តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
នៅក្នុងឆ្នាំ ១៩៩៥ គឺក្នុងពេលមិនយូរប៉ុន្មាននៅក្រោយការបែកបាក់របស់សហភាពសូវៀត សហរដ្ឋអាមេរិកបានបង្កើតនូវមូលនិធិវិនិយោគរបស់សហរដ្ឋអាមេរិកសម្រាប់រុស្ស៊ី (U.S. Russia Investment Fund) ដើម្បីជំរុញឱ្យមានការវិនិយោគផ្នែកឯកជនក្នុងសេដ្ឋកិច្ចរុស្ស៊ី។ ភាគច្រើននៃថវិកានេះបានមកពីទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ (USAID)។
ប្រធានទីភ្នាក់ងារ USAID អ្នកស្រី Samantha Power បាននិយាយថា៖ «មូលនិធិវិនិយោគរបស់សហរដ្ឋអាមេរិកសម្រាប់រុស្ស៊ីនេះត្រូវបានបង្កើតឡើងដើម្បីជួយកសាងសេដ្ឋកិច្ចទីផ្សារមួយដែលមានលក្ខណៈបើកចំហនិងមានតម្លាភាពនៅក្នុងប្រទេសរុស្ស៊ី គឺសេដ្ឋកិច្ចមួយដែលនឹងគាំទ្រមិនត្រឹមតែសុខុមាលភាពរបស់ប្រជាពលរដ្ឋរុស្ស៊ីប៉ុណ្ណោះទេ ប៉ុន្តែថែមទាំងក្ដីសុបិនរបស់ពួកគេអំពីសង្គមមួយដែលមានភាពសេរីផងដែរ»។
អ្នកស្រី Power បានបន្ថែមថា៖ «ជាអកុសល ចាប់តាំងពីពេលនោះមក រដ្ឋាភិបាលរុស្ស៊ីបានរារាំងក្ដីសុបិនទាំងនោះ ដោយវាយប្រហារលើសង្គមស៊ីវិលនិងប្រព័ន្ធផ្សព្វផ្សាយឯករាជ្យ ដាក់ការត្រួតត្រារបស់រដ្ឋលើឧស្សាហកម្មនានាដែលផ្ដល់ប្រយោជន៍ជាចម្បងដល់ក្រុមដែលជិតស្និទ្ធបំផុតនឹងប្រធានាធិបតី [រុស្ស៊ីលោក Vladimir] Putin និងឈ្លានពានយ៉ាងព្រៃផ្សៃលើប្រទេសអ៊ុយក្រែនដែលជាប្រទេសអធិបតេយ្យនៅជិតខាងខ្លួន»។
ដោយពិចារណាអំពីចំណុចនេះ វាដល់ពេលដែលត្រូវប្ដូរយុទ្ធសាស្ត្រហើយ។ នេះបើតាមការបញ្ជាក់របស់អ្នកស្រី Power។ កាលពីថ្ងៃទី ១ ខែកុម្ភៈ អ្នកស្រីបានប្រកាសថា ថវិកាចំនួន ១៥០ លានដុល្លារដែលត្រូវបានបង្កកនៅក្នុងមូលនិធិសហរដ្ឋអាមេរិកសម្រាប់រុស្ស៊ី (U.S. Russia Foundation) ដែលមិនដំណើរការនឹងត្រូវផ្ទេរទៅឱ្យអ្នកដែលតតាំងនឹងភាពគឃ្លើនឈ្លានពានរបស់រដ្ឋាភិបាលរុស្ស៊ី។ មូលនិធិសហរដ្ឋអាមេរិកសម្រាប់រុស្ស៊ីនេះគឺជាមូលនិធិបន្តពីមូលនិធិវិនិយោគរបស់សហរដ្ឋអាមេរិកសម្រាប់រុស្ស៊ី។
