តទៅនេះ គឺជាបទវិចារណកថាដែលឆ្លុះបញ្ចាំងឲ្យឃើញទស្សនៈរបស់រដ្ឋាភិបាលសហរដ្ឋអាមេរិក
ការថែរក្សាព្រៃឈើរបស់ពិភពលោក មានសារៈសំខាន់ដល់ការខំប្រឹងប្រែងនៅទូទាំងពិភពលោកដើម្បីកាត់បន្ថយការប្រែប្រួលអាកាសធាតុ។ ជារៀងរាល់ឆ្នាំ ព្រៃឈើ បានចាប់យក និងផ្ទុកការបញ្ចេញឧស្ម័នផ្ទះកញ្ចក់កាបោនឌីអុកស៊ីតរបស់សាកលលោកចំនួន១៥ភាគរយ។
លោកប្រធានាធិបតី Joe Biden បានថ្លែងនៅឯសន្និសីទស្តីពីការប្រែប្រួលអាកាសធាតុរបស់អង្គការសហប្រជាជាតិថា៖ «ប្រសិនបើយើងទាំងអស់គ្នាធ្វើការជាមួយគ្នាដើម្បីធ្វើឲ្យប្រាកដថា ប្រភពធនធានដ៏មានតម្លៃទាំងនោះ ត្រូវបានថែរក្សា ព្រៃឈើ មានសក្តានុពលដើម្បីកាត់បន្ថយកាបោនទូទាំងសាកលលោកជាង១ភាគ៣»។
លោកប្រធានាធិបតី Biden បានមានប្រសាសន៍ទៀតថា៖ «ការថែរក្សាព្រៃឈើរបស់យើងនិងប្រព័ន្ធអេកូឡូហ្ស៊ីដែលមានសារៈសំខាន់ផ្សេងៗទៀត ជាចំណែកដ៏សំខាន់មួយនៃការថែរក្សាគោលដៅអាកាសធាតុរបស់យើងដែលអាចធ្វើទៅបាន និងអាទិភាពសំខាន់ៗផ្សេងទៀតដែលយើងមានដូចជា៖ ធ្វើឲ្យប្រាកដថា មានទឹកស្អាត ការថែរក្សាជីវៈចម្រុះ ការគាំទ្រសហគមន៍នៅតាមជនបទ និងជនជាតិដើម ហើយនឹងកាត់បន្ថយហានិភ័យនៃការរាលដាលនៃជំងឺ»។
ដូច្នេះ វាជាការត្រឹមត្រូវដែលថា កិច្ចព្រមព្រៀងដ៏សំខាន់លើកទី១ដែលត្រូវបានចុះហត្ថលេខានៅឯសន្និសីទប្រែប្រួលអាកាសធាតុ បានទាក់ទិននឹងការថែរក្សាព្រៃឈើរបស់ពិភពលោក។ មេដឹកនាំពិភពលោកចំនួនជាង១០០ប្រទេស រួមទាំងសហរដ្ឋអាមេរិក ប្រេហ្ស៊ីល កាណាដា សាធារណរដ្ឋប្រជាមានិតចិន សាធារណរដ្ឋប្រជាធិបតេយ្យកុងហ្គោ ឥណ្ឌូណេស៊ី រុស្ស៊ី និងចក្រភពអង់គ្លេស បានតាំងចិត្តបញ្ចប់ និងបញ្ចៀសការកាប់បំផ្លាញព្រៃឈើនៅកំណត់ឆ្នាំ២០៣០។ ប្រទេសហត្ថលេខីទាំងនោះ មានព្រៃឈើចំនួន៨៥ភាគរយរបស់ពិភពលោក។
ម្ចាស់ជំនួយ ក៏បានសន្យាផ្តល់ប្រាក់១៩ពាន់ លានដុល្លារនៅក្នុងថវិកាឯកជន និងសាធារណៈសម្រាប់ការខំប្រឹងប្រែងថែរក្សាព្រៃឈើ ខណៈដែលប្រទេសចំនួន២៨ផ្សេងទៀត បានតាំងចិត្តធ្វើឲ្យប្រាកដថា ពាណិជ្ជកម្មនៅក្នុងផលិតផលសំខាន់ៗរបស់ពិភពលោកដូចជា ប្រេងដូង កាកាវ និងសណ្តែកសៀង មិនធ្វើឲ្យមានការកាប់ព្រៃឈើទេ។
នៅពេលជាមួយគ្នានោះដែរ លោកប្រធានាធិបតី Joe Biden បានផ្សព្វផ្សាយផែនការថ្មីមួយរបស់រដ្ឋាភិបាលដើម្បីអភិរក្សនិងស្តារព្រៃឈើ និងប្រព័ន្ធអេកូឡូហ្ស៊ីសំខាន់ៗផ្សេងៗទៀតនៅជុំវិញពិភពលោក។ លោកប្រធានាធិបតី Biden បានមានប្រសាសន៍ថា៖ «សហរដ្ឋអាមេរិក នឹងជួយពិភពលោកឲ្យបានទៅដល់គោលដៅរួមរបស់យើងនៃការបញ្ឈប់ការបាត់បង់ព្រៃឈើ និងការស្តារឡើងវិញយ៉ាងហោចណាស់ព្រៃឈើបន្ថែមចំនួន២០០លានហិកតា និងប្រព័ន្ធអេកូឡូហ្ស៊ីផ្សេងទៀតនៅឆ្នាំ២០៣០»។
លោកប្រធានាធិបតី Biden បានថ្លែងថា៖ «យើងកំពុងធ្វើការដើម្បីធ្វើឲ្យប្រាកដថា ទីផ្សារទទួលស្គាល់គុណតម្លៃសេដ្ឋកិច្ចពិតប្រាកដនៃការចុះថយនៃសារធាតុកាបោនធម្មជាតិនិងជំរុញឲ្យរដ្ឋាភិបាល ម្ចាស់ដី និងអ្នកមានការពាក់ព័ន្ធខ្លាំងដើម្បីផ្តល់អាទិភាពក្នុងការថែរក្សាបរិដ្ឋាន។
យើងនឹងធ្វើការដើម្បីកែសម្រួលលំហូរវិនិយោគផ្នែកឯកជន និងគោលដៅនៃការអភិរក្ស រួមទាំងការកាត់បន្ថយការកាប់បំផ្លាញព្រៃឈើ បង្កើតសង្វាក់ផ្គត់ផ្គង់ប្រកបដោយនិរន្តរភាព ស្វែងរកប្រភពធនធានវត្ថុធាតុដើមដែលមាននិរន្តរភាព។
លោកប្រធានាធិបតី Biden មានប្រសាសន៍ទៀតថា៖ «ការថែរក្សាព្រៃឈើ និងប្រព័ន្ធកេអូឡូហ្ស៊ីផ្សេងទៀត អាចព្រមទាំងត្រូវតែដើរតួនាទីដ៏សំខាន់នៅក្នុងធ្វើឲ្យបានសម្រេចគោលដៅអាកាសធាតុដ៏ធំរបស់យើងដែលជាផ្នែកមួយនៃយុទ្ធសាស្ត្រគ្មានឧស្ម័នកខ្វក់។ ខ្ញុំជឿជាក់ថា យើងអាចធ្វើបាន។ អ្វីដែលយើងត្រូវធ្វើ គឺស្វែងរកឆន្ទៈដើម្បីធ្វើអ្វីដែលយើងដឹងថា ជាការត្រឹមត្រូវ និងដែលយើងដឹងថា ជាការចាំបាច់ហើយយើងដឹងថា ស្ថិតនៅក្នុងសមត្ថភាពរបស់យើង»៕
