តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ប្រជាជនអាហ្វហ្គានីស្ថានប្រឈមនឹងវិបត្តិមនុស្សធម៌និងសេដ្ឋកិច្ចដែលកើតឡើងដោយសារជម្លោះជាច្រើនទសវត្សរ៍ គ្រោះរាំងស្ងួតធ្ងន់ធ្ងរ ជំងឺកូវីដ១៩ និងអំពើពុករលួយរ៉ាំរ៉ៃ។ ការគាបសង្កត់និងការគ្រប់គ្រងសេដ្ឋកិច្ចមិនត្រឹមត្រូវរបស់ក្រុមតាលីបង់ (Taliban) បានធ្វើឱ្យបញ្ហាសេដ្ឋកិច្ចកាន់តែមានភាពធ្ងន់ធ្ងរជាយូរអង្វែង។
ជាក់ស្តែង បើយោងតាមកម្មវិធីអភិវឌ្ឍន៍សហប្រជាជាតិ (UNDP) ក្រុមតាលីបង់បានធ្វើឱ្យកំណើនសេដ្ឋកិច្ចរយៈពេល ១០ ឆ្នាំរបស់ប្រទេសអាហ្វហ្គានីស្ថានត្រឡប់ថយក្រោយក្នុងរយៈពេលត្រឹមតែ ១២ ខែប៉ុណ្ណោះ ហើយការរឹតបន្តឹងរបស់ពួកគេលើស្ត្រីអាចបណ្តាលឱ្យមានការខាតបង់ផ្នែកសេដ្ឋកិច្ចដល់ទៅ ១ ពាន់លានដុល្លារអាមេរិក។ នេះបើតាមការព្រមានរបស់ទីប្រឹក្សាអង្គការសហប្រជាជាតិលោក John Kelly។
គន្លឹះក្នុងការស្តារសេដ្ឋកិច្ចរបស់ប្រទេសអាហ្វហ្គានីស្ថានគឺត្រូវមានការចូលរួមពីសមាជិកទាំងអស់នៅក្នុងសង្គម រួមទាំងស្ត្រីនិងកុមារីផងដែរ។ ប៉ុន្តែទីប្រឹក្សាអង្គការសហប្រជាជាតិលោក Kelly បាននិយាយថា៖ «ដូចដែលយើងទាំងអស់គ្នាបានដឹងហើយថា ក្រុមតាលីបង់បានរឹតបន្តឹងយ៉ាងខ្លាំងចំពោះសិទ្ធិសេរីភាពនានាសម្រាប់ជនជាតិអាហ្វហ្គានីស្ថានទាំងអស់ ជាពិសេសសម្រាប់ស្ត្រីនិងកុមារី»។
កាលពីពេលថ្មីៗនេះ ក្រុមតាលីបង់បានចាត់វិធានការដើម្បីរារាំងស្ត្រីអាហ្វហ្គានីស្ថានមិនឱ្យទៅឧទ្យាន កន្លែងហាត់ប្រាណ និងកន្លែងងូតទឹកសាធារណៈ ដែលទាំងអស់នេះគឺជាផ្នែកនៃកិច្ចខិតខំប្រឹងប្រែងជាប្រព័ន្ធក្នុងការកំណត់ការចូលរួមរបស់ស្ត្រីនៅក្នុងសង្គមអាហ្វហ្គានីស្ថាន។
