ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ກຳລັງຮັກສາຄວາມສະຫງົບຂອງມຽນມາໄດ້ຈູດເຜົາໝົດທັງບ້ານ ຮວມທັງໂບດ ແລະເຮືອນຊານອີກຫຼາຍຮ້ອຍຫຼັງ ຢູ່ໃນລັດຈິນ ທີ່ພວມມີການດີ້ນຮົນຕໍ່ສູ້. ສະຫະລັດ ມີຄວາມເປັນຫ່ວງຢ່າງຍິ່ງ ກ່ຽວກັບການລະເມີດສິດທິມະນຸດເຫລົ່ານີ້ການກໍ່ໂທດກຳ ແລະການສືບເພີ້ມທະວີໃນການປະຕິບັດງານຂອງກອງທັບມຽນມາ ແລະການກໍ່ຄວາມຮຸນແຮງຕໍ່ປະຊາຊົນ.
ໂຄສົກກະຊວງການຕ່າງປະເທດສະຫະລັດ ທ່ານເນດ ໄພຣສ໌ “ປະນາມການກໍ່ຄວາມໂຫດຮ້າຍ ໂດຍອຳນາດການປົກຄອງມຽນມາ ຕໍ່ປະຊາຊົນ ຕໍ່ເຮືອນຊານຂອງພວກເຂົາເຈົ້າ ແລະຕໍ່ສະຖານທີ່ປະຕິບັດງສາສະໜາກິດ ຊຶ່ງເປັນການບໍ່ໃຫ້ຄວາມເຄົາລົບຢ່າງເປີດແປນ ຂອງອຳນາດການປົກຄອງ ຕໍ່ຊີວິດ ແລະສະວັດດີພາບຂອງປະຊາຊົນຊາວມຽນມາ.”
ໂຄສົກກະຊວງການຕ່າງປະເທດ ທ່ານເນດ ໄພຣສ໌ ຮຽກຮ້ອງຕໍ່ປະຊາຄົມນາໆຊາດ “ຈົ່ງໃຫ້ລັດຖະບານທະຫານມຽນມາ ເປັນຜູ້ຮັບຜິດຊອບ ແລະເອົາມາດຕະການເພື່ອປ້ອງກັນບໍ່ໃຫ້ມີການຝ່າຝືນແລະລ່ວງລະເມີດສິດທິມະນຸດຢ່າງຮຸນແຮງຮວມທັງການປ້ອງກັນ ບໍ່ໃຫ້ມີການໂອນອາວຸດໄປໃຫ້ລັດຖະບານທະຫານ.”
ພວກທະຫານມຽນມາ ໄດ້ໂຄ່ນລົ້ມລັດຖະບານທີ່ຖືກເລືອກຂຶ້ນມາ ແບບປະຊາທິປະໄຕເມື່ອວັນທີ 1 ກຸມພາ ແລະໂຄ່ນລົ້ມ ພວກຜູ້ນຳຂອງລັດຖະບານດັ່ງກ່າວ ຊຶ່ງຫຼາຍໆຄົນ ໃນຈຳນວນນັ້ນ ຮວມທັງອະດີດທີ່ປຶກສາຂອງລັດຖະບານ ທ່ານ ນາງອອງຊານ ຊູຈີ ຍັງສືບຕໍ່ຖືກຄຸມຂັງ ມາຈົນຮອດທຸກມື້ນີ້. ນັບຕັ້ງແຕ່ນັ້ນມາ ອຳນາດການປົກຄອງກທະຫານໄດ້ເລີ້ມທຳການປາບປາມຢ່າງຮຸນແຮງຕໍ່ປະຊາຊົນ ໂດຍໄດ້ສັງຫານຫຼາຍກວ່າ 1,200 ຄົນແລະຈັບກຸມອີກ 9,000 ກວ່າຄົນ ຮວມທັງເຈົ້າໜ້າທີ່ລັດຖະບານ ພວກນັກເຄື່ອນໄຫວ ນັກຂ່າວ ແລະປະຊາຊົນທີ່ເປັນຄົນຕ່າງປະເທດ.
ກອງທັບຂອງມຽນມາ ໄດ້ເພີ້ມທະວີການບຸກໂຈມຕີຢູ່ໃນຫຼາຍໆເຂດຂອງປະເທດ ຊຶ່ງໄດ້ພາໃຫ້ມີປະຊາຊົນເປັນຈຳນວນຫຼວງຫຼາຍ ຕ້ອງໄດ້ຍົກຍ້າຍບ່ອນຢູ່ອາໄສແລະເກີດວິກິດການທາງດ້ານມະນຸດສະທຳຢ່າງຮ້າຍແຮງ ບວກໃສ່ກັບການລະບາດຂອງພະຍາດໂຄວິດ-19.
ທ່ານເນດ ໄພຣສ໌ ໄດ້ສະແດງຄວາມເປັນຫ່ວງຢ່າງເລິກເຊິ່ງ ກ່ຽວກັບ “ກຳລັງຮັກສາຄວາມສະຫງົບຂອງມຽນມາ” ໃນການປະຕິບັດງານທາງທະຫານຢ່າງຂຸ້ນຂ້ຽວ ຢູ່ໃນຫຼາຍໆເຂດຂອງປະເທດ ຮວມທັງລັດຈິນ ແລະເຂດຊາແກັງ.” ທ່ານໄດ້ຮຽກຮ້ອງ “ໃຫ້ອຳນາດການປົກຄອງ ຢຸດເຊົາການກໍ່ຄວາມຮຸນແຮງໃນທັນທີ ປ່ອຍພວກທີ່ຖືກຈັບກຸມຄຸມຂັງແບບບໍ່ເປັນທຳທັງໝົດແລະຟື້ນຟູເສັ້ນທາງໄປສູ່ປະຊາທິປະໄຕແບບທີ່ຮວມເອົາທຸກພັກຝ່າຍ.”
ໂຄສົກກະຊວງການຕ່າງປະເທດເນດ ໄພຣ໌ ກ່າວວ່າ ສະຫະລັດຈະສືບຕໍ່ຊຸກຍູ້ໃຫ້ມີການຮັບເອົາຄວາມຮັບຜິດຊອບ ໃນຄວາມຮຸນແຮງທີ່ໜ້າຢ້ານກົວ ທີ່ໄດ້ກໍ່ແລະຍັງມີຂຶ້ນຢູ່ຕໍ່ມາໂດຍອຳນາດການປົກຄອງ ຕໍ່ປະຊາຊົນຊາວມຽນມາ ແລະທ່ານກ່າວວ່າ “ພວກເຮົາຈະສືບຕໍ່ໃຫ້ການສະໜັບສະໜຸນແກ່ປະຊາຊົນຊາວມຽນມາແລະພວກທີ່ພວມເຮັດວຽກໄປສູ່ການຟື້ນຟູເສັ້ນທາງໄປສູ່ປະຊາທິປະໄຕແລະການແກ້ໄຂແບບສັນຕິວິທີ ຕໍ່ວິກິດການດັ່ງກ່າວ.”
