តទៅនេះ គឺជាបទវិចារណកថាដែលឆ្លុះបញ្ចាំងអំពីឧត្តមគតិនិងស្ថាប័នអាមេរិក
នៅថ្ងៃនេះ ប្រជាពលរដ្ឋអាមេរិកប្រារព្ធខួបលើកទី២៤៨ នៃការបង្កើតសហរដ្ឋអាមេរិក។ នៅថ្ងៃទី៤ ខែកក្កដា ឆ្នាំ១៧៧៦ សភានៅជំនាន់នោះដែលហៅថា Continental Congress ដែលនៅពេលនោះជាអង្គគ្រប់គ្រងដែនដីក្រោមអាណានិគមអង់គ្លេសចំនួន១៣ បានអនុម័តពាក្យចុងក្រោយនៃសេចក្តីប្រកាសឯករាជ្យ។ តាមរយៈសកម្មភាពនេះ ដែនដីក្រោមអាណានិគមអង់គ្លេសទាំង១៣ ដែលក្រោយមកបានក្លាយជារដ្ឋ១៣នោះ បានប្រកាសឱ្យពិភពលោកបានដឹងអំពីការប្រកាសឯករាជ្យរបស់ខ្លួនពីចក្រភពអង់គ្លេស។
ទោះបីជាត្រូវបានសរសេរឡើងជាងមួយឆ្នាំបន្ទាប់ពីសង្គ្រាមប្រយុទ្ធដើម្បីឯករាជ្យរបស់អាមេរិកបានចាប់ផ្តើមក៏ដោយ ក៏ការប្រកាសឯករាជ្យនោះបាន បង្កើតគំនិតបដិវត្តន៍ពីរ។ ទីមួយ ដោយក្នុងកាលៈទេសៈជាក់លាក់ណាមួយ ក្នុងករណីនេះគឺសំដៅដល់«ការរងរបួស និងការដកហូត»សិទ្ធិ និងសេរីភាពរបស់អាណានិគមអាមេរិកដោយរដ្ឋាភិបាលរបស់ព្រះមហាក្សត្រ George III «វាជាការចាំបាច់សម្រាប់មនុស្សម្នាក់រំលាយក្រុមនយោបាយដែលបានភ្ជាប់ពួកគេជាមួយក្រុមផ្សេងទៀត»។
ទីពីរគឺការបញ្ជាក់ថា មនុស្សគ្រប់រូបត្រូវបានបង្កើតឡើងដោយស្មើៗគ្នា។ ឃ្លានេះ ត្រូវបានបកស្រាយជាន័យធម្មតាថា មនុស្សគ្រប់រូបមានសិទ្ធិពីកំណើតមួយចំនួន រួមទាំងសិទ្ធិទទួលបានសេចក្តីថ្លៃថ្នូរស្មើៗគ្នា។ សិទ្ធិត្រូវបានគេចាត់ទុកស្មើនឹងពលរដ្ឋផ្សេងទៀត និងសិទ្ធដើម្បីទទួលបានឱកាសត្រឹមត្រូវក្នុងការបង្កើតជីវិតដ៏ល្អសម្រាប់ខ្លួនឯង គឺជាចំណុចកណ្តាលនៃគោលការណ៍ដែលគាំទ្រដល់ការបង្កើតសហរដ្ឋអាមេរិក។ សិទ្ធទាំងនេះគឺជាមូលដ្ឋានគ្រឹះនៃរដ្ឋធម្មនុញ្ញសហរដ្ឋអាមេរិកដែលជាច្បាប់កំពូលរបស់ប្រទេស។
ហើយខណៈពេលដែលជារឿយៗ យើងបានបរាជ័យក្នុងការធ្វើតាមគោលការណ៍ទាំងនោះ ការបរាជ័យដ៏គួរឱ្យភ្ញាក់ផ្អើលបំផុតគឺទាសភាពដែលកើតមានឡើងក្នុងរយៈពេល៨០ឆ្នាំក្រោយពីការប្រកាសឯករាជ្យត្រូវបានសរសេរឡើង វាបានសាបព្រួសគ្រាប់ពូជនៃការផ្លាស់ប្តូរដែលប៉ុន្មានឆ្នាំមកនេះលុបបំបាត់ការបរាជ័យដូចនោះ។ ហើយសហរដ្ឋអាមេរិកបន្តផ្លាស់ប្តូរដូច្នេះទៀត នៅពេលដែលបញ្ហាប្រឈមថ្មីៗកើតឡើង។
ប្រធានាធិបតីសហរដ្ឋអាមេរិកលោក Joe Biden បាននិយាយថា «នៅថ្ងៃនេះ យើងអបអរសាទរទិវាបុណ្យឯករាជ្យរបស់យើង។ យើងអបអរសិទ្ធសេរីភាពរបស់យើង»។
លោក Biden បានបន្តទៀតថា៖ «ខណៈដែលប្រជាជាតិផ្សេងទៀតត្រូវបានបង្កើតឡើងដោយផ្អែកលើអ្វីៗមួយចំនួនដូចជា ភូមិសាស្ត្រ ជាតិសាសន៍ សាសនា អាមេរិកគឺជាប្រជាជាតិតែមួយគត់នៅក្នុងប្រវត្តិសាស្ត្រដែលបានបង្កើតឡើងនៅលើគំនិតមួយ គឺគំនិតមួយ។ ហើយនោះគឺថា យើងប្រកាន់យកការពិតទាំងនេះ ដើម្បីបង្ហាញឱ្យឃើញដោយខ្លួនឯងថា មនុស្សទាំងអស់ត្រូវបានបង្កើតឡើងស្មើៗគ្នា មនុស្សទាំងអស់ត្រូវបានផ្តល់សិទ្ធិដែលមិនអាចកាត់ផ្តាច់បានដែលក្នុងចំណោមនោះមានដូចជា ជីវិត សេរីភាព និងការស្វែងរកសុភមង្គល»។
លោក Biden បាននិយាយបន្ថែមទៀតថា៖ «យើងមិនបានធ្វើតាមពាក្យទាំងនោះគ្រប់ពេលនោះទេ ក៏ប៉ុន្តែ យើងមិនដែលដើរចេញពីពាក្យទាំងនោះទេ។ ហើយថ្ងៃនេះ និងរាល់ថ្ងៃ យើងត្រូវនិយាយឱ្យបានច្បាស់ថា៖ យើងនឹងមិនដើរចេញពីពាក្យទាំងនោះទេ គឺយើងនឹងមិនដើរចេញពីពាក្យទាំងនោះទេ»៕
