តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
អភិបាលកិច្ចទូទៅក្នុងទ្វីបអាហ្វ្រិកមិនបានល្អប្រសើរជាងមុនទេតាំងពីឆ្នាំ២០១៩មក។ ភាគច្រើននៃទ្វីបនេះមានសុវត្ថិភាព សន្តិសុខ និងមានលទ្ធិប្រជាធិបតេយ្យក្នុងឆ្នាំ២០២១ តិចជាងឆ្នាំ២០១២ នេះបើតាមសន្ទស្សន៍ Ibrahim នៃអភិបាលកិច្ចនៅអាហ្វ្រិក ដែលចេញផ្សាយការវាយតម្លៃគុណភាពនៃអភិបាលកិច្ចក្នុងបណ្តាប្រទេសនាទ្វីបអាហ្វ្រិក រៀងរាល់ពីរឆ្នាំ។
កាលពីទសវត្សរ៍មុន មេដឹកនាំនៃប្រទេសអាហ្វ្រិកច្រើនជាងមុនបានរកឃើញវិធីនិងអនុវត្តវិធីទាំងនេះដើម្បីចៀសវាងការធ្វើតាមការកម្រិតអាណត្តិ។ តាំងពីឆ្នាំ២០១៥មក ប្រធានាធិបតីជាង១២នាក់បានធ្វើឱ្យខ្សោយ ចៀសវាង ឬបំបាត់ការកម្រិតអាណត្តិដែលត្រូវបានកំណត់ជាមធ្យោបាយមួយសម្រាប់បន្ថយអំណាចនៃសាខានីតិបត្តិបត្តិរបស់រដ្ឋាភិបាល។ នេះជាការផ្ទុយពីមតិសាធារណៈ។
ការរកឃើញថ្មីៗបំផុតនៃសន្ទស្សន៍ Afrobarometer បង្ហាញយើងថា «ពលរដ្ឋអាហ្វ្រិកភាគច្រើនគឺដល់ទៅ ៦៧ភាគរយចង់ឱ្យមានលទ្ធិប្រជាធិបតេយ្យជាងរដ្ឋាភិបាលប្រភេទផ្សេងទៀត ហើយមនុស្សភាគច្រើនក៏បានគាំទ្រដែលចំពោះបទដ្ឋាននិងស្ថាប័នប្រជាធិបតេយ្យដូចជាការមើលខុសត្រូវរបស់សភាលើប្រធានាធិបតីគឺមានការទ្រទ្រង់៦៥ភាគរយនិងមានការគាំទ្រឱ្យមានការកម្រិតអាណត្តិប្រធានាធិបតីចំនួន៧៣ភាគផងដែរ»។
នៅពេលអំណាចប្រមូលផ្តុំនៅថ្នាក់លើបំផុត មុខនាទីរបស់សង្គមស៊ីវិលត្រូវកាត់បន្ថយហើយពួកមេដឹកនាំទំនងជាឆ្លើយតបតែបន្តិចបន្តួចដល់ឆន្ទៈរបស់ប្រជារាស្ត្រ។ ពួកអ្នកមានអំណាចខាងការគ្រប់គ្រងរឹងទទឹងនិងគំនិតថ្មីៗហើយរក្សាទុកភាពនៅដូចដើមដដែល ដែលរារាំងមិនឱ្យមានការជឿនលឿននិងការអភិវឌ្ឍន៍។
ក្រុមមេដឹកនាំដែលយល់ថាពួកគេមិនត្រូវធ្វើតាមឆន្ទៈរបស់ប្រជារាស្ត្រ មិនយូរប៉ុន្មាននឹងស្រមើស្រម៉ៃថាច្បាប់មិនត្រូវអនុវត្តលើពួកគេទេ។ ពួកគេធ្វើការដើម្បីកាត់បន្ថយអំណាចរបស់សាខាឯទៀតៗនៃរដ្ឋាភិបាល។ ពួកគេបង្ក្រាបការប្រកួតប្រជែងនយោបាយនិងបំបិទការរិះគន់តាមរយៈការប្រើកម្លាំង។ ហើយពួកគេមានក្រុមជនដែលយល់ស្របជានិច្ចជាមួយគេនៅជុំវិញខ្លួនពួកគេ ហើយការណ៍ធ្វើដូច្នេះអាចកម្ចាត់លទ្ធភាពនៃការប្រែក្រឡះឬកែប្រែសេចក្តីសម្រេចមិនល្អ។ សឹងតែជាការចៀសមិនរួច ពួកគេនាំឱ្យមានអំពើពុករលួយ។
ប្រវត្តិសាស្ត្របង្ហាញថាក្នុងប្រទេសដែលគ្មានការកម្រិតអាណត្តិ និងគ្មានការផ្ទេរអំណាចជាទៀងទាត់និងប្រកបដោយការទទទួលខុសត្រូវ លទ្ធិប្រជាធិបតេយ្យនឹងរងគ្រោះ។ ហើយដោយសារលទ្ធិប្រជាធិបតេយ្យមានសារៈសំខាន់សម្រាប់ឱ្យមានសន្តិភាព សន្តិសុខនិងការអភិវឌ្ឍន៍មនុស្ស ប្រទេសបែបនេះនឹងនៅនឹងថ្កល់ទាំងខាងសេដ្ឋកិច្ចនិងទាំងខាងវប្បធម៌។
រឿងនេះអាចចៀសវាងបាន។ សន្ទស្សន៍ Ibrahim ក៏បង្ហាញដែរថា ទោះជាមានដំណើរការថយក្រោយក្នុងកន្លែងជាច្រើនក៏ដោយ ក៏ប្រជារាស្ត្រអាហ្វ្រិកជាងពាក់កណ្តាល គឺ៥៣ភាគរយ បច្ចុប្បន្ននេះរស់ក្នុងប្រទេសមួយដែលអភិបាលកិច្ចទូទៅល្អប្រសើរជាងមុនពីឆ្នាំ២០១២ដល់ឆ្នាំ២០២១។ ហើយទោះជាប្រទេសខ្លះប្រឹងប្រែងលប់ចោលឬកែប្រែការកម្រិតអាណត្តិក៏ដោយ ក៏មានប្រទេស២១បានពង្រឹងការកម្រិតអាណត្តិឬគ្រោងនឹងដាក់ឱ្យមានការកម្រិតនេះ។
សហរដ្ឋអាមេរិករួបរួមជាមួយបណ្តាប្រទេសដែលសម្លឹងទៅមុខវែងឆ្ងាយទាំងនេះ។ នៅទូទាំងប៉ែកខាងត្បូងនៃវាលខ្សាច់សាហារ៉ា សហរដ្ឋអាមេរិកប្តេជ្ញាឧបត្ថម្ភផ្ចុងផ្តើមបទដ្ឋានប្រជាធិបតេយ្យនិងការបោះឆ្នោតដែលឆ្លុះបញ្ចាំងឆន្ទៈរបស់ពលរដ្ឋ៕
