តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
កាលពីពេលថ្មីៗនេះ រដ្ឋមន្ត្រីការបរទេសសហរដ្ឋអាមេរិកលោក Antony Blinken បានធ្វើដំណើរទៅកាន់ប្រទេសអ៊ីស្រាអែលដើម្បីបំពេញការងារបន្ថែមលើកិច្ចព្រមព្រៀងឈប់បាញ់គ្នាក្នុងតំបន់ Gaza។
លោករដ្ឋមន្ត្រី Blinken បានមានប្រសាសន៍ថា «ការណ៍នេះ ចាប់ផ្តើមដោយការទទួលស្គាល់ថា ការខាតបង់ដល់ភាគីទាំងពីរមានច្រើន»។
«ជាញឹកញយចំនួនមនុស្សស្លាប់បានកាត់បន្ថយជាតួលេខ តែនៅពីក្រោយតួលេខទាំងនេះ គឺជាមនុស្សម្នាក់ ដែលជាកូនស្រីម្នាក់ កូនប្រុសម្នាក់ ឳពុកម្នាក់ ម្តាយម្នាក់ ជីតាម្នាក់ ជីដូនម្នាក់ មិត្តភ័ក្តិល្អបំផុតម្នាក់។ ខ្ញុំបានបញ្ជាក់ប្រាប់លោកនាយករដ្ឋមន្ត្រី អំពីអ្វីដែលលោកប្រធានាធិបតីបានមានប្រសាសន៍ច្បាស់លាស់នៅពេលមានអំពើហិង្សានោះគឺថា សហរដ្ឋអាមេរិកគាំទ្រពេញលេញដល់សិទ្ធិរបស់អ៊ីស្រាអែលក្នុងការការពារខ្លួនប្រឆាំងនឹងការវាយប្រហារដូចជារ៉ុក្កែតរាប់ពាន់គ្រាប់ត្រូវបាញ់ដោយពួក Hamas ប្រឆាំងនឹងជនស៊ីវិលអ៊ីស្រាអែលជាដើម»។
លោករដ្ឋមន្ត្រី Blinken និងអតីតនាយករដ្ឋមន្ត្រីអ៊ីស្រាអែលលោក Benjamin Netanyahu បានពិភាក្សាគ្នាអំពីសេចក្តីត្រូវការខាងសន្តិសុខរបស់អ៊ីស្រាអែលដោយមានរួមបញ្ចូលការបន្ថែមប្រព័ន្ធការពារដែនអាកាស Iron Dome សម្រាប់បាញ់ស្ទាក់រ៉ុក្កែត។ លោករដ្ឋមន្ត្រី Blinken បានបញ្ជាក់ថា «យើងនឹងបន្តពង្រឹងភាពដៃគូយូរយាមកហើយរបស់យើង ហើយនេះ មានរួមបញ្ចូលការពិគ្រោះយោបល់ជាមួយអ៊ីស្រាអែល...អំពីកិច្ចចរចាធ្វើឡើងនៅក្រុង Vienne អំពីការវិលត្រឡប់ទៅកាន់កិច្ចព្រមព្រៀងនុយក្លេអ៊ែរអ៊ីរ៉ង់វិញ ហើយនៅពេលជាមួយគ្នានោះ យើងបន្តធ្វើការជាមួយគ្នាដើម្បីទប់ទល់នឹងសកម្មភាពបង្កើតអស្ថិរភាពរបស់អ៊ីរ៉ង់ក្នុងតំបន់ផងដែរ»។
លោករដ្ឋមន្ត្រី Blinken បានពោលថា «យើងដឹងថា ដើម្បីបញ្ចៀសកុំឱ្យមានអំពើហិង្សាឡើងវិញ យើងត្រូវតែដោះស្រាយបញ្ហា និងឧបសគ្គជាមូលដ្ឋាន ហើយការណ៍នេះចាប់ផ្តើមដោយការដោះស្រាយស្ថានភាពមនុស្សធ៌មធ្ងន់ធ្ងរនៅក្នុងតំបន់ Gaza»។
«សហរដ្ឋអាមេរិក នឹងប្រមូលការគាំទ្រអន្តរជាតិដល់កិច្ចប្រឹងប្រែងនេះ ហើយផ្តល់វិភាគទានច្រើនក្រាស់ក្រែលរបស់យើងផងដែរ។ យើងនឹងធ្វើការជាមួយដៃគូរបស់យើងដើម្បីធ្វើឱ្យប្រាកដថា ពួក Hamas មិនបានទទួលអត្ថប្រយោជន៍ពីជំនួយសាងសង់ឡើងវិញនេះទេ»។
លោករដ្ឋមន្ត្រី Blinken បានមានប្រសាសន៍ថា «នៅពេលជាមួយគ្នានេះ យើងត្រូវពង្រីកឱកាសសម្រាប់ជនជាតិប៉ាឡេស្ទីនក្នុងតំបន់ Gaza និងក្នុងតំបន់ត្រើយខាងលិចនៃទន្លេ Jordan ដោយមានរួមបញ្ចូលការពង្រឹងវិស័យឯកជន ពង្រីកពាណិជ្ជកម្មនិងវិនិយោគ និងមធ្យោបាយឯទៀតៗផងដែរ»។
លោករដ្ឋមន្ត្រី Blinken បាននិយាយថា «យើងមានជំនឿថា ជនជាតិប៉ាឡេស្ទីន និងអ៊ីស្រាអែល គួរតែអាចរស់នៅដោយសុវត្ថិភាពនិងសន្តិសុខដូចគ្នា គួរមានសេរីភាព ឱកាសនិងលទ្ធិប្រជាធិបតេយ្យស្មើគ្នា និងប្រកបដោយភាពថ្លៃថ្នូរ»។
លោករដ្ឋមន្ត្រី Blinken បានមានប្រសាសន៍ថា «មានកិច្ចការលំបាកជាច្រើនដែលត្រូវធ្វើដើម្បីធ្វើឱ្យមានសេចក្តីសង្ឃឹម ការគោរពគ្នា និងការទុកចិត្តខ្លះៗក្នុងសហគមន៍ឡើងវិញ។ តែយើងបានឃើញហើយនូវរឿងរ៉ាវដែលបានកើតឡើង ហើយខ្ញុំយល់ថា ការណ៍នេះ គួរជម្រុញឱ្យយើងទាំងអស់គ្នាបង្កើនកិច្ចប្រឹងប្រែងរបស់យើងដើម្បីថែរក្សាសន្តិភាព និងកែលម្អជីវភាពរបស់ជនជាតិអ៊ីស្រាអែល និងប៉ាឡេស្ទីន»៕