តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិក មានការខ្វាយខ្វល់យ៉ាងខ្លាំងអំពីការសម្រេចរបស់អាជ្ញាធររុស្ស៊ីនៅក្នុងការកាត់ទោសមេដឹកនាំគណបក្សប្រឆាំងលោក Aleksey Navalny ឲ្យជាប់ពន្ធនាគារ ២ ឆ្នាំ ៨ ខែ ដោយជំនួសការព្យួរទោសលោក មកជាការជាប់ពន្ធនាគារ។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បានបញ្ជាក់នៅក្នុងសេចក្ដីថ្លែងការណ៍មួយថា ដូចពលរដ្ឋរុស្ស៊ីគ្រប់រូបដែរ លោក Navalny មានសិទ្ធិស្របតាមរដ្ឋធម្មនុញ្ញរបស់ប្រទេសរុស្ស៊ី។
ជាងនេះទៀត ប្រទេសរុស្ស៊ីមានកាតព្វកិច្ចអន្តរជាតិនៅក្នុងការគោរពភាពស្មើគ្នាចំពោះមុខច្បាប់ និងសិទ្ធិនៅក្នុងការមានសេរីភាពបញ្ចេញមតិ និងការជួបជុំដោយសន្តិវិធី។
ក្នុងអំឡុងពេលសវនាការមុនពេលកាត់ទោសលោក លោក Navalny បានលើកឡើងថា ទោះបីជាអាជ្ញាធរអាចឃុំឃាំងលោកក៏ដោយ ក៏ «[ពលរដ្ឋរុស្ស៊ី] រាប់សែននាក់ មិនអាចត្រូវបានគេឃុំឃាំងនោះឡើយ។ ពលរដ្ឋកាន់តែច្រើន នឹងដឹងអំពីរឿងនេះ។ ហើយនៅពេលដែលពួកគេដឹងអំពីរឿងនេះ ហើយពេលនោះប្រាកដជាមកដល់ នោះរឿងទាំងអស់នេះនឹងបរាជ័យ ដោយសារតែអ្នកមិនអាចឃុំឃាំងមនុស្សពេញមួយប្រទេសបាននោះទេ»។
ពលរដ្ឋរុស្ស៊ីរាប់ម៉ឺននាក់នៅតាមទីក្រុង និងក្រុងជាង ១២០ បានចេញមកតវ៉ាដោយសន្តិវិធីក្នុងពេលកន្លងមក ដើម្បីប្រឆាំងនឹងការចាប់ខ្លួនលោក Navalny និងទាមទារឲ្យមានការដោះលែងរូបលោក។
លោករដ្ឋមន្ត្រី Blinken បានអំពាវនាវជាថ្មីម្ដងទៀតឲ្យរដ្ឋាភិបាលរុស្ស៊ីដោះលែងជាបន្ទាន់និងគ្មានលក្ខខណ្ឌនូវលោក Navalny និងពលរដ្ឋរុស្ស៊ីរាប់រយនាក់ផ្សេងទៀត ដែលត្រូវបានអាជ្ញាធរចាប់ដាក់ឃុំដោយខុសច្បាប់នៅក្នុងពេលប៉ុន្មានសប្ដាហ៍ថ្មីៗនេះ ដោយសារតែពួកគេបានអនុវត្តសិទ្ធិរបស់ខ្លួន ដែលក្នុងនោះមានទាំងសិទ្ធិបញ្ចេញមតិនិងសិទ្ធិជួបជុំដោយសន្តិវិធីផងដែរ។
តុលាការសិទ្ធិមនុស្សអឺរ៉ុបបានសន្និដ្ឋានថា ការផ្តន្ទាទោសលោក Navalny កាលពីឆ្នាំ ២០១៤ ដែលជាមូលដ្ឋានសម្រាប់ការកាត់ទោសថ្មីនេះ គឺ «ខុសច្បាប់ និងធ្វើតាមទំនើងចិត្ត» និង «មានចរិតនយោបាយ»។
នីតិវិធីបច្ចុប្បន្នប្រឆាំងនឹងលោក Navalny ដែលបានចាប់ផ្ដើមឡើងដោយការឃុំខ្លួនលោកកាលពីថ្ងៃទី ១៧ ខែមករា គឺជាការបន្តនូវកិច្ចប្រឹងប្រែងដើម្បីបំពានលើសិទ្ធិរបស់លោក Navalny និងគាបសង្កត់លើពហុភាពនយោបាយ ដូចដែលតុលាការសិទ្ធិមនុស្សអឺរ៉ុបបានរកឃើញពីមុនដូច្នេះដែរ។
លោករដ្ឋមន្ត្រី Blinken បាននិយាយថា៖ «ទោះបីជាយើងធ្វើការជាមួយនឹងប្រទេសរុស្ស៊ីដើម្បីជំរុញទៅមុខនូវផលប្រយោជន៍របស់សហរដ្ឋអាមេរិកក៏ដោយ ក៏យើងនឹងសម្របសម្រួលយ៉ាងជិតស្និទ្ធជាមួយនឹងសម្ព័ន្ធមិត្តនិងដៃគូរបស់យើង ដើម្បីឲ្យរុស្ស៊ីទទួលខុសត្រូវសម្រាប់ការបរាជ័យនៅក្នុងការគោរពសិទ្ធិរបស់ពលរដ្ឋរបស់ខ្លួន»៕
