តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
នៅពេលដែលនិយាយទៅដល់ចំណុចនៃការបន្ធូរបន្ថយនូវផលប៉ះពាល់ដ៏គ្រោះថ្នាក់នៃបម្រែបម្រួលអាកាសធាតុជាសាកលនោះ យើងកំពុងស្ថិតនៅក្នុងផ្លូវរបត់មួយ។ «តើយើងនឹងធ្វើអ្វីដែលជាការចាំបាច់ដែរឬទេ? តើយើងនឹងចាប់យកនូវឱកាសដ៏ធំមួយនៅចំពោះមុខយើងដែរឬទេ? ឬមួយក៏យើងទុកឲ្យមនុស្សជាច្រើនជំនាន់ទៀតទទួលរងនូវទុក្ខសោកនេះ? នេះ ជាប្រសាសន៍របស់ប្រធានាធិបតីអាមេរិកលោក Joe Biden នៅក្នុងសន្និសីទកំពូលស្តីពីការប្រែប្រួលអាកាសធាតុឆ្នាំ២០២១របស់អង្គការសហប្រជាជាតិ ដែលត្រូវបានគេស្គាល់ថា COP26 នោះ។ «ការប្រែប្រួលអាកាសធាតុ កំពុងធ្វើឲ្យពិភពលោកទទួលរងនូវផលប៉ះពាល់ជាខ្លាំង»។
លោកប្រធានាធិបតីសហរដ្ឋអាមេរិកបន្ថែមថា៖ «វាមិនមែនជាការគំរាមកំហែងដែលយើងស្មានទុកនោះឡើយ។ វាកំពុងបំផ្លាញនូវជីវិត និងជីវភាពរបស់ប្រជាពលរដ្ឋជារៀងរាល់ថ្ងៃ។ វាបានធ្វើឲ្យប្រទេសយើងទាំងអស់ចំណាយប្រាក់អស់រាប់លានលានដុល្លារ។ អាកាសធាតុក្តៅ និងភាពរាំងស្ងួតដែលមិនធ្លាប់មានពីមុនមក បានធ្វើឲ្យមានការឆេះព្រៃកាន់តែមានវិសាលភាពធំជាងមុន និងខ្លាំងជាងមុននៅក្នុងកន្លែងមួយចំនួន និងដំណាំដាំដុះមិនទទួលផលនៅកន្លែងដទៃផ្សេងៗទៀត។ គ្រោះទឹកជំនន់ដែលមិនធ្លាប់មានពីមុនមក និងព្យុះសង្ឃរា ដែលធ្លាប់តែកើតឡើងនៅរវាង១សតវត្សរ៍ម្តងនោះ នៅពេលនេះ វាបានកើតឡើងនៅរៀងរាល់ពីរបីឆ្នាំម្តង»។
ប៉ុន្តែទោះជាយ៉ាងនេះក្តី វាមានទិដ្ឋភាពវិជ្ជមានមួយចំពោះស្ថានភាពអាក្រក់នេះ។ លោកប្រធានាធិបតីលើកឡើងថា៖ «នៅក្នុងគ្រោះមហន្តរាយដែលកំពុងកើនមានឡើង យើងមានឱកាសដែលមិនគួរឲ្យជឿមួយ»។
លោក Biden ថ្លែងថា៖ «យើងកំពុងឈរនៅលើចំណុចរបត់មួយនៅក្នុងប្រវត្តិសាស្ត្ររបស់ពិភពលោក។ យើងមានសមត្ថភាពក្នុងការបង្កើតនូវអនាគតមួយដែលមានថាមពលសមភាពល្អមួយ គឺខ្យល់អាកាសដែលមានភាពបរិសុទ្ធជាងមុន សម្រាប់កូនចៅរបស់យើង សមុទ្រដែលមានសម្រស់ស្អាតជាងមុន ព្រៃឈើនិងប្រព័ន្ធបរិស្ថានដែលប្រសើរជាងមុន សម្រាប់ភពផែនដីរបស់យើង។ យើងអាចបង្កើតនូវបរិស្ថានមួយ ដែលជួយលើកកម្ពស់ជីវភាពរបស់ប្រជាជននៅជុំវិញពិភពលោក»។
