តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិក ដោយមានការសម្របសម្រួលជាមួយរដ្ឋាភិបាលនៃប្រទេសស្វីសនិងក្រុមអ្នកជំនាញសេដ្ឋកិច្ចអាហ្វហ្គានីស្ថាន បានប្រកាសការបង្កើតមូលនិធិមួយដើម្បីជាអត្ថប្រយោជន៍ដល់ប្រជាជនអាហ្វហ្គានីស្ថាន ឬហៅថា «មូលនិធិអាហ្វហ្គានីស្ថាន»។
សហរដ្ឋអាមេរិកនៅតែប្តេជ្ញាគាំទ្រប្រជាជននៃប្រទេសអាហ្វហ្គានីស្ថាន នៅពេលមានវិបត្តិសេដ្ឋកិច្ចនិងវិបត្តិមនុស្សធម៌ជាបន្ត។ ដោយធ្វើតាមបទបញ្ជានីតិប្រតិបត្តិលេខ១៤០៦៤ លោកប្រធានាធិបតី Joe Biden បានធ្វើឱ្យទឹកប្រាក់៣.៥០០លានដុល្លារនៃប្រាក់បម្រុងរបស់ធនាគារកណ្តាលអាហ្វហ្គានីស្ថានអាចត្រូវប្រើបានជាអត្ថប្រយោជន៍របស់ប្រជារាសស្ត្រអាហ្វហ្គានីស្ថាន នៅពេលរក្សាទឹកប្រាក់នេះមិនឱ្យធ្លាក់ក្នុងកណ្តាប់ដៃពួកតាលីបង់។ មូលនិធិអាហ្វហ្គានីស្ថាននឹងបែងចែកប្រាក់៣.៥០០លានដុល្លារនេះ ដើម្បីជួយផ្តល់ស្ថិរភាពជាងមុនដល់សេដ្ឋកិច្ចអាហ្វហ្គានីស្ថាន។
លោកស្រី Wendy Sherman អនុរដ្ឋមន្ត្រីការបរទេសសហរដ្ឋអាមេរិកបានមានប្រសាសន៍ថា៖«ប្រជាជនអាហ្វហ្គានីស្ថានប្រឈមនឹងវិបត្តិមនុស្សធម៌និងវិបត្តិសេដ្ឋកិច្ចបណ្តាលមកពីសង្គ្រាមច្រើនទសវត្សរ៍ ការរាំងស្ងួតធ្ងន់ធ្ងរ ជំងឺកូវីដ១៩និងអំពើពុករលួយរាលដាល»។ លោកស្រីបាននិយាយទៀតថា ជាមួយការបង្កើតមូលនិធិអាហ្វហ្គានីស្ថាន «សហរដ្ឋអាមេរិកនិងក្រុមដៃគូរបស់ខ្លួន ចាត់វិធានការសំខាន់និងជាក់ស្តែងមួយដើម្បីធ្វើឱ្យប្រាកដថាប្រភពធនធានថែមទៀតអាចមានសម្រាប់កាត់បន្ថយទុក្ខវេទនានិងកែលម្អស្ថិរភាពសេដ្ឋកិច្ចសម្រាប់ប្រជាជនអាហ្វហ្គានីស្ថាន ខណៈតម្រូវឱ្យពួកតាលីបង់ត្រូវតែមានការទទួលខុសត្រូវ»។
លោក Wally Adeyemo អនុរដ្ឋមន្ត្រីហិរញ្ញវត្ថុសហរដ្ឋអាមេរិកបានមានប្រសាសន៍ថា៖ «ការសង្កត់សង្កិនរបស់ពួកតាលីបង់និងការចាត់ចែងសេដ្ឋកិច្ចមិនល្អបានបង្កើនឧបសគ្គសេដ្ឋកិច្ចដែលមានយូរយាមកហើយ តាមរយៈសកម្មភាពដែលបន្ថយសមត្ថភាពនៃស្ថាប័នសេដ្ឋកិច្ចសំខាន់ៗរបស់អាហ្វហ្គានីស្ថាន ហើយបានធ្វើមិនអាចឱ្យមានការលំបាកក្នុងការបង្វែរមូលនិធិទាំងនេះមកប្រទេសអាហ្វហ្គានីស្ថានវិញ។ តាមរយៈមូលនិធិអាហ្វហ្គានីស្ថាននេះ សហរដ្ឋអាមេរិកនឹងធ្វើការជាមួយពួកដៃគូអន្តរជាតិរបស់យើងដើម្បីសម្រួលការប្រើធនធានទាំងនេះសម្រាប់កែលម្អជីវភាពរបស់ប្រជាជនសាមញ្ញក្នុងប្រទេសអាហ្វហ្គានីស្ថាន»។
លោកស្រីអនុរដ្ឋមន្ត្រី Sherman បានកត់សម្គាល់ថា៖ «សហរដ្ឋអាមេរិកជាប្រទេសផ្តល់ជំនួយមនុស្សធម៌ច្រើនជាងគេ។ យើងបានធ្វើការជាមួយធនាគារពិភពលោកនិងធនាគារអភិវឌ្ឍន៍អាស៊ី ដើម្បីឱ្យមានប្រាក់ជំនួយជាងមួយពាន់លានដុល្លារទៀតសម្រាប់សេវាមូលដ្ឋាននិងសេចក្តីត្រូវការបន្ទាន់ឯទៀតៗ បន្ថែមលើការផ្តល់ប្រាក់៨១៤លានដុល្លារនៃជំនួយមនុស្សធម៌អាមេរិកដោយផ្ទាល់ដល់ពួកដៃគូដើម្បីគាំទ្រប្រជាជនអាហ្វហ្គានីស្ថាន ខណៈបញ្ចៀសមូលនិធិនេះកុំឱ្យមានអត្ថប្រយោជន៍ដល់ពួកតាលីបង់។ នៅពេលនេះ មូលនិធិអាហ្វហ្គានីស្ថានជាផ្នែកមួយនៃការប្រឹងប្រែងខាងការទូតនិងខាងមនុស្សធម៌របស់យើងក្នុងនាមនៃប្រជាជន អាហ្វហ្គានីស្ថាន»៕
