តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
កាលពីពេលថ្មីៗនេះ ឧត្តមស្នងការអង្គការសហប្រជាជាតិទទួលបន្ទុកកិច្ចការសិទ្ធិមនុស្សអ្នកស្រី Michelle Bachelet និងក្រុមរបស់អ្នកស្រីបានបំពេញទស្សនកិច្ចរយៈពេល ៦ ថ្ងៃទៅកាន់សាធារណរដ្ឋប្រជាមានិតចិន។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បាននិយាយថា សហរដ្ឋអាមេរិកនៅតែមានការខ្វាយខ្វល់យ៉ាងខ្លាំងទាក់ទិននឹងកិច្ចប្រឹងប្រែងរបស់សាធារណរដ្ឋប្រជាមានិតចិននៅក្នុងការរឹតត្បិតនិងត្រួតត្រាលើដំណើរទស្សនកិច្ចរបស់អ្នកស្រី Bachelet។
លោករដ្ឋមន្ត្រី Blinken បានប្រកាសដូច្នេះថា៖ «ទោះបីជាយើងនៅបន្តលើកឡើងដោយផ្ទាល់ជាមួយនឹងរដ្ឋាភិបាលចិនអំពីក្ដីបារម្ភរបស់យើងទាក់ទិននឹងការរំលោភសិទ្ធិមនុស្សរបស់រដ្ឋាភិបាលចិន និងគាំទ្រប្រទេសផ្សេងទៀតឱ្យលើកឡើងដូច្នេះក៏ដោយ ក៏យើងនៅតែមានក្ដីបារម្ភថា លក្ខខណ្ឌដែលអាជ្ញាធរចិនបានដាក់លើដំណើរទស្សនកិច្ច [របស់អ្នកស្រី Bachelet] មិនអាចឱ្យមានការវាយតម្លៃដោយពេញលេញនិងឯករាជ្យអំពីបរិយាកាសសិទ្ធិមនុស្សនៅក្នុងសាធារណរដ្ឋប្រជាមានិតចិនបានឡើយ ដែលក្នុងនោះរួមមានទាំងនៅក្នុងតំបន់ស៊ីនជាំង (Xinjiang) ផងដែរ ដែលនៅទីនោះ អំពើប្រល័យពូជសាសន៍និងឧក្រិដ្ឋកម្មប្រឆាំងនឹងមនុស្សជាតិនៅតែកើតឡើងជាបន្ត»។
លោករដ្ឋមន្ត្រី Blinken បានបញ្ជាក់ថា៖ «យើងក៏មានការខ្វាយខ្វល់ផងដែរអំពីសេចក្ដីរាយការណ៍ដែលថាពលរដ្ឋនៃតំបន់ស៊ីនជាំងត្រូវបានគេព្រមានមិនឱ្យត្អូញត្អែរ ឬក៏និយាយដោយបើកចំហអំពីស្ថានភាពនៅក្នុងតំបន់ស៊ីនជាំង និងអំពីសេចក្ដីរាយការណ៍ដែលថា មិនមានដំណឹងណាមួយអំពីទីតាំងរបស់ពលរដ្ឋអ៊ុយហ្គ័រ (Uyghur) រាប់រយនាក់ដែលបានបាត់ខ្លួន និងអំពីស្ថានភាពរបស់មនុស្សជាងមួយលាននាក់ដែលកំពុងជាប់ឃុំនោះឡើយ»។
លោក Blinken បានបន្ថែមថា៖ «អ្នកស្រីឧត្តមស្នងការ [Bachelet] មិនត្រូវបានគេអនុញ្ញាតឱ្យចូលទៅជួបបុគ្គលម្នាក់ៗដែលស្ថិតក្នុងផ្នែកមួយនៃកម្មវិធីផ្ទេរពលកម្មតំបន់ស៊ីនជាំងនិងដែលត្រូវបានបញ្ជូនទៅកាន់ខេត្តផ្សេងៗទៀតនៅទូទាំងប្រទេសចិននោះទេ»។
សហរដ្ឋអាមេរិកនៅតែមានការខ្វាយខ្វល់យ៉ាងខ្លាំងអំពីស្ថានភាពសិទ្ធិមនុស្សនៅក្នុងសាធារណរដ្ឋប្រជាមានិតចិន ជាពិសេសទាក់ទិននឹងសេចក្ដីរាយការណ៍ថ្មីដែលផ្ដល់ភស្តុតាងបន្ថែមទៀតអំពីការឃុំខ្លួនតាមទំនើងចិត្តក្នុងចំណោមមនុស្សជាងមួយលាននាក់ដែលជាប់ឃុំនៅក្នុងតំបន់ស៊ីនជាំង។
អ្នកនៅរស់រានមានជីវិតនិងក្រុមគ្រួសាររបស់អ្នកជាប់ឃុំបានពណ៌នាអំពីការប្រព្រឹត្តិដ៏ឃោរឃៅដែលមានភាពអយុត្តិធម៌យ៉ាងខ្លាំងដូចជា ការធ្វើទារុណកម្ម ការបង្ខំធ្វើឱ្យមិនអាចមានកូនបាន ពលកម្មដោយបង្ខំដែលគាំទ្រដោយរដ្ឋ អំពើហិង្សាផ្លូវភេទ និងការបំបែកកុមារដោយបង្ខំចេញពីឪពុកម្ដាយរបស់ពួកគេជាដើម។
លោករដ្ឋមន្ត្រី Blinken ក៏បានជំរុញផងដែរឱ្យ «សាធារណរដ្ឋប្រជាមានិតចិនគោរពសិទ្ធិរបស់ពលរដ្ឋទីបេ ពលរដ្ឋហុងកុង និងពលរដ្ឋដទៃទៀតទាំងអស់ដែលមានបំណងអនុវត្តសិទ្ធិនិងសេរីភាពជាមូលដ្ឋានរបស់ពួកគេដោយសន្តិវិធី ដូចមានចែងនៅក្នុងសេចក្ដីប្រកាសជាសាកលស្ដីពីសិទ្ធិមនុស្ស»។
ជាថ្មីម្ដងទៀត សហរដ្ឋអាមេរិកអំពាវនាវឱ្យសាធារណរដ្ឋប្រជាមានិតចិនបញ្ឈប់ជាបន្ទាន់នូវអំពើឃោរឃៅរបស់ខ្លួននៅក្នុងតំបន់ស៊ីនជាំង ដោះលែងអ្នកដែលជាប់ឃុំដោយអយុត្តិធម៌ ផ្ដល់មូលហេតុអំពីអ្នកដែលបានបាត់ខ្លួន និងផ្ដល់លទ្ធភាពឱ្យអ្នកស៊ើបអង្កេតឯករាជ្យបានចូលទៅដល់តំបន់ស៊ីនជាំង តំបន់ទីបេតិ៍ និងនៅទូទាំងប្រទេសចិន៕
