តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
បើតាមអង្គការសហប្រជាជាតិថា ការគំរាមកំហែងសាកលបង្កឡើងដោយភេរវកម្មកើនច្រើនជាងមុន ហើយមានការរាលដាលជាងមុនផងដែរ។ ការណ៍នេះត្រូវមានរបៀបដោះស្រាយរួមគ្នាមួយជាថ្មីដើម្បីយកជ័យជម្នះលើវា។
លោកស្រី Victoria Nuland អនុរដ្ឋមន្ត្រីការបរទេសស.រ.អ.ទទួលបន្ទុកកិច្ចការនយោបាយបាននិយាយថា៖ «កាលពីឆ្នាំទៅមិញ ពិភពលោកប្រឈមនឹងឧប្បត្តិហេតុភេរវកម្មជាង៨ពាន់ នៅក្នុងប្រទេស៦៥ បណ្តាលឱ្យមនុស្សជាង២៣.០០០នាក់ស្លាប់»។
លោកស្រី Nuland និយាយថា៖ «ការវាយប្រហារកាលពីពេលថ្មីៗនេះនៅទូទាំងពិភពលោក ដូចជាការបំផ្ទុះគ្រាប់បែកនៅឯស្ថានីយ៍ប៉ូលីសមួយក្នុងប្រទេសឥណ្ឌូណេស៊ី ការប៉ុនប៉ងធ្វើរដ្ឋប្រហារនៅប្រទេសអាល្លឺម៉ង់ និងឧប្បត្តិហេតុសម្អប់នៅក្នុងប្រទេសយើង រំឭកយើងថា គ្មានប្រទេសណាមួយមានសុវត្ថិភាពពីការគំរាមកំហែងនេះទេ ហើយភេរវកម្មមិនអាចបរាជ័យបានដោយប្រទេសណាមួយ ឬដោយប្លុកតំបន់ណាមួយធ្វើការងារនេះតែឯងបានទេ។ យើងត្រូវតែធ្វើការជាមួយគ្នា។
យើងត្រូវតែដោះស្រាយបញ្ហាទាំងនេះរួមគ្នា តាំងពីក្រោម និងកន្លែងគ្មានការគ្រប់គ្រងដែលអាចឋិតនៅក្រោមការត្រួតត្រារបស់ពួកភេរវជន រហូតដល់ស្ថានភាពអស់សង្ឃឹមដែលអាចស្រួលសម្រាប់ការជ្រើសរើសភេរវជន រហូតដល់ប្រភពហិរញ្ញវត្ថុមិនត្រឹមត្រូវតាមច្បាប់ រហូតដល់ការផ្សព្វផ្សាយមនោគមវិជ្ជាផ្ទុយនឹងសីលធម៌តាម online និងឆ្លងកាត់ព្រំដែន»។
ព្រឹត្តិការណ៍មួយក្នុងចំណោមព្រឹត្តិការណ៍នានាកាលពីពេលថ្មីៗនេះគូសបញ្ជាក់ដោយអ.ស.ប.គឺកំណើន៣២០ភាគរយនៃភាពជ្រុលនិយមឃោរឃៅខាងពូជសាសន៍ ដោយមានការភ្ជាប់ទាក់ទងគ្នារវាងក្រុមផ្សេងៗ។
លោកស្រី Nuland បានថ្លែងថា៖ «មនោគមវិជ្ជានេះដែលមានឫសគល់ក្នុងសម្អប់យូរយារមកហើយដូចជាការស្អប់ជនបរទេស ការរើសអើងពូជសាសន៍ ការប្រឆាំងនឹងពួកជនអំបូរជ្វីហ្វ និងទម្រង់ទាំងអស់នៃការប្រកាន់ថា ខ្លួនត្រូវទាំងអស់ បានរកឃើញបុព្វហេតុរួមគ្នាតាម online ជាមួយពួកសមាជិកថ្មីៗដែលត្រូវបានជ្រើសរើសតាមរយៈវេទិកាបណ្តាញផ្សព្វផ្សាយសង្គមនិងរូបថតក្លែងបន្លំ បណ្តាលឱ្យមានការផ្សាយព័ត៌មានមិនពិតនិងសម្អប់»។
លោកស្រីអនុរដ្ឋមន្ត្រី Nuland បានពោលទៀតថា៖ «ដូច្នេះ វាជាការណ៍សំខាន់ណាស់ដែលយើងត្រូវបង្កើនសមត្ថភាពរួមគ្នារបស់យើងដើម្បីរកឱ្យឃើញ បន្ថយនិងឆ្លើយតបនឹងការគំរាមកំហែងថ្មីៗទាំងនេះ។ ដើម្បីឱ្យមានប្រសិទ្ធភាពពិតប្រាកដ ការប្រឆាំងនឹងភេរវកម្មត្រូវតែមានការប្រឹងប្រែងរបស់រដ្ឋាភិបាលនិងសង្គមទាំងមូល»។
លោកស្រីបានពោលថា៖ «យើងត្រូវតែធ្វើឱ្យមានអភិបាលកិច្ចល្អ ការគោរពសិទ្ធិមនុស្ស ឱ្យមានការសិក្សាអប់រំ ការថែទាំសុខភាព និងឱកាសសេដ្ឋកិច្ច។ យើងត្រូវតែគាំទ្ររដ្ឋាភិបាលនិងលទ្ធភាពរបស់ពួកគេក្នុងការបម្រើពលរដ្ឋរបស់ពួកគេ។ នេះជាគន្លឹះសម្រាប់បំបែកភាពវិលវល់ឡើងចុះដដែលៗនៃភាពជ្រុលនិយមហិង្សា...ព្រោះហេតុនេះហើយបានជាយើងផ្តោតការយកចិត្តទុកដាក់លើការអនុវត្តក្របខណ្ឌប្រឆាំងនឹងភេរវកម្មមាំទាំបច្ចុប្បន្ន ដោយផ្តោតលើរបៀបដោះស្រាយនៃសង្គមទាំងមូល»។
លោកស្រីអនុរដ្ឋមន្ត្រី Nuland បានមានប្រសាសន៍ថា៖ «គោលដៅដូចគ្នាទាំងអស់របស់យើងកំពុងត្រូវដាក់ឱ្យមានគ្រោះថ្នាក់ដោយការគំរាមកំហែងផ្ទុយនឹងសីលធម៌នៃភេរវកម្ម ហើយក៏ជាការណ៍ពិតដែរដែលប្រសិនបើយើងធ្វើឱ្យមានការជឿនលឿនប្រឆាំងនឹងគោលដៅទាំងនេះ យើងអាចកម្ចាត់ភេរវកម្មបាន»។
លោកស្រីបាននិយាយថា៖ «យើងសុំដល់សហគមន៍អន្តរជាតិឱ្យរួបរួមគ្នាដើម្បីដោះស្រាយបញ្ហាភេរវកម្ម...ហើយផលវិបាកនៃការគ្មានជោគជ័យមិនត្រូវទទួលបានដោយយើងឡើយ»៕
