តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិកកំពុងពង្រីកទណ្ឌកម្មប្រឆាំងនឹងក្រុម Wagner Group ដែលជាអង្គការយោធាគាំទ្រដោយវិមានក្រឹមឡាំង ដឹកនាំដោយលោក Yevgeniy Prigozhin។ សមាជិកក្រុមនេះបានប្រព្រឹត្តអំពើឃោរឃៅ និងការរំលោភសិទ្ធិមនុស្សនៅក្នុងប្រទេសអ៊ុយក្រែន និងកន្លែងផ្សេងទៀតជុំវិញពិភពលោក។
ទណ្ឌកម្មរបស់សហរដ្ឋអាមេរិកផ្តោតទៅលើហេដ្ឋារចនាសម្ព័ន្ធសំខាន់ៗរបស់ក្រុម Wagner និងក្រុមហ៊ុនពាក់ព័ន្ធជួរមុខ ការទាក់ទងនឹងអាជីវកម្មមាស និងពេជ្រ ប្រតិបត្តិការនៅសមរភូមិក្នុងប្រទេសអ៊ុយក្រែន ក្រុមហ៊ុនផលិតអាវុធរបស់រុស្ស៊ី និងអ្នកគ្រប់គ្រងតំបន់កាន់កាប់ដោយរុស្ស៊ីលើកទឹកដីអ៊ុយក្រែន។
លោក Antony Blinken រដ្ឋមន្ត្រីការបរទេសស.រ.អ.បាននិយាយថា៖ «សកម្មភាពនេះគាំទ្រដល់គោលដៅរបស់យើងក្នុងការបន្ថយសមត្ថភាពរបស់រដ្ឋាភិបាលក្រុងមូស្គូធ្វើសង្គ្រាមប្រឆាំងនឹងអ៊ុយក្រែន បង្កើនការទទួលខុសត្រូវរបស់អ្នកដែលទទួលខុសត្រូវសង្គ្រាមឈ្លានពានរបស់រុស្ស៊ី និងការរំលោភបំពានដែលពាក់ព័ន្ធ និងបន្ថែមសម្ពាធលើវិស័យការពារជាតិរបស់រុស្ស៊ី»។
យោងតាមសេតវិមាន ក្រុម Wagner Group ត្រូវគេរាយការណ៍ថា បានពង្រាយបុគ្គលិកចំនួន ៥០.០០០ នាក់ នៅប្រទេសអ៊ុយក្រែន រួមទាំងបុគ្គលិកជាប់កិច្ចសន្យាចំនួន ១០.០០០ នាក់ និងអ្នកទោសចំនួន ៤០.០០០ នាក់ដែលត្រូវបានជ្រើសរើសពីពន្ធនាគាររបស់ប្រទេសរុស្ស៊ី។ ទណ្ឌកម្មដែលប្រកាសថ្មីៗរបស់ក្រសួងការបរទេសរួមបញ្ចូលហេដ្ឋារចនាសម្ព័ន្ធសំខាន់ៗជាច្រើនរបស់ ក្រុម Wagner រួមទាំងក្រុមហ៊ុនអាកាសចរណ៍ដែលប្រើប្រាស់ដោយក្រុម Wagner អង្គការឃោសនា Wagner និងក្រុមហ៊ុនឈានមុខរបស់ Wagner។
លើសពីនេះ ក្រសួងការបរទេសស.រ.អ.បានប្រកាសវិធានការដាក់កំហិតទិដ្ឋាការលើសមាជិកចំនួន ៥៣១ រូបនៃយោធាសហព័ន្ធរុស្ស៊ី ប្រឆាំងសកម្មភាពដែលគំរាមកំហែងដល់អធិបតេយ្យភាព បូរណភាពទឹកដី ឬឯករាជ្យភាពនយោបាយរបស់អ៊ុយក្រែន។
បច្ចុប្បន្ននេះ ក្រសួងហិរញ្ញវត្ថុស.រ.អ.បានកំណត់ថា ក្រុម Wagner Group ជាអ្នកទទួលខុសត្រូវចំពោះអំពើហិង្សាលើជនស៊ីវិលនៅសាធារណរដ្ឋអាហ្វ្រិកកណ្តាល ដែលនេះជាហេតុផលមួយដែរក្នុងចំណោមហេតុផលផ្សេងទៀត។
ជាលើកដំបូងហើយ ដែលសហរដ្ឋអាមេរិកបានកំណត់ថា ក្រុម Wagner ជាអង្គការឧក្រិដ្ឋកម្មឆ្លងដែនដ៏សំខាន់ ដោយបង្កើនការដាក់ទណ្ឌកម្មដែលមានស្រាប់លើក្រុមនេះ។ ក្រសួងហិរញ្ញវត្ថុបាននិយាយនៅក្នុងសេចក្តីថ្លែងការណ៍មួយថា «បុគ្គលិក Wagner បានចូលរួមនៅក្នុងសកម្មភាពឧក្រិដ្ឋកម្មធ្ងន់ធ្ងរ រួមទាំងការសម្លាប់រង្គាល ការរំលោភ ការចាប់ពង្រាត់កុមារ និងការរំលោភបំពានលើរាងកាយនៅក្នុងសាធារណរដ្ឋអាហ្វ្រិកកណ្តាល និងប្រទេសម៉ាលី»។
ការពង្រីកទណ្ឌកម្មរបស់សហរដ្ឋអាមេរិកប្រឆាំងនឹងក្រុម Wagner ជាការទទួលស្គាល់ថា ក្រុមនេះបានក្លាយជាក្រុមគំរាមកំហែងឆ្លងទ្វីបដែល រួមទាំងនៅអាហ្វ្រិក និងជ្រើសរើសសង្គ្រាមដ៏ឃោរឃៅរបស់រុស្ស៊ីនៅអ៊ុយក្រែន។ រដ្ឋមន្ត្រីការបរទេសស.រ.អ.លោក Blinken បាននិយាយថា «សហរដ្ឋអាមេរិកប្រកាន់ជំហរមិនងាករេក្នុងការប្រឆាំងនឹងការឈ្លានពានរបស់រុស្ស៊ី និងសកម្មភាពបង្កអស្ថិរភាពផ្សេងទៀតនៅទូទាំងពិភពលោក»៕