ការបង្កើតនូវថាមពលស្អាតមួយធ្វើជាអាទិភាព ដែលរួមមានផ្ទាំងស្រូបពន្លឺព្រះអាទិត្យសូឡានិងទុរប៊ីនដែលដើរដោយកម្លាំងខ្យល់នោះ យើងកំពុងបង្កើនទីផ្សារថាមពលសម្រាប់ពេលអនាគត។ លោកប្រធានាធិបតី Biden និយាយថា «វាជារឿងបង្កើតការងារ»។
លោកប្រធានាធិបតីបន្តថា៖ «នេះគឺជារឿងរបស់ក្រុមការងារ ដែលត្រូវដាក់ពង្រាយបណ្តាញបញ្ជូនថាមពលដែលមានភាពធន់ ទំនើប និងមិនប៉ះពាល់បរិស្ថាន ក្រុមអ្នកផលិតរថយន្តជំនាន់ថ្មីដែលប្រើដោយចរន្តអគិ្គសនី និងក្រុមអ្នកជំនាញខាងអគ្គិសនី ដែលនឹងតំឡើងស្ថានីយសាកថ្មរថយន្តចំនួន៥សែនកន្លែងនៅទូទាំងសហរដ្ឋអាមេរិក ក៏ដូចជាក្រុមវិស្វករ ដែលនឹងបង្កើតនូវប្រព័ន្ធទាញយកសារធាតុកាបូនថ្មី និងក្រុមសាងសង់ដែលនឹងបង្កើតវាឲ្យចេញជារូបរាងនោះ។ ក្រុមកសិករ ដែលមិនគ្រាន់តែជាអ្នកជួយបំបាត់នូវភាពអត់ឃ្លានជាសាកលនោះទេ ប៉ុន្តែពួកគេ ក៏បានប្រើប្រាស់ផ្ទៃដី ដើម្បីប្រយុទ្ធប្រឆាំងនឹងការប្រែប្រួលអាកាសធាតុផងដែរ។ សហគមន៍នានា នឹងសម្របសម្រួលខ្លួនទៅនឹងឧស្សាហកម្មថ្មីនិងឱកាសថ្មីៗ»។
លោក Biden បានបន្ថែមទៀតថា៖ «នេះជាការប្រឈម នៅក្នុងពេលវេលានៃជីវិតរស់នៅរួមរបស់យើង។ វាជាការគំរាមកំហែងគំរាមកំហែងដល់ជីវិតមនុស្សក្នុងពេលបច្ចុប្បន្ន។ ហើយនៅពេលដែលយើងពន្យារពេលជារៀងរាល់ថ្ងៃនោះ ការខាតបង់ពីភាពអសកម្មវានឹងកើនមានឡើង»។
លោក Biden ថ្លែងបន្តថា៖ «ដូចនេះ សូមទុកឱកាសនេះ ដើម្បីយើងធ្វើការឆ្លើយតបទៅនឹងការអំពាវនាវរបស់ប្រវត្តិសាស្ត្រនៅទីកន្លែងនេះក្នុងទីក្រុង Glasgow ប្រទេសស្កុតលែន។ សូមទុកឱកាសនេះ ធ្វើជាការចាប់ផ្តើមនូវទសវត្សសម្រាប់ធ្វើសកម្មភាពផ្លាស់ប្តូរ ដើម្បីអភិរក្សភពផែនដីរបស់យើង និងបង្កើនគុណភាពនៃជីវភាពរស់នៅសម្រាប់មនុស្សនៅគ្រប់ទីកន្លែងទាំងអស់៕
