តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
រដ្ឋមន្ត្រីការបរទេសសហរដ្ឋអាមេរិកលោក Antony Blinken បានព្រមានថា តំបន់នីមួយៗក្នុងពិភពលោកកំពុងជួបប្រទះផលប៉ះពាល់ដ៏គ្រោះថ្នាក់នៃវិបត្តិបម្រែបម្រួលអាកាសធាតុ។ ក្នុងការធ្វើដំណើរទៅកាន់ប្រទេសហ្វីលីពីនកាលពីពេលថ្មីៗនេះ លោកបានកត់សម្គាល់ថា៖ «ហ្វីលីពីនងាយរងគ្រោះជាពិសេស។ ប្រទេសរបស់លោកអ្នកកំពុងប្រឈមនឹងព្យុះទីហ្វុងដែលកាន់តែធំ ការធ្លាក់ភ្លៀងខ្លាំង ការកើនឡើងនៃសីតុណ្ហភាព និងការកើនកម្ពស់ទឹកសមុទ្រ។
កាលពីឆ្នាំមុន ប្រទេសហ្វីលីពីនបានប្រកាសគោលដៅថាមពលស្អាតប្រកបដោយមហិច្ឆិតាមួយ គឺការផលិតថាមពល៣៥ភាគរយរបស់ប្រទេសពីប្រភពដែលអាចផលិតឡើងវិញបាន នៅត្រឹមឆ្នាំ ២០៣០ និង៥០ភាគរយនៅត្រឹមឆ្នាំ២០៤០។ លោក Blinken បានប្រកាសថា៖ «សហរដ្ឋអាមេរិកសរសើរគោលដៅទាំងនេះ ហើយយើងប្តេជ្ញាជួយហ្វីលីពីនឱ្យសម្រេចបាននូវគោលដៅទាំងនេះ»។
លោក Blinken បានថ្លែងថា៖ «តាមរយៈជំនួយឥតសំណងពីទីភ្នាក់ងារពាណិជ្ជកម្ម និងអភិវឌ្ឍន៍របស់សហរដ្ឋអាមេរិក យើងនឹងដាក់ឱ្យមានមូលដ្ឋានគ្រឹះរួមគ្នាសម្រាប់គម្រោងប្រើប្រាស់ខ្យល់នៅក្នុងទឹកសមុទ្រដំបូងគេនៅក្នុងប្រទេសហ្វីលីពីន។ ដល់ពេលនោះ គម្រោងនោះនឹងផលិតថាមពលស្អាតដល់ទៅ៣.០០០ មេហ្គាវ៉ាត់រៀងរាល់ឆ្នាំ»។ ចំនួនថាមពលនេះគ្រប់គ្រាន់ដើម្បីផ្តល់ថាមពលប្រើប្រាស់ក្នុងផ្ទះជាងពីរលានខ្នង។
នេះគ្រាន់តែជាកិច្ចសហប្រតិបត្តិការថាមពលស្អាតថ្មីបំផុតរវាងសហរដ្ឋអាមេរិក និងហ្វីលីពីនតែប៉ុណ្ណោះ។ កាលពីពេលថ្មីៗនេះ សហរដ្ឋអាមេរិកបានគាំទ្រកម្មវិធីដេញថ្លៃប្រកួតប្រជែងដំបូងបង្អស់របស់ប្រទេសហ្វីលីពីនជាមួយក្រុមហ៊ុនផ្តល់ថាមពលដែលបានប្តេជ្ញាចិត្តក្នុងការផលិតថាមពលដែលផលិតឡើងវិញបាន ចំនួន២.០០០ មេហ្គាវ៉ាត់ទៀតនៅត្រឹមឆ្នាំ២០២៥។ កាលពីខែមីនា ប្រទេសហ្វីលីពីនបានចូលរួមក្នុងកម្មវិធីគំនិតផ្តួចផ្តើមតម្រូវការថាមពលស្អាត ដែលជាកម្មវិធីដែលដំណើរការដោយសហរដ្ឋអាមេរិកដែលភ្ជាប់ប្រទេសនានាដែលកំពុងស្វែងរកការផ្លាស់ប្តូរទៅប្រើប្រាស់ថាមពលស្អាតជាមួយក្រុមហ៊ុនដែលអាចជួយពួកគេឱ្យសម្រេចបាន។
កាលពីឆ្នាំមុន សហរដ្ឋអាមេរិក និងហ្វីលីពីនបានចាប់ផ្តើមគំនិតផ្តួចផ្តើមថាមពលដែលមានសុវត្ថិភាពនៅហ្វីលីពីន។ គំនិតផ្តួចផ្តើមនេះ គឺជាការប្រមូលការវិនិយោគក្នុងវិស័យឯកជន និងការបង្កើតថាមពលស្អាតបន្ថែមទៀតនៅទូទាំងប្រទេសហ្វីលីពីន។
ប្រទេសទាំងពីរកំពុងធ្វើការរួមគ្នាដើម្បីអភិវឌ្ឍវិស័យថាមពលនុយក្លេអ៊ែរនៅក្នុងប្រទេសហ្វីលីពីនតាមរយៈកិច្ចព្រមព្រៀងនាពេលថ្មីៗនេះ ដើម្បីជួយសម្រួលដល់កិច្ចសហប្រតិបត្តិការរវាងអ្នកជំនាញនុយក្លេអ៊ែររបស់សហរដ្ឋអាមេរិក និងហ្វីលីពីន។
ហើយក្នុងនាមជាសមាជិកស្ថាបនិកនៃក្របខ័ណ្ឌសេដ្ឋកិច្ចឥណ្ឌូប៉ាស៊ីហ្វិក ហ្វីលីពីនបានចូលរួមជាមួយប្រទេសចំនួន១៣ នៅទូទាំងតំបន់ដែលកំពុងប្តេជ្ញាចិត្តក្នុងការប្រើប្រាស់ថាមពលស្អាតនិងសេដ្ឋកិច្ចដែលមានភាពធន់ និងត្រឹមត្រូវជាងមុន។
លោក Blinken បានថ្លែងថា៖ «ការងារនេះមានសារៈសំខាន់ណាស់ ហើយយើងដឹងគុណដល់ដៃគូរបស់យើងនៅទូទាំងប្រទេសហ្វីលីពីន មានទាំងរដ្ឋាភិបាល វិស័យឯកជន និងសង្គមស៊ីវិលសម្រាប់ការយកចិត្តទុកដាក់របស់ពួកគេចំពោះអនាគតដែលមានថាមពលស្អាតរបស់ប្រទេសនេះ។ យើងរួមគ្នាកាត់បន្ថយការបញ្ចេញឧស្ម័នកាបូន ក្នុងខណៈពេលដែលយើងបង្កើតការងារ។ យើងកំពុងជំរុញឱ្យមានការច្នៃប្រឌិត។ យើងកំពុងផលិតថាមពលដែលមានតម្លៃសមរម្យ និងដែលអាចទុកចិត្តបានសម្រាប់គ្រួសារ និងសហគមន៍ទូទាំងប្រទេស»៕