អ្នកស្រី Power បានថ្លែងថា៖ «ថវិកាចំនួន ១៣៥ លានដុល្លារនៃមូលនិធិដែលបានផ្ទេរនេះនឹងត្រូវគ្រប់គ្រងដោយមូលនិធិ Western New Independent States Enterprise Fund ដើម្បីគាំទ្រដល់ការរើបឡើងវិញនៃសេដ្ឋកិច្ចនៅក្នុងប្រទេសអ៊ុយក្រែននិងប្រទេសម៉ុលដាវី»។ ប្រទេសអ៊ុយក្រែននិងប្រទេសម៉ុលដាវីនេះគឺជាប្រទេសដែលបានបង្ហាញនូវភាពធន់យ៉ាងអស្ចារ្យ។
ការវាយប្រហាររបស់លោក Putin លើប្រជាជនអ៊ុយក្រែនបានបំផ្លិចបំផ្លាញដល់សេដ្ឋកិច្ចរបស់អ៊ុយក្រែន។ ប្រទេសម៉ុលដាវីក៏បានរងផលប៉ះពាល់ធ្ងន់ធ្ងរផងដែរដោយសារសង្គ្រាមនៅប្រទេសអ៊ុយក្រែននេះ។ ម៉ុលដាវីបានបាត់បង់ទីផ្សារនាំចេញសំខាន់បំផុតពីររបស់ខ្លួននៅក្នុងប្រទេសអ៊ុយក្រែននិងរុស្ស៊ី ហើយអតិផរណាបានធ្វើឱ្យស្ថានការណ៍លំបាកកាន់តែអាក្រក់ឡើង។ ទោះជាយ៉ាងណាក៏ដោយ ប្រទេសម៉ុលដាវីនៅតែទទួលយកជនភៀសខ្លួនអ៊ុយក្រែនច្រើនជាងប្រទេសណាៗទាំងអស់បើគិតតាមចំនួនពលរដ្ឋម្នាក់ៗនៃប្រទេសនេះ។
អ្នកស្រី Power បានលើកឡើងថា៖ «ការគាំទ្រជាបន្ទាន់ចំពោះវិស័យឯកជននៅក្នុងប្រទេសអ៊ុយក្រែននិងម៉ុលដាវីគឺសំខាន់ដើម្បីពង្រឹងប្រទេសទាំងពីរ នៅពេលដែលប្រទេសទាំងពីរនេះការពារខ្លួនពីភាពគឃ្លើនឈ្លានពានរបស់លោក Putin»។
អ្នកស្រីបានបញ្ជាក់បន្តថា៖ «ប្រជាជនរុស្ស៊ីក៏ត្រូវបានបង្ខំផងដែរឱ្យទ្រាំទ្រនឹងភាគគឃ្លើននិងគោលនយោបាយជិះជាន់របស់លោក Putin តាមវិធីផ្សេងៗ»។ ដូច្នេះ ថវិកាដែលនៅសល់ចំនួន ១៨ លានដុល្លារនៃមូលនិធិសហរដ្ឋអាមេរិកសម្រាប់រុស្ស៊ីនេះនឹងត្រូវប្រើដើម្បីគាំទ្រដល់ពលរដ្ឋរុស្ស៊ីណាដែលប្រយុទ្ធដើម្បីប្រទេសរុស្ស៊ីមួយដែលមានភាពសេរី។ ថវិកានេះនឹងគាំទ្រកិច្ចប្រឹងប្រែងក្នុងការកសាងសង្គមស៊ីវិលនិងប្រព័ន្ធផ្សព្វផ្សាយឯករាជ្យរបស់រុស្ស៊ីនៅក្នុងដំណាក់កាលដ៏លំបាកបំផុតនេះ។
អ្នកស្រី Power បានបន្ថែមថា៖ «យើងដឹងថា សេរីភាពគឺជាកម្លាំងដ៏មានឥទ្ធិពលមួយដែលបានលើកទឹកចិត្តមនុស្សរាប់លាននាក់នៅជុំវិញពិភពលោក និងបន្តធ្វើឱ្យមានភាពសកម្មឡើងនូវការតស៊ូរបស់អ៊ុយក្រែននិងការតស៊ូរបស់ម៉ុលដាវី។ ហើយយើងដឹងថា ការចង់បានសេរីភាពនៅតែជាសេចក្ដីប្រាថ្នាដ៏ខ្លាំងក្លារបស់ពលរដ្ឋរុស្ស៊ីជាច្រើនទាំងនៅក្នុងនិងក្រៅប្រទេសរុស្ស៊ី»៕
