Accessibility links

Breaking News

បទវិចារណកថា៖ ការប្រឈម និង​ការទាក់ទង​ជាមួយ​ប្រទេសចិន


រូបឯកសារ៖ លោក Xi Jinping (ស្តាំ) និង​លោក Joe Biden នៅ​ពេល​ដែល​ពួកអស់លោក​ជា​អនុ​ប្រធានាធិបតី​ចិន និង​អនុ​ប្រធានាធិបតី​សហរដ្ឋ​អាមេរិក ក្នុង​អំឡុងពេល​នៃ​ការចរចា​មួយ​នៅ​សណ្ឋាគារ​មួយ​កន្លែង​នៅ​ទីក្រុង​ប៉េកាំង​ប្រទេស​ចិន ក្នុង​ពេល​កន្លង​ទៅ។
រូបឯកសារ៖ លោក Xi Jinping (ស្តាំ) និង​លោក Joe Biden នៅ​ពេល​ដែល​ពួកអស់លោក​ជា​អនុ​ប្រធានាធិបតី​ចិន និង​អនុ​ប្រធានាធិបតី​សហរដ្ឋ​អាមេរិក ក្នុង​អំឡុងពេល​នៃ​ការចរចា​មួយ​នៅ​សណ្ឋាគារ​មួយ​កន្លែង​នៅ​ទីក្រុង​ប៉េកាំង​ប្រទេស​ចិន ក្នុង​ពេល​កន្លង​ទៅ។

តទៅនេះ គឺជា​បទ​វិចារណកថា​ដែល​ឆ្លុះ​បញ្ចាំង​ពី​ទស្សនៈ​របស់​រដ្ឋាភិបាល​សហរដ្ឋ​អាមេរិក

លោក​ប្រធានាធិបតី​ Joe Biden បាន​ហៅ​ប្រទេស​ចិន​ថា ​ជា​«គូ​ប្រជែង​តឹងតែង​បំផុត»​ ហើយ​លោក​បាន​មាន​ប្រសាសន៍​ច្បាស់​ថា​ ​លោក​ប្រុងប្រៀប​នឹង​ប្រឈម​នឹង​ឧបសគ្គ​បង្កើត​ដោយ​ចិន។ លោក​ប្រធានាធិបតី​ Biden ​បាន​មាន​ប្រសាសន៍​ថា៖​

«យើង​នឹង​ប្រឈម​នឹង​ការ​រំលោភ​ខាង​សេដ្ឋកិច្ច​របស់​ប្រទេស​ចិន ​ទប់ទល់​នឹង​សកម្មភាព​គឃ្លើន​របស់​ចិន​ ទប់ទល់​ការ​វាយ​ប្រហារ​លើ​សិទ្ធិ​មនុស្ស​ដោយ​ប្រទេស​ចិន​និង​កម្មសិទ្ធិ​បញ្ញា​ និង​អភិបាល​កិច្ច​សាកល»។​

លោក​ប្រធានាធិបតី​ Biden ក៏​បាន​មាន​ប្រសាសន៍​ដែរ​ថា​ ស.រ.អ. ​ប្រុង​ប្រៀប​ទាក់​ទង​ជា​មួយ​ប្រទេស​ចិន​ «ដោយ​មាន​គោល​ជំហរ​នៃ​កម្លាំង»។​

លោក​រដ្ឋមន្ត្រី​ការបរទេស Anthony Blinken ​បាន​មាន​ប្រសាសន៍​នៅ​ក្នុង​សេចក្តី​សម្ភាសន៍​មួយ​កាល​ពី​ពេល​ថ្មីៗ​នេះ​ជា​មួយបណ្តាញ​ទូរទស្សន៍​ CNN​ ថា​ ​គោលជំហរ​នៃ​កម្លាំង​មាន​ន័យ​ថា​ ​សម្ព័ន្ធ​មិត្ត​ខ្លាំង។​ លោក​បាន​និយាយ​ថា៖ ​«នេះ​ជា​ប្រភព​នៃ​ការ​មាន​ប្រៀប​សម្រាប់​យើង​-- ​មិន​មែន​កាត់​បន្ថយ​សម្ព័ន្ធភាព​យើង​ទេ។ វា​មាន​ន័យ​ថា​ ​បង្ហាញ​ខ្លួន​ជាថ្មី​ទៀត​ក្នុង​ការ​ទាក់ទង​ក្នុង​ពិភពលោក​ ពីព្រោះ​បើ​យើងមិន​ធ្វើ​ដូច្នេះ​ទេ ​ប្រទេស​ចិន​នឹង​ធ្វើ​ដូច្នេះ»។​

