត្បូង ការប្រយុទ្ធគ្នាក្នុងប្រទេសទាំងនេះ បានបន្លាចប្រជារាស្ត្រនៃប្រទេសទាំងនេះ និងគំរាមកំហែងស្ថិរភាពហួសពីព្រំដែនប្រទេសទាំងនេះ។ កាលពីឆ្នាំទៅមិញ យើងបានឃើញរដ្ឋប្រហារនៅប្រទេសភូមា ហើយប្រទេសអាហ្វហ្គានីស្ថាន ធ្លាក់ក្នុងកណ្តាប់ដៃពួកតាលីបង់ ពួកយោធាឡើងក្តាប់អំណាចនៅប្រទេសស៊ូដង់ និងមានកំណើនមហន្តរាយខាងមនុស្សធម៌ក្នុងប្រទេសអេត្យូពី។
នៅក្នុងករណីទាំងនេះជាច្រើន រដ្ឋាភិបាលក្នុងរដ្ឋប្រេះស្រាំ ឬរដ្ឋមានសង្គ្រាមទាំងនេះ មិនអាចបំពេញសេចក្តីត្រូវការរបស់ប្រជារាស្ត្រខ្លួនបានទេ ដោយបានជ្រើសរើសយកអំពើហិង្សា ជាជាងលះបង់អំណាច ឬបែងចែកអំណាច ឬមិនគោរពសិទ្ធិមនុស្ស និងពហុនិយម»។
លោកស្រី Power ប្រធានទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ បានពោលថា នេះមានន័យថា «នៅពេលសង្គ្រាមទាំងនោះ មានជាបន្តទៅទៀត បន្ទុកនៃការដោះស្រាយបញ្ហាបណ្តាលមកពីជម្លោះទាំងនេះធ្លាក់លើអង្គការមនុស្សធម៌សឹងតែទាំងស្រុង និងដោយអយុត្តិធម៌»។
លោកស្រីបាននិយាយថា ដំណោះស្រាយគឺនយោបាយ ហើយ «ព្រោះហេតុនេះហើយ បានជាវាមានសារៈសំខាន់ដែលសហរដ្ឋអាមេរិក និងប្រទេសឯទៀតៗអនុវត្តអ្វីដែលលោកប្រធានាធិបតី Biden ហៅថា កិច្ចការទូតឥតឈប់ឈរ»។
លោកស្រី Power បានមានប្រសាសន៍ទៀតថា៖ «នៅពេលដែលសង្គ្រាម ឬវិបត្តិអាកាសធាតុធ្វើឱ្យប្រជារាស្ត្ររងគ្រោះ ប្រទេសអាមេរិក នឹងទៅទីនោះ និងប្រមូលការគាំទ្រ។ តែនៅក្នុងពិភពលោកដែលកំពុងមានការផ្លាស់ប្តូរ ដោយមានសេចក្តីត្រូវការច្រើនជាងមុនយើងមិនអាចប្រឹងប្រែង មិនអាចចេញសេចក្តីអង្វករ កម្រិតដូចកាលពីមុនបានទេ ហើយយើងមិនអាចចំណាយច្រើនឡើងៗ ហើយរំពឹងថា នឹងមានលទ្ធផលប្រសើរឡើងទេ»។
អ្នកស្រី Power បាននិយាយថា៖ «យើងត្រូវតែប្រើកិច្ចការការទូតសាកលដើម្បីបញ្ឈប់សង្គ្រាមទាំងនេះ។ យើងត្រូវតែស្វែងរកវិធីសម្រាប់ចរចាខាងការទូតក្នុងតំបន់ នៅកម្រិតអ.ស.ប. តាមរយៈទំនាក់ទំនងទ្វេភាគីរបស់យើង គួបផ្សំនឹងសម្ព័ន្ធមិត្តរបស់យើងដើម្បីព្យាយាមឱ្យភាគីនានាមកជួបចរចាគ្នាដើម្បីបញ្ចប់សង្គ្រាម»៕
