តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
លោកស្រី Molly Phee ឧបការិនីរដ្ឋមន្ត្រីការបរទេសស.រ.អ. ទទួលបន្ទុកកិច្ចការទ្វីបអាហ្វ្រិក និងលោកស្រី Isobel Coleman អភិបាលរងខាងគោលនយោបាយ និងការចាត់ចែងកម្មវិធីនៃទីភ្នាក់ងារស.រ.អ. សម្រាប់ការអភិវឌ្ឍន៍អន្តរជាតិ (USAID) បាននិយាយនៅក្នុងការផ្តល់សក្ខីកម្មរបស់លោកស្រីក្នុងព្រឹទ្ធសភាស.រ.អ. កាលពីពេលថ្មីៗនេះថា ការទម្លាក់រដ្ឋាភិបាលអន្តរកាលស៊ីវិលនៃប្រទេសស៊ូដង់ កាលពីខែតុលា ឆ្នាំ២០២១ បង្ហាញថា ការជឿនលឿនទៅកាន់លទ្ធិប្រជាធិបតេយ្យអាចងាយ ប្រេះឆា។
លោកស្រី Phee បាននិយាយនៅក្នុងការផ្តល់សក្ខីកម្មរបស់លោកស្រីថា «យើងសរសើរប្រជារាស្ត្រស៊ូដង់គ្រប់ជាន់ថ្នាក់ដែលបន្តធ្វើបាតុកម្មតាមដងផ្លូវដោយមិនខ្លាចគ្រោះថ្នាក់ដើម្បីទាមទារឱ្យមានការគ្រប់គ្រងស៊ីវិល និងលទ្ធិប្រជាធិបតេយ្យ»។ លោកស្រីអភិបាលរង Coleman បានបន្ថែមថា «ពលរដ្ឋក្លាហានរាប់ពាន់នាក់ បានប្រថុយជីវិតសឹងតែរៀងរាល់ថ្ងៃដើម្បីបញ្ចប់ការគ្រប់គ្រងដោយក្រុមយោធាពុករលួយដែលបានគំរាមកំហែង និងសង្កត់សង្កិនពួកគេច្រើននាក់ក្នុងមួយជីវិតពួកគេ»។
ក្រោយពីបដិវត្តន៍ដឹកនាំដោយពលរដ្ឋស៊ូដង់កាលពីឆ្នាំ២០១៨ រដ្ឋាភិបាលស.រ.អ. បានបង្កើនជំនួយរបស់ខ្លួន ហើយបានក្លាយជាប្រទេសផ្តល់ជំនួយច្រើនបំផុតគាំទ្រដល់អន្តរកាលប្រជាធិបតេយ្យនៃប្រទេសស៊ូដង់។ ជំនួយនេះ បានគាំទ្រកំណែទម្រង់សំខាន់ៗខាងនយោបាយនិងខាងសេដ្ឋកិច្ចដើម្បីជំរុញ រដ្ឋាភិបាលបណ្តោះអាសន្នដឹកនាំដោយពួកជនស៊ីវិលឱ្យទៅមុខនិងបង្ហាញប្រជារាស្ត្រស៊ូដង់ថាលទ្ធិប្រជាធិបតេយ្យអាចធ្វើឱ្យមានអនាគតមួយដែលអាចសម្រេចបាននិងរស់រវើក។
បន្ទាប់ពីក្រុមយោធាក្បត់ការប្តេជ្ញារបស់ពួកគេដល់ប្រជារាស្ត្រ ស.រ.អ. បានប្រកាសអំពីការផ្អាកការសន្យារបស់ខ្លួនថ្មីៗពីប្រាក់៧រយលានដុល្លារ។ ដើម្បីជួយប្រជារាស្ត្រស៊ូដង់ឱ្យបន្តកសាងអនាគតពួកគេ ទីភ្នាក់ងារ USAID បានបន្ត និងពង្រីកសកម្មភាពដែលបង្កើនការគាំទ្រដល់អន្តរកាលប្រជាធិបតេយ្យនៃប្រទេសស៊ូដង់ក្នុងវិស័យចម្បងបី គឺការពង្រឹងភាពជាមេដឹកនាំស៊ីវិល ការឧបត្ថម្ភការគោរពសិទ្ធិមនុស្ស ដោយមានរួមបញ្ចូលសេរីភាពខាងការនិយាយស្តីបញ្ចេញមតិនិងសិទ្ធិប្រមូលផ្តុំគ្នាដោយសន្តិវិធី និងការគាំទ្រការទាមទាររបស់ប្រជារាស្ត្រស៊ូដង់ឱ្យមានការបញ្ចប់ការគ្របដណ្តប់យូរយាមកហើយនៃកងយោធាលើវិស័យនយោបាយ និងសេដ្ឋកិច្ច។
នៅពេលជាមួយគ្នានេះ សេចក្តីត្រូវការខាងមនុស្សធម៌ក្នុងប្រទេសស៊ូដង់កើនឡើងជាលំដាប់។ អ.ស.ប. បានស្ទង់ប្រមាណថា មនុស្ស១៤លាន៣សែននាក់ក្នុងប្រទេសស៊ូដង់ ឬជិតមួយភាគបីនៃប្រជារាស្ត្រ នឹងត្រូវការជំនួយមនុស្សធម៌ក្នុងឆ្នាំ២០២២នេះ គឺមានកើន៧ភាគរយលើសឆ្នាំមុន។ តួលេខនេះ មានរួមបញ្ចូលមនុស្សជិត៩លាន ៨សែននាក់ ដែលប្រឈមនឹងអសន្តិសុខស្បៀងធ្ងន់ធ្ងរដល់កម្រិតគំរាមកំហែងជីវិត។
ស.រ.អ. ជាប្រទេសផ្តល់ជំនួយច្រើនជាងគេឱ្យប្រជារាស្ត្រនៃប្រទេសស៊ូដង់អស់ពេលជាយូរមកហើយ។ ក្នុងឆ្នាំសារពើពន្ធ២០២១ និង២០២២ រដ្ឋាភិបាលស.រ.អ. បានផ្តល់វិភាគទានជិត ៤២៩ លានដុល្លារសម្រាប់សេចក្តីត្រូវការជាមូលដ្ឋានរបស់ក្រុមជនភៀសខ្លួន ក្រុមមនុស្សខ្ចាត់ព្រាត់ក្នុងប្រទេស សមាជិកសហគមន៍ទទួលអ្នកភៀសខ្លួន និងក្រុមមនុស្សឯទៀតៗ។ ស.រ.អ. នឹងបន្តបំពេញសេចក្តីត្រូវការយ៉ាងធំធេងរបស់ប្រជារាស្ត្រស៊ូដង់ និងបានសុំដល់ប្រទេសផ្តល់ជំនួយឯទៀតៗឱ្យចូលរួមក្នុងកិច្ចខិតខំប្រឹងប្រែងនេះដែរ។
គោលដៅរបស់ស.រ.អ.នៅតែដដែល គឺជួយប្រជារាស្ត្រស៊ូដង់ឱ្យបំពេញតាមការប៉ងប្រាថ្នារបស់ពួកគេដើម្បីសេរីភាពសន្តិភាព និងយុត្តិធម៌៕