ការរឹតបន្តឹងបែបនេះនឹងធ្វើឱ្យស្ត្រីមួយជំនាន់ទៀតបាត់បង់នូវក្ដីរំពឹងរបស់ពួកគេបន្ថែមទៀតនៅក្នុងការផ្គត់ផ្គង់ដល់ក្រុមគ្រួសាររបស់ពួកគេនិងនៅក្នុងការរួមចំណែកដល់សហគមន៍របស់ខ្លួន។ បើគ្មានការចូលរួមយ៉ាងពេញលេញពីសំណាក់ស្ត្រីនៅក្នុងសេដ្ឋកិច្ចអាហ្វហ្គានីស្ថានទេ អាហ្វហ្គានីស្ថាននឹងមិនអាចងើបឡើងវិញទាំងស្រុងនោះឡើយ។ នៅពេលដែលស្ត្រីត្រូវបានកាត់ផ្ដាច់ចេញពីកម្លាំងពលកម្ម នោះមានន័យថាសង្គមបាត់បង់ទេពកោសល្យនិងផលិតភាពក្នុងចំនួនពាក់កណ្តាលនៃចំនួនប្រជាជនសរុបទាំងអស់របស់ប្រទេស។
ទីប្រឹក្សាអង្គការសហប្រជាជាតិលោក Kelly បានបញ្ជាក់ថា៖ «ប្រសិនបើស្ត្រីត្រូវបានផ្តល់ឱកាសឱ្យ នោះពួកគេអាចជាទីពឹងអាស្រ័យរបស់គ្រួសារដែលកំពុងប្រឈមនឹងភាពក្រីក្របាន។ ពួកគេអាចជួយបង្កើតសហគមន៍ដែលមានស្ថិរភាពនិងមានភាពធន់ជាងមុន នៅចំពេលដែលគេត្រូវការសហគមន៍ដូចនេះយ៉ាងខ្លាំងនៅក្នុងប្រទេសអាហ្វហ្គានីស្ថាន»។
កាលពីខែកញ្ញា រដ្ឋមន្ត្រីការបរទេសសហរដ្ឋអាមេរិកលោក Antony Blinken បានប្រកាសអំពីការចាប់ផ្តើមនៃសម្ពន្ធភាពសម្រាប់ភាពធន់នៃសេដ្ឋកិច្ចរបស់ស្ត្រីអាហ្វហ្គានីស្ថាន (Alliance for Afghan Women's Economic Resilience)។ សម្ពន្ធភាពនេះគឺជាភាពជាដៃគូរវាងសាធារណៈនិងឯកជនដែលមានគោលបំណងជំរុញឱ្យមានការចូលរួមនូវកម្លាំងពលកម្មរបស់ស្ត្រីអាហ្វហ្គានីស្ថាន ភាពជាសហគ្រិន និងការអប់រំ។ សហរដ្ឋអាមេរិកបានផ្តល់រង្វាន់ជាទឹកប្រាក់ចំនួន ១ លាន ៥ សែនដុល្លារដល់អង្គការមួយដែលនឹងគាំទ្រដល់ភាពជាសហគ្រិនរបស់ស្ត្រី។
កាលពីខែសីហា សហរដ្ឋអាមេរិកបានប្រកាសអំពីការប្តេជ្ញាចិត្តនៅក្នុងការចំណាយប្រាក់ចំនួន ៣០ លានដុល្លារដើម្បីគាំទ្រសមភាពយេនឌ័រនិងការពង្រឹងសិទ្ធិអំណាចរបស់ស្ត្រីនៅក្នុងប្រទេសអាហ្វហ្គានីស្ថាន។
ជាការពិត សហរដ្ឋអាមេរិកនៅតែវិនិយោគលើអនាគតរបស់ប្រជាជនអាហ្វហ្គានីស្ថាន។ សហរដ្ឋអាមេរិកនឹងបន្តធ្វើការជាមួយសហគមន៍អន្តរជាតិដើម្បីគាំទ្រប្រទេសអាហ្វហ្គានីស្ថានមួយដែលមានស្ថិរភាព វិបុលភាព និងពឹងផ្អែកលើខ្លួនឯងបាន និងដែលគោរពសិទ្ធិរបស់ប្រជាពលរដ្ឋទាំងអស់របស់ខ្លួន៕
បទវិចារណកថា៖ ស្ត្រីគឺជាគន្លឹះក្នុងការស្តារសេដ្ឋកិច្ចរបស់អាហ្វហ្គានីស្ថាន
