តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ក្នុងអំឡុងពេលពិភាក្សាកាលពីពេលថ្មីៗនេះនៅក្នុងរដ្ឋធានីវ៉ាស៊ីនតោន រដ្ឋមន្ត្រីការបរទេសសហរដ្ឋអាមេរិកលោក Antony Blinken បាននិយាយថា ពិភពលោកកំពុងស្ថិតនៅ «ចំណុចរបត់» មួយដែលការសម្រេចចិត្តនៅពេលបច្ចុប្បន្ននឹងជះឥទ្ធិពលដល់អនាគតប៉ុន្មានទសវត្សរ៍ខាងមុខ។
លោកបានកត់សម្គាល់ថា បន្ទាប់ពីពេលដែលមានសុវត្ថិភាពនិងវិបុលភាពនៅក្រោយសម័យសង្គ្រាមត្រជាក់ ឧបសគ្គចម្បងៗបានលេចឡើង។
លោករដ្ឋមន្ត្រី Blinken បានថ្លែងដូច្នេះថា៖ «ជាការពិត [ឧបសគ្គទាំងនោះមានដូចជា] ការលេចឡើងរបស់ប្រទេសចិនដែលមានទាំងឥទ្ធិពលនិងគោលបំណងនៅក្នុងការផ្លាស់ប្ដូរប្រព័ន្ធដែលយើងកំពុងរស់នៅ។ រុស្ស៊ីដែលមានគំនិតចងគំនុំដែលយើងកំពុងប្រឈមជាមួយជារៀងរាល់ថ្ងៃ និងបណ្ដុំបញ្ហាប្រឈមឆ្លងប្រទេសនិងបញ្ហាប្រឈមសាកលកាន់តែច្រើនឡើងដែលជាអកុសលមានការពាក់ព័ន្ធគ្នាទៅវិញទៅមក ដែលយើងត្រូវស្វែងរកវិធីដើម្បីដោះស្រាយប្រកបដោយប្រសិទ្ធភាព»។
បញ្ហាប្រឈមទាំងនោះរួមមានការរីកសាយភាយប្រព័ន្ធព័ត៌មានដែលជះផលវិបាកមិនរំពឹងទុកជាច្រើន ទេសន្តរប្រវេសន៍ អសន្តិសុខស្បៀងអាហារ ការប្រែប្រួលអាកាសធាតុ ការគំរាមកំហែងចំពោះសុខភាពនៅលើពិភពលោក ការធ្លាក់ចុះនៃលទ្ធិប្រជាធិបតេយ្យ និងការប្រជែងភូមិសាស្ត្រនយោបាយ។
លោករដ្ឋមន្ត្រី Blinken បានបញ្ជាក់ដូច្នេះថា៖ «យើងមានចក្ខុវិស័យមួយដែលច្បាស់លាស់និងពិតប្រាកដសម្រាប់ពិភពលោក ដែលនោះគឺ [ពិភពលោកមួយដែលមាន] សេរីភាព សុវត្ថិភាព ការបើកចំហ និងវិបុលភាព។ ...វាមានន័យថា ប្រទេសទូទៅមានសេរីភាពនៅក្នុងការសម្រេចមាគ៌ាផ្ទាល់ខ្លួន និងជ្រើសរើសដៃគូរបស់ខ្លួន។ វាមានន័យថា ប្រព័ន្ធអន្តរជាតិមួយដែលកសាងឡើងផ្អែកលើច្បាប់ តម្លាភាព ដែលត្រូវបានអនុវត្តដោយស្មើភាពនិងសមភាព ដោយទំនិញ ព័ត៌មាន និងមនុស្សមានលំហូរដោយស្របច្បាប់និងសេរី»។
ម្យ៉ាងវិញទៀត លោករដ្ឋមន្ត្រី Blinken បាននិយាយថា យើងប្រឈមនឹងប្រទេសដែលចង់លុបចោលបទដ្ឋាននិងស្ដង់ដារណាមួយដែលនាំឱ្យមានវិបុលភាពនៅក្នុងរយៈពេល ៧៥ ឆ្នាំចុងក្រោយនេះ ប្រទេសដែលចង់ទាមទារកំណត់ជាថ្មីនូវដែនឥទ្ធិពលនិងប្រើប្រាស់ការអនុវត្តបែបជញ្ជក់ឈាមដើម្បីកេងចំណេញអំណាចសេដ្ឋកិច្ច និងប្រទេសដែលប្រើប្រាស់ព័ត៌មានជាអាវុធ និងអះអាងថាសិទ្ធិមនុស្ស គឺជាបញ្ហាផ្ទៃក្នុងសុទ្ធសាធ។
ដើម្បីទប់ទល់នឹងទស្សនៈបែបនេះ ទីមួយ សហរដ្ឋអាមេរិកនឹងវិនិយោគលើភាពប្រកួតប្រជែងផ្ទាល់ខ្លួន។ ទីពីរ សហរដ្ឋអាមេរិកនឹងធ្វើការដើម្បីធ្វើឱ្យសម្ព័ន្ធភាពនិងភាពជាដៃគូរបស់ខ្លួនមានភាពរស់រវើកឡើងវិញ ដូចជាអង្គការអូតង់ (NATO) និងភាពជាដៃគូនានានៅតំបន់អាស៊ីបូព៌ាជាដើម។
លោករដ្ឋមន្ត្រី Blinken បានថ្លែងដូច្នេះថា៖ «ស្របពេលជាមួយគ្នានេះដែរ យើងក៏បានកសាងភាពជាដៃគូនានាដែលត្រូវនឹងគោលបំណង ដែលបណ្ដាប្រទេសផ្សេងៗ ហើយមិនត្រឹមតែប្រទេសប៉ុណ្ណោះទេ គឺថែមទាំងភាគីពាក់ព័ន្ធដទៃទៀត តួអង្គផ្សេងៗ វិស័យឯកជន និងក្រុមអង្គការក្រៅរដ្ឋាភិបាលផងដែរ ចូលរួមជាមួយគ្នាដើម្បីព្យាយាមដោះស្រាយបញ្ហាដាច់ដោយឡែកពីគ្នាទាំងនេះ»។
នៅពេលដែលគេសួរឱ្យរៀបរាប់ថា អ្វីទៅជា «លទ្ធិ Biden និយម» លោករដ្ឋមន្ត្រី Blinken ដែលប្រកាសប្រឆាំងនឹងលទ្ធិជាទូទៅ បាននិយាយថា៖ «វាចាប់ផ្ដើមពីភាពខ្លាំងក្លារបស់យើងនៅក្នុងប្រទេស ភាពប្រកួតប្រជែងរបស់យើង ពីការវិនិយោគដែលយើងកំពុងធ្វើ ហើយបន្ទាប់មក គឺការធ្វើឱ្យប្រាកដថា យើងនឹងពង្រឹង និងប្រសិនបើចាំបាច់ បង្កើតសម្ព័ន្ធភាព និងភាពជាដៃគូថ្មី ដោយសារតែយើងមិនអាចធ្វើវាដោយតែឯកឯងបានទេ»៕
បទវិចារណកថា៖ កិច្ចសហប្រតិបត្តិការគឺចាំបាច់សម្រាប់សណ្តាប់ធ្នាប់ពិភពលោកដែលសេរីនិងមានវិបុលភាព
