តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិកបានចាប់ផ្តើមការឆ្លើយតបរបស់ខ្លួនដល់ការសម្លាប់កាលពីចុងខែមករានូវទាហានអាមេរិកាំងបីនាក់នៅក្នុងប្រទេសហ្ស៊កដានីដោយពួកជីវពលគាំទ្រដោយអ៊ីរ៉ង់។ កងកម្លាំងអាមេរិកឋិតនៅក្នុងតំបន់នោះជាផ្នែកមួយនៃក្រុមចម្រុះសម្រាប់យកជ័យជំនះលើក្រុម ISIS។ កាលពីថ្ងៃទី ២ ខែកុម្ភៈ សហរដ្ឋអាមេរិកបានធ្វើការវាយប្រហារតាមអាកាសលើទីដៅ៨៥ នៅក្នុងប្រទេសអ៊ីរ៉ាក់និងស៊ីរីដែលកងឆ្មាំបដិវត្តន៍អ៊ិស្លាមនៃប្រទេសអ៊ីរ៉ង់និងក្រុមសាខាបានប្រើប្រាស់ដើម្បីវាយប្រហារលើកងកម្លាំងអាមេរិកាំង។
រដ្ឋមន្ត្រីការពារជាតិសហរដ្ឋអាមេរិកលោក Lloyd Austin បានបញ្ជាក់ក្នុងសេចក្តីថ្លែងការណ៍មួយថា៖ «នេះជាការចាប់ផ្តើមការឆ្លើយតបរបស់យើង។ លោកប្រធានាធិបតីបានណែនាំឱ្យមានសកម្មភាពបន្ថែមដើម្បីឱ្យកង IRGC និងកងជីវពលជាសាខានៃកងឆ្មាំនេះមានការទទួលខុសត្រូវដល់ការវាយប្រហាររបស់ពួកគេលើកងកម្លាំងសហរដ្ឋអាមេរិកនិងកងកម្លាំងចម្រុះ»។
នៅក្នុងសន្និសីទកាសែតមួយ អ្នកនាំពាក្យក្រសួងការពារជាតិអាមេរិកលោកឧត្តមសេនីយ៍ទោ Pat Ryder បានពណ៌នាកន្លែងដែលកងឆ្នាំ IRGC និងពួកជីវពលទាក់ទិននឹងកងឆ្នាំនេះបានប្រើហើយត្រូវបានយកធ្វើជាទីដៅនៃការវាយប្រហាររបស់សហរដ្ឋអាមេរិក។
លោក Ryder បាននិយាយថា៖ «ការផ្តោតរបស់យើងនៅទីនោះ គឺសមត្ថភាពវាយប្រហារដែលក្រុមទាំងនេះបានប្រើប្រាស់...គឺមជ្ឈមណ្ឌលបញ្ជាការនិងគ្រប់គ្រងមជ្ឈមណ្ឌលស៊ើបការសម្ងាត់ រ៉ុក្កែត មីស៊ីល យានយន្តអាកាសគ្មានមនុស្សជិះ កន្លែងទុកឥវ៉ាន់ និងមន្ទីរភ័ស្តុភារ និងកន្លែងផ្គត់ផ្គង់គ្រាប់រំសេវ»។
នៅក្នុងវិធានការការពារខ្លួនមួយដាច់ដោយឡែកប្រឆាំងនឹងក្រុមកូនអុកគាំទ្រដោយអ៊ីរ៉ង់ កាលពីថ្ងៃទី៣ ខែកុម្ភៈ សហរដ្ឋអាមេរិកនិងចក្រភពអង់គ្លេស ដោយមានការគាំទ្រពីក្រុមចម្រុះមួយនៃពួកសម្ព័ន្ធមិត្ត បានធ្វើការវាយប្រហារមួយចំនួនលើទីដៅហ៊ូធីនៅប្រទេសយេម៉ែន។ សកម្មភាពការពារខ្លួននេះ ជាលើកទីបីហើយដែលក្រុមចម្រុះបានវាយប្រហារលើទីដៅខាងក្នុងយេម៉ែន ជាការឆ្លើយតបនឹងការវាយប្រហារច្រើនខែមកហើយដោយពួកហ៊ូធីលើនាវាចរណ៍អន្តរជាតិនិងកប៉ាល់នៃកងទ័ពជើងទឹកអាមេរិកក្នុងសមុទ្រក្រហម និងឈូងសមុទ្រ Aden។
សហរដ្ឋអាមេរិកក៏បានធ្វើសកម្មភាពឯកតោភាគីក្នុងកិច្ចការពារខ្លួនឯងដើម្បីបំផ្លាញប្រដាប់បាញ់មីស៊ីលនិងកាណូតគ្មានមនុស្សជិះដែលក្រុមហ៊ូធីប្រុងប្រៀបសម្រាប់វាយប្រហារ។ លោកឧត្តមសេនីយ៍ទោ Ryder បានថ្លែងថា «ការផ្តោតនៅទីនេះ គឺបង្អាក់និងបន្ថយសមត្ថភាពនៃការធ្វើការវាយប្រហារទាំងនេះ»។
លោកឧត្តមសេនីយ៍ Ryder បានថ្លែងថា «យើងបន្តអំពាវនាវដល់ពួកគេឱ្យបញ្ឈប់ការវាយប្រហារជាបន្ទាន់ តែបើពួកគេមិនឈប់ទេ យើងនឹងបន្តធ្វើសកម្មភាពសមស្របដើម្បីមិនមែនគ្រាន់តែការពារនាវាចរណ៍អន្តរជាតិនិងក្រុមអ្នកដើរសមុទ្រឆ្លងកាត់សមុទ្រក្រហមប៉ុណ្ណោះទេ តែក៏បន្តបន្ថយនិងបង្អាក់សមត្ថភាពរបស់ពួកគេដែរ»។
លោកឧត្តមសេនិយទោ Ryder បានសង្កត់ធ្ងន់ថា សហរដ្ឋអាមេរិកមិនស្វះស្វែងបង្កើនជម្លោះនៅក្នុងតំបន់មជ្ឈិមបូព៌ាទេ។ លោកបានពោលថា សហរដ្ឋអាមេរិកបានអំពាវនាវជាថ្មីទៀតដល់អ៊ីរ៉ង់ឱ្យបញ្ឈប់គាំទ្រសកម្មភាពនាំឱ្យមានអស្ថិរភាពរបស់ក្រុមកូនអុករបស់ផងខ្លួន។ ហើយលោកបានព្រមានថា «យើងនឹងបន្តធ្វើសកម្មភាពសមស្របដើម្បីការពារកងកម្លាំងរបស់យើង»៕
