តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
នៅពេលស្ត្រីចូលរួមពេញលេញក្នុងការផ្តើមគំនិតនិងការចរចាសន្តិភាពនិងសន្តិសុខ កិច្ចព្រមព្រៀងសន្តិភាពទំនងជាមាន៣៥ភាគរយជាងថា អាចស្ថិតស្ថេរបានយ៉ាងតិចបំផុត១៥ឆ្នាំ។
ដោយសារមូលហេតុខាងលើនេះហើយបានជារដ្ឋាភិបាលសហរដ្ឋអាមេរិកបានចេញផ្សាយកាលពីចុងខែតុលានូវយុទ្ធសាស្ត្រនិងសកម្មភាពជាតិរបស់សហរដ្ឋអាមេរិកឆ្នាំ២០២៣ ស្តីពីស្ត្រី សន្តិភាព និងសន្តិសុខ។ គំនិតនេះ គឺផ្តល់អាទិភាពដល់សមភាពយេនឌ័រនិងភាពស្មើគ្នាក្នុងការកសាងសន្តិភាពស្ថិតស្ថេរនៅទូទាំងពិភពលោកនិងឧបត្ថម្ភផ្ចុងផ្តើមការចូលរួមរបស់ស្ត្រីក្នុងការឆ្លើយតបនឹងជម្លោះនិងវិបត្តិ និងពីការរើបចេញពីសង្គ្រាមនិងវិបត្តិ។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បាននិយាយថា៖ «នៅ ពេលសិទ្ធិស្ត្រីត្រូវបានគោរព យើងដឹងថា សង្គមមានសុវត្ថិភាពជាងមុន។ សង្គមមានស្ថិរភាពជាងមុន។ សង្គមមានវិបុលភាពជាងមុន។ កងកម្លាំងថែរក្សាសន្តិភាព និងកងកម្លាំងសន្តិសុខដែលមានរួមបញ្ចូលស្ត្រីអាចកសាងការទុកចិត្តល្អប្រសើរជាងមុនជាមួយសហគមន៍ដែលពួកគេការពារ»។
លោកបានថ្លែងទៀតថា៖ «នៅពេល...កំពុងមានជម្លោះ ពីទ្វីបអឺរ៉ុបទៅតំបន់ Levant ទៅដល់តំបន់ Sahel ដែលជាតំបន់សំខាន់នៅតំបន់មជ្ឈិមបូព៌ា យុទ្ធសាស្ត្រនេះបញ្ជាក់ជាថ្មីទៀតអំពីសារៈសំខាន់នៃការចូលរួមដ៏ន័យរបស់ស្រ្តីក្នុងដំណើរការសន្តិភាពនិងការចរចាសន្តិភាពក្នុងពេលអនាគតដើម្បីកាត់បន្ថយអំពើហិង្សានិងកសាងសង្គមជាថ្មីឱ្យមានប្រសិទ្ធភាព»។
លោករដ្ឋមន្ត្រី Blinken បានមានប្រសាសន៍ថា យុទ្ធសាស្ត្រនេះមានការប្រឹងប្រែងប្រាំយ៉ាង។ លោកបាននិយាយថា៖ «ទីមួយ យើងនឹងបង្កើនភាពជាមេដឹកនាំរបស់ស្ត្រីនិងការចូលរួមរបស់ស្ត្រីក្នុងការផ្តើមគំនិតខាងសន្តិភាពនិងខាងសន្តិសុខនៅខាងក្នុងរដ្ឋាភិបាលសហរដ្ឋអាមេរិក និងនៅទូទាំងពិភពលោកផងដែរ»។
លោកបានពោលថា៖ «ទីពីរ យើងនឹងការពារនិងឧបត្ថម្ភផ្ចុងផ្តើមសិទ្ធិមនុស្សរបស់ស្ត្រី និងកុមារី និងជួយបញ្ចៀសនិងដោះស្រាយអំពើហិង្សាផ្អែកលើយេនឌ័រនៅក្នុងសង្គ្រាមនិងនៅក្នុងវិបត្តិឯទៀតៗ»។
លោករដ្ឋមន្ត្រី Blinken បានមានប្រសាសន៍ថា៖ «ទីបី យើងនឹងធ្វើសកម្មភាពច្រើនជាងមុនដើម្បីបញ្ចូលទស្សនៈនិងមតិរបស់ស្ត្រីនៅពេលយើងផ្តល់ជំនួយសង្គ្រោះក្រោយសង្គ្រាមនិងមហន្តរាយធម្មជាតិ ហើយយើងនឹងធ្វើឱ្យប្រាកដថា ជំនួយមនុស្សធម៌របស់យើងមានសមធម៌និងបានទៅដល់ពួកជនរងគ្រោះជាងមុន»។
លោកបាននិយាយថា៖ «ទីបួន យើងនឹងធ្វើឱ្យគោលនយោបាយការបរទេសនិងគោលនយោបាយសន្តិសុខជាតិរបស់សហរដ្ឋអាមេរិកមានបរិយាប័ន្នជាងមុន។ ហើយទីប្រាំ «យើងនឹងបង្កើនការសហការរបស់យើងជាមួយពួកដៃគូនៅទូទាំងពិភពលោក»។
លោករដ្ឋមន្ត្រី Blinken បានថ្លែងថា៖ «យើងនឹងធ្វើឱ្យសម្រេចគោលដៅទាំងនេះដោយឧបត្ថម្ភផ្ចុងផ្តើមពួកមេដឹកនាំក្នុងមូលដ្ឋាន ដោយប្រយុទ្ធប្រឆាំងនឹងអសមភាពជាប្រវត្តិសាស្ត្រនិងជាប្រព័ន្ធ ដោយដោះស្រាយទម្រង់នៃការរើសអើងដែលត្រូវបានប្រឈមដោយស្ត្រីមិនមែនស្បែកស ស្ត្រីមានកាយវិកល ក្រុមសមាជិកនៃសហគមន៍ LGBTQI+ និងក្រុមជនទុគ៌ត និងក្រុមមនុស្សមានភាពតំណាងមិនគ្រប់គ្រាន់»។
លោករដ្ឋមន្ត្រី Blinken បានមានប្រសាសន៍ថា៖ «ប្រវត្តិសាស្ត្របានប្រាប់យើងម្តងហើយម្តងទៀតថា នៅពេលស្ត្រីមានសុវត្ថិភាពនិងសេរីភាព...និងត្រូវចាត់ទុកជាមនុស្សមានភាពស្មើគ្នា ពិភពលលោកទាំងមូលនឹងល្អប្រសើរជាងមុន។ នេះជាការងាយស្រួលយល់និងមានកម្លាំងខ្លាំង។ ដូច្នេះ ដោយធ្វើការជាមួយគ្នា ខ្ញុំជឿជាក់ថា យើងអាចកសាងពិភពលោកមួយល្អប្រសើរជាងមុន»៕
