តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
អង្គការសហប្រជាជាតិបានឱ្យដឹងថា ពិភពលោកបច្ចុប្បន្នកំពុងប្រឈមនឹង «ជម្លោះហិង្សាដែលមានចំនួនច្រើនបំផុតរាប់ចាប់តាំងពីឆ្នាំ ១៩៤៥ មក»។ នៅទូទាំងពិភពលោក ប្រជាជនចំនួន ២ ពាន់លាននាក់កំពុងរស់នៅក្នុងតំបន់ដែលមានជម្លោះ ហើយមនុស្សចំនួន ៣៩៩ លាននាក់នៅក្នុងប្រទេសចំនួន ៦៩ ត្រូវការជំនួយមនុស្សធម៌។
លោក Samuel Vigersky ទីប្រឹក្សាជាន់ខ្ពស់ផ្នែកមនុស្សធម៌នៃស្ថានបេសកកម្មសហរដ្ឋអាមេរិកប្រចាំអង្គការសហប្រជាជាតិ បាននិយាយថា៖ «ពិភពលោកកំពុងប្រឈមនឹងវិបត្តិអសន្តិសុខស្បៀងអាហារដែលមិនធ្លាប់មានពីមុនមក»។
លោក Vigersky បានបញ្ជាក់ថា៖ «នៅគ្រប់ផ្នែកទាំងអស់ សហរដ្ឋអាមេរិកកំពុងបោះជំហានទៅមុខដើម្បីធ្វើរឿងត្រឹមត្រូវនិងឆ្លើយតបទៅនឹងបញ្ហាប្រឈមជាសកលនិងជាបន្ទាន់ទាំងនេះ។ យើងនៅតែជាប្រទេសផ្តល់ជំនួយមនុស្សធម៌ច្រើនជាងគេបំផុតតែមួយគត់ ដោយផ្តល់ជំនួយមនុស្សធម៌ចំនួន [ជាង] ១៧ ពាន់លានដុល្លារក្នុងឆ្នាំសារពើពន្ធ ២០២២»។
លោក Vigersky ថ្លែងដូច្នេះថា៖ «ដើម្បីឆ្លើយតបទៅនឹងវិបត្តិអសន្តិសុខស្បៀងអាហារជាសាកល យើងបានប្តេជ្ញាផ្តល់ជំនួយជិត ១១ ពាន់លានដុល្លារចាប់តាំងពីពេលដែលប្រទេសរុស្ស៊ីបានឈ្លានពានប្រទេសអ៊ុយក្រែនមក។ … យើងបន្តផ្តល់ជំនួយសម្រាប់ការឆ្លើយតបទៅនឹងគ្រោះរាំងស្ងួតនៅតំបន់ជ្រោយខាងកើតនៃទ្វីបអាហ្វ្រិក (Horn of Africa)។ យើងបានផ្តល់មូលនិធិទ្វេដងនៃការប្តេជ្ញារបស់យើងចំពោះតំបន់នោះដែលមានចំនួនរហូតដល់ជាង ២ ពាន់លានដុល្លារក្នុងឆ្នាំសារពើពន្ធ ២០២២។ កម្រិតខ្ពស់បំផុតនៃអសន្តិសុខស្បៀងអាហារកំពុងជំរុញឱ្យមានតម្រូវការផ្នែកមនុស្សធម៌នៅក្នុងប្រទេសអាហ្វហ្គានីស្ថាន ដែលនៅទីនោះសហរដ្ឋអាមេរិកមានមោទនភាពក្នុងការធ្វើជាអ្នកផ្តល់ជំនួយផ្នែកមនុស្សធម៌ដ៏ច្រើនបំផុតតែមួយគត់»។
លោក Vigersky បាននិយាយទៀតថា៖ «តម្រូវការមនុស្សធម៌នៅទូទាំងពិភពលោកជាង ៨០% គឺកើតឡើងដោយសារជម្លោះ។ ចម្លើយចំពោះបញ្ហានេះគឺថា [យើងមិនត្រូវការ] អំពើហិង្សាថែមទៀតនោះទេ។ យើងត្រូវការដំណោះស្រាយនយោបាយ»។
