តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
សាធារណរដ្ឋអាហ្វ្រិកកណ្តាលហៅ CAR ជាប្រទេសអភិវឌ្ឍន៍តិចបំផុតមួយក្នុងចំណោមប្រទេសអភិវឌ្ឍន៍តិចបំផុតនានាក្នុងពិភពលោក ជាប្រទេសងាយប្រេះឆាមួយក្នុងពិភពលោក និងហែកហួរដោយសារជម្លោះ។
សង្គ្រាមស៊ីវិលមួយដែលបានចាប់ផ្តើមកាលពីឆ្នាំ២០០៤ ដើម្បីប្រឆាំងនឹងប្រធានាធិបតីនៅពេលនោះ គឺលោក Francois Bozize បានកើនខ្លាំងឡើងនៅឆ្នាំ២០១៣ នៅពេលលោក Bozize ត្រូវទម្លាក់ពីអំណាចនៅក្នុងការផ្តួលរំលំមួយដឹកនាំដោយក្រុមប្រដាប់អាវុធ Seleka។ ក្រុម Seleka និងក្រុមប្រឆាំងនឹងពួកនេះ គឺក្រុម Anti-Balaka បានប្រយុទ្ធគ្នានៅក្នុងសង្គ្រាមឃោរឃៅមួយបណ្តាលឱ្យមនុស្សរាប់ពាន់នាក់ស្លាប់ និងបានធ្វើឱ្យជនស៊ីវិលជាងកន្លះលាននាក់ ខ្ចាត់ព្រាត់ពីផ្ទះសម្បែងក្នុងប្រទេសមួយដែលមានប្រជារាស្ត្រតិចជាង៥លាននាក់។
នៅឆ្នាំ២០១៦ ប្រធានាធិបតីថ្មីម្នាក់ បានជាប់ឆ្នោត គឺលោក Faustin-Archange Touadera។ នៅខែកុម្ភៈ ឆ្នាំ២០១៩ រដ្ឋាភិបាលសាធារណរដ្ឋអាហ្វ្រិកកណ្តាល និងក្រុមប្រដាប់អាវុធ១៤ក្រុម បានចុះហេត្ថលេខាលើកិច្ចព្រមព្រៀងនយោបាយសម្រាប់សន្តិភាព និងការផ្សះផ្សាដែលគេស្គាល់ថា កិច្ចព្រមព្រៀងក្រុង Khartoum។
តែយ៉ាងណាក៏ដោយ ក៏មានអំពើហិង្សាឡើងវិញនៅមុនការបោះឆ្នោតប្រធានាធិបតីកាលពីខែធ្នូ ២០២០ នៅពេលដែលតុលាការកំពូលរបស់ប្រទេសនេះ បានសម្រេចថាអតីតប្រធានាធិបតី Bozize គ្មានសិទ្ធិឈរឈ្មោះទេ ហើយប្រធានាធិបតី Touadera បានជាប់ឆ្នោតជាថ្មី។ ការប្រយុទ្ធគ្នា ក៏បានកើតមានរវាងក្រុមឧទ្ទាមគាំទ្រអតីតប្រធានាធិបតី Bozize និងពួកឧទាមទ្រទ្រង់រដ្ឋាភិបាលសាធារណរដ្ឋអាហ្វ្រិកកណ្តាល។
ហើយដូចសង្គ្រាមទាំងអស់ ក្រុមជនស៊ីវិល ជាអ្នករងទុក្ខវេទនា។ សព្វថ្ងៃ សាធារណរដ្ឋអាហ្វ្រិកកណ្តាល កំពុងឋិតក្នុងភាពអាសន្នខាងមនុស្សធម៌យ៉ាងធ្ងន់ធ្ងរបំផុត ចាប់តាំងពីឆ្នាំ២០១៥ មក។ អំពើហិង្សារាលដាលនៅក្រោយការបោះឆ្នោតប្រធានាធិបតីចុងក្រោយ អស្ថិរភាពនយោបាយ វត្តមាននៃគ្រឿងផ្ទុះតាមដងផ្លូវដឹកជញ្ជូន ទឹកជំនន់ និងការរាតត្បាតនៃជំងឺកូវីដ១៩ បាននាំឱ្យមានសេចក្តីត្រូវការជំនួយមនុស្សធម៌យ៉ាងខ្លាំង។ បន្ថែមលើនេះ ការបង្អាក់ការប្រគល់ជំនួយស្រោចស្រង់ជីវិត បានបណ្តាលឱ្យមានមនុស្សប្រមាណ២លាន ៦សែននាក់ ប្រឈមនឹងអសន្តិសុខស្បៀងអាហារធ្ងន់ធ្ងរ។ គេរំពឹងថា ចំនួនមនុស្ស ត្រូវការជំនួយមនុស្សធម៌ នឹងកើនឡើងដល់៣លាន ១សែននាក់។
ស.រ.អ. នៅតែជាអ្នកផ្តល់ជំនួយមនុស្សធម៌ច្រើនបំផុតដល់សាធារណរដ្ឋអាហ្វ្រិកកណ្តាល។
កាលពីចុងខែវិច្ឆិកា លោកស្រី Samantha Power នាយិកាទីភ្នាក់ងារ USAID បានប្រកាសជំនួយមនុស្សធម៌បន្ថែមចំនួន៨លាន ៩សែនដុល្លារ ដល់ប្រជារាស្ត្រសាធារណរដ្ឋអាហ្វ្រិកកណ្តាល។ ទឹកប្រាក់នេះ នឹងបង្កើនជំនួយស្បៀងអាហារ និងផ្តល់ការព្យាបាលដល់ក្រុមកុមារខ្វះអាហារូបត្ថម្ភ និងគាំទ្រពួកម្តាយ និងក្រុមអ្នកថែទាំ។ ប្រាក់ជំនួយនេះ នឹងជួយជួសជុលផ្លូវដើម្បីបង្កើនការដឹកជញ្ជូនជំនួយមនុស្សធម៌ គាំទ្រក្រុមជនខ្ចាត់ព្រាត់ពីលំនៅដ្ឋាន និងផ្តល់ដំណើរការចាត់ចែងកិច្ចការ និងការគាំទ្រខាងចិត្តសាស្ត្រសម្រាប់ក្រុមជននៅរស់ពីការកេងប្រវ័ញ្ចខាងភេទ និងការរំលោភផ្លូវភេទ។
ស.រ.អ. ឈរក្នុងភាពជាដៃគូជាមួយប្រជារាស្ត្រនៃសាធារណរដ្ឋអាហ្វ្រិកកណ្តាល នៅពេលពួកគេព្យាយាមដោះស្រាយវិបត្តិផ្សេងទៀត និងលើកទឹកចិត្តប្រទេសផ្តល់ជំនួយឯទៀតៗ ឱ្យបង្កើនជំនួយស្រោចស្រង់ជីវិតរបស់ពួកគេផងដែរ៕
