តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ប្រទេសរុស្ស៊ី នៅតែបន្តការបង្ក្រាបរបស់ខ្លួនលើសេរីភាពសាសនា ជាពិសេសបានយកជាទីដៅនូវនិកាយសាសនា និងអង្គការរបស់ពួកជនជាតិភាគតិច។ និកាយ Jehovah’s Witnesses បានក្លាយជាទីដៅនៃការធ្វើទុក្ខបុកម្នេញដោយអាជ្ញាធរ។
កាលពីពេលថ្មីៗនេះ តុលាការរុស្ស៊ីមួយ បានកាត់ទោសលោក Aleksandr Ivshin នៃនិកាយ Jehovah’s Witnesses ឱ្យជាប់ពន្ធនាគារ៧ឆ្នាំកន្លះ ដោយសារការប្រតិបត្តិសាសនារបស់លោក។ នេះ ជាការកាត់ទោសធ្ងន់បំផុតចាប់តាំងពីតុលាការកំពូលរុស្ស៊ី បានសម្រេចកាលពីឆ្នាំ២០១៧ ហាមប្រាមសកម្មភាពរបស់និកាយ Jehovah’s Witnesses និងបានចាត់ទុកសកម្មភាពទាំងនេះថា ជាអំពើឧក្រិដ្ឋដោយបានហៅក្រុមសាសនានេះថា ជា«ពួកជ្រុលនិយម»។ អ្វីដែលហៅថា អាកប្បកិរិយាជ្រុលនិយមរបស់លោក Ivshin មានរួមបញ្ចូលការចាត់ចែងការសិក្សាគម្ពីរ Bible តាមអនឡាញជាមួយសមាជិកឯទៀតៗរបស់ក្រុមនេះ។
កាលពីថ្ងៃទី១០ ខែកុម្ភៈ ប៉ូលិសក្នុងក្រុងម៉ូស្គូនិងតំបន់ជិតខាងទីនោះ បានឆែកឆេរផ្ទះ១៥ខ្នងនៃសមាជិកនិកាយ Jehovah’s Witnesses ហើយបានឃាត់ខ្លួនសមាជិកមួយចំនួនរបស់និកាយនេះ ដើម្បីសាកសួរចម្លើយ។ សមាជិកបីនាក់នៅតែជាប់ឃុំឃាំងនៅឡើយ។ នៅថ្ងៃតែមួយនោះដែរ តុលាការមួយក្នុងតំបន់ Kursk បានបដិសេធមិនព្រមដោះលែងសមាជិកសញ្ជាតិដាណាម៉ាកម្នាក់នៃនិកាយ Jehovah’s Witnesses ដែលបានជាប់ពន្ធនាគារ៦ឆ្នាំមកហើយ ចាប់តាំងពីឆ្នាំ២០១៧មក។
នេះជាផ្នែកនៃគំរូមួយនៃការបង្ក្រាបដែលបានកើនខ្លាំងឡើងៗ កាលពីប៉ុន្មានឆ្នាំថ្មីៗនេះ។ បើតាមគណៈកម្មការសហរដ្ឋអាមេរិកស្តីពីសេរីភាពសាសនាអន្តរជាតិថា កាលពីឆ្នាំ២០១៩ រដ្ឋាភិបាលរុស្ស៊ីបាន «បន្តយកធ្វើជាទីដៅនូវពួកជនភាគតិចខាងសាសនា «មិនតាមប្រពៃណី» ដោយឱ្យបង់ប្រាក់ពិន័យ ការចាប់ឃុំឃាំង និងការចោទប្រកាន់ពីបទព្រហ្មទណ្ឌដោយយកលេសថា ប្រយុទ្ធប្រឆាំងនឹងភាពនិយមជ្រុល។ ច្បាប់រុស្ស៊ីចាត់ទុក«ភាពជ្រុលនិយម» ជាបទឧក្រិដ្ឋដោយមិនបានផ្តល់និយមន័យឱ្យបានគ្រប់គ្រាន់អំពីពាក្យនេះឡើយ ដែលអាចឱ្យរដ្ឋធ្វើការចោទប្រកាន់អំពីសកម្មភាពសាសនាអហិង្សា។
បើតាមការរាយការណ៍នៅក្នុងកាសែតនិងដោយអង្គការក្រៅរដ្ឋាភិបាលខាងសិទ្ធិមនុស្សបានឲ្យដឹងថា ស្ថានភាពរឹតតែអាក្រក់ជាងមុនកាលពីឆ្នាំទៅមិញ។ គេបានរាយការណ៍ថា ពួកប៉ូលិសរុស្ស៊ី បានឆ្មក់ចូលលុកលុយក្នុងផ្ទះឯកជន១ពាន់ ២រយ ៩៦ខ្នង បានរៀបចំបណ្តឹងពីបទឧក្រិដ្ឋប្រឆាំងសមាជិក៤៣៥នាក់នៃនិកាយ Jehovah’s Witnesses សមាជិក៤២នាក់នៃនិកាយសាសនានេះ កំពុងជាប់ឃុំឃាំងក្នុងគុក ហើយ២៧នាក់ទៀតជាប់ឃុំឃាំងនៅក្នុងផ្ទះ។ ទ្រព្យសម្បត្តិរបស់ព្រះវិហារនៃនិកាយសាសនានេះ ត្រូវបានរឹបអូស ហើយសមាជិកចន្លោះពី៥ពាន់ ទៅ១ម៉ឺនាក់នៃនិកាយសាសនានេះ បានរត់គេចខ្លួនទៅប្រទេសក្រៅ ចាប់តាំងពីឆ្នាំ២០១៧មកដែលជាលទ្ធផលនៃការធ្វើទុក្ខបុកម្នេញនេះ។
លោក Ned Price អ្នកនាំពាក្យនៃក្រសួងការបរទេសសហរដ្ឋអាមេរិក បាននិយាយនៅក្នុងសេចក្តីថ្លែងការណ៍មួយថា «សហរដ្ឋអាមេរិក ថ្កោលទោសយ៉ាងខ្លាំងដល់ការបង្ក្រាបដោយអាជ្ញាធររុស្ស៊ីដែលនៅមានធ្វើតទៅទៀតទៅលើនិកាយ Jehovah’s Witnesses និងពួកជនភាគតិចខាងសាសនាឯទៀតៗ។ សហរដ្ឋអាមេរិកបញ្ជាក់ថា ដោយជាបញ្ហាសិទ្ធិមនុស្សមនុស្សគ្រប់គ្នា មានសិទ្ធិមាន ឬគ្មានជំនឿសាសនាតាមសម្បជញ្ញៈរបស់ពួកគេ»៕
