តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
មហន្តរាយមនុស្សធម៌ កំពុងកើតឡើងនៅតំបន់ Tigray នៃប្រទេសអេត្យូពី និងតំបន់ Afar និងតំបន់ Amhara ដែលនៅជិតខាង។
ការវាយប្រយុទ្ធគ្នារយៈពេល ៩ ខែ រវាងក្រុមសកម្មប្រយុទ្ធដែលគាំទ្រគណបក្សរណសិរ្សរំដោះប្រជាជន Tigray (Tigray People's Liberation Front) និងកងកម្លាំងការពារជាតិអេត្យូពី បានធ្វើឲ្យប្រជាពលរដ្ឋតំបន់ Tigray ជួបប្រទះកង្វះខាតធនធាន។
គិតត្រឹមដើមខែមិថុនា ប្រជាពលរដ្ឋតំបន់ Tigray ចំនួនរហូតដល់ទៅ ៩០០.០០០ នាក់ បានប្រឈមនឹងគ្រោះអត់ឃ្លាន ហើយប្រជាពលរដ្ឋ ៥ លាន ២ សែននាក់ទៀត ដែលស្មើនឹងជិត ៩០% នៃប្រជាពលរដ្ឋសរុបក្នុងតំបន់ Tigray ត្រូវការជំនួយស្បៀងអាហារ។
ក្ដីសង្ឃឹមដែលថា ស្ថានភាពនេះ អាចមានភាពប្រសើរឡើងបានកើតឡើងកាលពីថ្ងៃទី ២៨ ខែមិថុនាកន្លងទៅនេះ នៅពេលដែលរដ្ឋាភិបាលអេត្យូពីបានប្រកាសនូវកិច្ចផ្អាកការវាយប្រយុទ្ធគ្នាជាឯកតោភាគីដើម្បីមនុស្សធម៌ និងការដកកងកម្លាំងការពារជាតិអេត្យូពីចេញពីក្រុង Mekelle នៃតំបន់ Tigray។
ប៉ុន្តែ តំបន់ Tigray នៅតែត្រូវបានកាត់ផ្ដាច់ពីសេវាសំខាន់ៗនានា ដែលក្នុងនោះរួមមានទាំងការដឹកជញ្ជូនបែបមនុស្សធម៌នូវស្បៀងអាហារនិងឥន្ធនៈផងដែរ។ ផ្លូវចូលទៅកាន់តំបន់ Tigray ត្រូវបានរាំងខ្ទប់ ស្ពានមួយដែលដើរតួជាបណ្ដាញផ្លូវគោកតែមួយគត់ឆ្ពោះទៅកាន់ផ្នែកកណ្ដាលនៃតំបន់ Tigray ត្រូវបានបំផ្លាញ ហើយសំណើស្នើសុំការដឹកជញ្ជូនជំនួយមនុស្សធម៌តាមយន្តហោះពីរដ្ឋធានីអាឌីសអាបេបាទៅកាន់តំបន់ Tigray ត្រូវបានគេព្រងើយកន្ដើយ។
ការរីករាលដាលនៃជម្លោះនេះចូលទៅក្នុងតំបន់ Amhara និងតំបន់ Afar ដែលជាតំបន់ជិតខាង ក៏បានបង្កនូវផលវិបាកផងដែរ ដោយជនផ្លាស់ទីដោយបង្ខំនៅក្នុងប្រទេស (IDP) រាប់សែននាក់ នៅក្នុងតំបន់ទាំងនេះ កំពុងត្រូវការជំនួយមនុស្សធម៌ខ្លាំងក្លាបំផុត។
ជាងនេះទៀត ជនភៀសខ្លួនអេរីត្រេនៅភាគខាងជើងប្រទេសអេត្យូពី បានរងការវាយប្រហារពីកងកម្លាំងការពារជាតិអេរីត្រេផង និងពីក្រុមសកម្មប្រយុទ្ធដែលមានទំនាក់ទំនងជាមួយនឹងគណបក្សរណសិរ្សរំដោះប្រជាជន Tigray ផង។ សហរដ្ឋអាមេរិក បានថ្កោលទោសយ៉ាងខ្លាំងក្លាលើការវាយប្រហារទាំងនេះ។
ទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ (USAID) តាំងចិត្តជួយប្រជាពលរដ្ឋនៃប្រទេសអេត្យូពី តាមរយៈការបន្តផ្ដល់ជំនួយសង្គ្រោះជីវិត ដែលក្នុងនោះមានទាំងការផ្ដល់ជំនួយនេះដល់តំបន់ Amhara និងតំបន់ Afar ផងដែរ ប្រសិនបើស្ថានភាពសន្តិសុខមានលក្ខណៈអំណោយផល។
ប្រធានទីភ្នាក់ងារ USAID អ្នកស្រី Samantha Power បាននិយាយថា៖ «លំហូរនៃជំនួយមនុស្សធម៌ [ទៅកាន់តំបន់ Tigray] នៅតែមានការខ្វះខាតខ្លាំង។ ការខ្វះខាតនេះ គឺមិនមែនដោយសារតែមិនមានស្បៀងអាហារផ្ដល់ជូននោះទេ ប៉ុន្តែ គឺដោយសារតែរដ្ឋាភិបាលអេត្យូពីរារាំងជំនួយមនុស្សធម៌និងបុគ្គលិកមនុស្សធម៌ ដែលក្នុងនោះរួមមានទាំងការដឹកជញ្ជូនតាមផ្លូវគោកនិងផ្លូវអាកាសផងដែរ»។
អគ្គលេខាធិការអង្គការសហប្រជាជាតិលោក Antonio Guterres បានកត់សម្គាល់ថា៖ «អង្គការមនុស្សធម៌ត្រូវការដឹកជំនួយនិងគ្រឿងផ្គត់ផ្គង់នានាតាមឡានដឹកទំនិញប្រហែល ១០០ គ្រឿង ទៅកាន់ក្រុង Mekelle ជារៀងរាល់ថ្ងៃ។ ប៉ុន្តែ តាំងពីពាក់កណ្ដាលខែកក្កដាមក មានតែឡានដឹកជំនួយតិចជាង ១០ គ្រឿងប៉ុណ្ណោះក្នុងមួយថ្ងៃ ដែលអាចចូលទៅកាន់ក្រុងនោះបាន»។
បើយោងតាមអង្គការសហប្រជាជាតិ ប្រសិនបើការដឹកជញ្ជូនជំនួយមិនអាចចាប់ផ្ដើមឡើងវិញបានក្នុងពេលឆាប់ៗខាងមុខនេះទេ នោះនឹងមានការប៉ះពាល់ភ្លាមៗដល់អាយុជីវិតរបស់មនុស្សរាប់សែននាក់ ខណៈពេលដែលមនុស្សរាប់សែននាក់ផ្សេងទៀតជិតធ្លាក់ចូលទៅក្នុងគ្រោះទុរភិក្ស។
អ្នកស្រី Power បានបញ្ជាក់ថា៖ «សហរដ្ឋអាមេរិកអំពាវនាវឲ្យរដ្ឋាភិបាលអេត្យូពីអនុញ្ញាតជាបន្ទាន់ឲ្យមានការដឹកជញ្ជូនជំនួយមនុស្សធម៌ចូលទៅកាន់តំបន់ Tigray ដើម្បីបង្ការកុំឲ្យមានការបង្អាក់ធ្ងន់ធ្ងរដល់ជំនួយស្បៀងអាហារដែលមនុស្សរាប់លាននាក់ត្រូវការដើម្បីរស់»៕