លោក​រដ្ឋមន្ត្រី​ Blinken ​ក៏​បាន​គូស​បញ្ជាក់​ដែរ​ថា​ ធ្វើការ​ទាក់ទង​ដោយ​មាន​គោល​ជំហរ​នៃ​កម្លាំង​មាន​ន័យ​ថា ប្រកាន់​តាម​គុណ​ធម៌​របស់​យើង។​ លោក​រដ្ឋមន្ត្រី​ Blinken ​បាន​មាន​ប្រសាសន៍​ថា​ ​«គឺ​មិនមែន​បោះបង់​គុណ​ធម៌​របស់​យើង​ទេ ​នៅ​ពេល​យើង​ឃើញ​មាន​ការ​រំលោភ​លើ​សិទ្ធិ​ក្រុម​ជន​អំបូរ​ Uyghur ​នៅ​ក្នុង​តំបន់​ Xinjiang ​ឬ​ការ​រំលោភ​លើ​លទ្ធិ​ប្រជា​ធិបតេយ្យ​ក្នុង​ក្រុង​ហុងកុង​នោះ។​ វា​មាន​ន័យ​ថា​ ធ្វើ​ឱ្យ​ប្រាកដ​ថា​ ​យើង​មាន​ជំហរ​ខាង​យោធា​ដើម្បី​កម្ចាត់​អំពើ​ឈ្លានពាន ​ហើយ​វា​មានន័យ​ថា​ ធ្វើ​វិនិយោគ​លើ​ប្រជារាស្ត្រ​យើង​ផ្ទាល់ ​ដើម្បី​ឱ្យ​ពួក​គេ​អាច​ប្រកួត​ដោយ​មាន​ប្រសិទ្ធភាព»។​

នៅ​ក្នុង​ការ​សន្ទនា​តាម​ទូរស័ព្ទ​រវាង​លោក​រដ្ឋមន្ត្រី ​Blinken ​និង​ប្រមុខ​ការ​ទូត​ចិន​ គឺ​លោក​ Yang Jiechi ​លោក ​Blinken ​បាន​គូស​បញ្ជាក់​ថា​ ​ស.រ.អ. ​នឹង​បន្ត​គាំទ្រ​សិទ្ធិ​មនុស្ស​និង​គុណធម៌​ប្រជា​ធិបតេយ្យ​នៅ​ក្នុង​ក្រុង​ហុងកុង​ នៅ​ដែនដី​ទីបេ និង​នៅ​តំបន់ ​Xinjiang។ លោក​បានកត់​សម្គាល់​ថា ​ស.រ.អ. ​នឹង​ធ្វើការ​ជា​មួយ​ពួក​សម្ព័ន្ធ​មិត្ត​និង​ពួក​ដៃគូ​ក្នុង​ការ​ការពារ​គុណធម៌ ​និង​ប្រយោជន៍​រួម​របស់​យើង​ក្នុង​ការ​ធ្វើ​ឱ្យ​សាធារណរដ្ឋ​ប្រជាមានិត​ចិន​ ទទួល​ខុស​ត្រូវ​ដល់​កិច្ច​ខិត​ខំប្រឹង​ប្រែង​របស់​ខ្លួន​ក្នុង​ការ​គំរាម​កំហែង​ដល់​ស្ថិរភាព​ក្នុង​តំបន់​ឥណ្ឌូ-ប៉ាស៊ីហ្វិក​ដោយ​មាន​រួម​បញ្ចូល​ទាំង​ការ​ឆ្លង​កាត់​ច្រក​សមុទ្រ​តៃវ៉ាន់​ផង​ដែរ។​ លោក​ក៏​បាន​ជំរុញ​ប្រទេស​ចិន​ឱ្យ​ចូល​រួម​ជា​មួយ​សហគមន៍​អន្តរជាតិ​ក្នុង​ការ​ថ្កោលទោស​រដ្ឋប្រហារ​របស់​យោធា​ក្នុង​ប្រទេស​ភូមា។​

លោក​រដ្ឋមន្ត្រី ​Blinken ​បាន​មាន​ប្រសាសន៍​ប្រាប់​បណ្តាញ​ទូរទស្សន៍​ CNN ​ថា៖ ​«លោក​ប្រធានាធិបតី ​បាន​មាន​ប្រសាសន៍​ច្បាស់លាស់​ណាស់​ថា​ ​លោក​ចង់​ដាក់​សិទ្ធិ​មនុស្ស​និង​លទ្ធិ​ប្រជា​ធិបតេយ្យ​ជា​ស្នូល​នៃ​គោល​នយោបាយ​ការ​បរទេស​របស់​យើង។ ​ហើយ​ដូច្នេះ​ ទោះ​ជា​ប្រទេស​ចិន​ ឬ​ប្រទេស​ណា​ក៏​ដោយ​ ​បើ​យើង​មាន​កង្វល់​ខ្លាំង​និង​ធ្ងន់ធ្ងរសិទ្ធិ​មនុស្ស​និង​លទ្ធិ​ប្រជា​ធិបតេយ្យ​ជា​អ្វី​ដែល​នៅ​ជួរ​មុខ​ និង​ជា​ស្នូល​នៃ​គោល​នយោបាយ​ការ​បរទេស​របស់​យើង»៕

XS
SM
MD
LG