លោក Vigersky ថ្លែងដូច្នេះថា៖ «យើងចាំបាច់ត្រូវតែប្រឡូកឱ្យកាន់តែមានប្រសិទ្ធភាពក្នុងការចរចាផ្នែកការទូតក្នុងតំបន់និងលើសកលលោក ទាំងទ្វេភាគីនិងពហុភាគីនិងទាំងនៅក្នុងរដ្ឋធានីរបស់យើងនិងនៅអង្គការសហប្រជាជាតិ ដើម្បីប្រមូលផ្តុំភាគីនានានិងបញ្ចប់ជម្លោះទាំងនេះ»។
ទន្ទឹមនឹងនេះដែរ សហរដ្ឋអាមេរិកមានការស្រងាកចិត្តចំពោះការកើនឡើងនៃអំពើហិង្សាលើបុគ្គលិកមនុស្សធម៌ ក៏ដូចជាការបន្តរារាំងមិនឱ្យបានទទួលជំនួយមនុស្សធម៌ដែលធ្វើឡើងដោយភាគីជម្លោះ។
លោក Vigersky បាននិយាយថា៖ «យើងត្រូវតែការពារអ្នកដែលធ្វើការងារមនុស្សធម៌ដ៏លំបាក គ្រោះថ្នាក់ និងចាំបាច់ ជាពិសេសបុគ្គលិកដែលត្រូវបានជ្រើសរើសក្នុងតំបន់»។
លោក Vigersky បានលើកឡើងដូច្នេះថា៖ «នៅក្នុងប្រទេសអេត្យូពី … វត្តមានជាប់លាប់នៃកងកម្លាំងអេរីត្រេនិងឧបសគ្គដែលបង្កឡើងដោយការិយាធិបតេយ្យនៅតែរារាំងជំនួយមិនឱ្យធ្លាក់ទៅដល់ដៃរបស់ប្រជាជនដែលងាយរងគ្រោះដែលត្រូវការជំនួយ ដែលក្នុងនោះរួមមានទាំងអ្នករស់រានមានជីវិតពីអំពើហិង្សាយេនឌ័រផងដែរ ដែលអំពើហិង្សានេះកំពុងតែរីករាលដាលនៅទីនោះ។ នៅក្នុងប្រទេសយេម៉ែន ដំណោះស្រាយរយៈពេលយូរចំពោះវិបត្តិអសន្តិសុខស្បៀងអាហារគឺសន្តិភាពយូរអង្វែង។ យើងត្រូវធ្វើការបន្ថែមទៀតដើម្បីដាក់សម្ពាធទៅលើគ្រប់ភាគីនៃជម្លោះ ជាពិសេសក្រុមហ៊ូធី (Houthi ) ឱ្យគោរពតាមច្បាប់មនុស្សធម៌អន្តរជាតិ។ នៅក្នុងប្រទេសស៊ីរី ការវាយប្រហារដោយរបបលោក Assad បានសម្លាប់បុគ្គលិកមនុស្សធម៌ និងបំផ្លាញសម្ភារបរិក្ខាររបស់ពួកគេ។ របបលោក Assad បន្តរារាំងលំហូរនៃជំនួយមនុស្សធម៌ដល់ប្រជាជនដែលខ្វះខាតនៅទូទាំងប្រទេស»។
លោក Vigersky បានបញ្ជាក់បន្តថា៖ «យើងត្រូវលើកកម្ពស់ការទទួលខុសត្រូវនៅក្នុងជម្លោះទាំងអស់ឱ្យស្របតាមច្បាប់អន្តរជាតិ»។
លោកបានបន្ថែមថា៖ «យើងអាចនិងគួរតែធ្វើអ្វីៗគ្រប់យ៉ាងដែលយើងអាចធ្វើបានដើម្បីបំពេញតាមសេចក្តីប្រាថ្នាខ្ពស់បំផុតរបស់យើង»៕
បទវិចារណកថា៖ នៅពេលតម្រូវការកើនឡើង ការដឹកជញ្ជូនជំនួយមនុស្សធម៌ចាំបាច់ត្រូវមានការផ្លាស់ប្តូរ
