តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
នៅក្នុងសក្ខីកម្មមួយចំពោះមុខសភាស.រ.អ.អំពីវិធីចាត់ចែងទំនាក់ទំនងរវាងស.រ.អ.និងប្រទេសចិនដោយប្រសិទ្ធភាព រដ្ឋមន្ត្រីការបរទេសស.រ.អ.លោក Antony Blinken បាននិយាយថា «យើងមកដល់ចំណុចសំខាន់មួយ»។
លោកបាននិយាយថា «ប្រទេសចិនតំណាងការប្រឈមផ្នែកភូមិសាស្ត្រនយោបាយធំបំផុតនៅពេលបច្ចុប្បន្ននេះ។ ចិនជាប្រទេសមួយដែលមានបំណងនិងសមត្ថភាពខ្លាំងឡើងៗក្នុងការប្រឆាំងនឹងទស្សនៈវិស័យយើងសម្រាប់សណ្តាប់ធ្នាប់អន្តរជាតិសេរី បើកចំហ មានសន្តិសុខ និងសំបូររុងរឿងមួយ»។
លោករដ្ឋមន្ត្រី Blinken បាននិយាយថា «សេរី និងបើកចំហ»មានន័យថា ប្រទេសទាំងអស់មានសេរីភាពក្នុងការជ្រើសរើសមាគ៌ានិងពួកដៃគូរបស់ខ្លួនផ្ទាល់ បញ្ហានានាត្រូវដោះស្រាយដោយចំហ មិនមែនដោយការបង្ខិតបង្ខំទេ បទបញ្ញត្តិត្រូវអនុវត្តដោយយុត្តិធម៌ ហើយទំនិញ គំនិត និងមនុស្សហូរតាមច្បាប់និងដោយសេរីនៅទូទាំងផ្ទៃដី សមុទ្រ អាកាសនិងក្នុងវិស័យ cyber។
សំណើថវិការបស់លោកប្រធានាធិបតី Biden សម្រាប់ឆ្នាំសារពើពន្ធ២០២៤ ផ្តល់ឱ្យក្រសួងការបរទេសនូវប្រភពធនធាននិងភាពរហ័សរហួនធ្វើឱ្យប្រាកដថា មានសណ្តាប់ធ្នាប់នេះតទៅទៀត។
សណ្តាប់ធ្នាប់នេះអនុញ្ញាតឱ្យស.រ.អ.ធ្វើការ«ជំរុញទៅមុខ»ក្នុងតំបន់ឥណ្ឌូ-ប៉ាស៊ីហ្វិក។ លោករដ្ឋមន្ត្រី Blinken បានមានប្រសាសន៍ថា ការណ៍នេះមានរួមការពង្រឹងកិច្ចការទូតរបស់យើងជាមួយបេសកកម្មថ្មីៗនិងការបង្កើនទីតាំងថ្មីៗដោយមានទាំងក្នុងវិស័យមានការប្រកួតប្រជែងខ្លាំងជាមួយរដ្ឋាភិបាលប៉េកាំងដូចជាបច្ចេកវិទ្យានិងសេដ្ឋកិច្ចជាដើម។
លោក Blinken បានថ្លែងថា «យើងមិនមែនទាមទារឱ្យប្រទេសដទៃជ្រើសរើស’រវាងយើងនិងប្រទេសចិនទេ-តែយើងមានបំណងស្នើជម្រើសមួយមានការទាក់ទាញចិត្តជាងមុន...ហេតុដូច្នេះហើយបានជាថវិកានេះមានរួមប្រាក់២ពាន់លានដុល្លារក្នុងវិនិយោគថ្មីៗក្នុងហេដ្ឋារចនាសម្ព័ន្ធមានគុណភាពខ្ពស់ មិនមែនជាគម្រោងការមានគុណភាពទាប គ្មានតម្លាភាព និងគិតតែពីបូមយកផលចំណេញដែលធ្វើឱ្យប្រទេសជាច្រើនជំពាក់បំណុលវាន់កនោះទេ»។
ថវិការបស់លោកប្រធានាធិបតីក៏អនុញ្ញាតឱ្យស.រ.អ.បណ្តាក់ទុន២ពាន់លានដុល្លារក្នុងវិនិយោគថ្មីៗសម្រាប់ជំរុញសេដ្ឋកិច្ចតំបន់ឥណ្ឌូ-ប៉ាស៊ីហ្វិក និងជួយឱ្យស.រ.អ.ប្រកួតប្រជែងនៅកន្លែងដែលសាធារណរដ្ឋប្រជាមានិតចិនមានឥទ្ធិពលខ្លាំង មានរួមសន្តិសុខក្នុងសមុទ្រ ថាមពលស្អាត បច្ចេកវិទ្យា digital និងការរករ៉ែសំខាន់ៗ។
បន្ថែមលើនេះ ថវិកានេះមានប្រាក់៧ពាន់លានដុល្លារដើម្បីពង្រីកការទាក់ទងខាងសេដ្ឋកិច្ចជាមួយបណ្តាប្រទេសនៃអង្គការរដ្ឋចូលរួមគ្នាដោយសេរី Freely Associated States គឺប្រជុំកោះ Marshall, Palau និងរដ្ឋសហព័ន្ធ Micronesia តាមរយៈកិច្ចព្រមព្រៀងអន្តរជាតិ Compacts of Free Association។
លោករដ្ឋមន្ត្រី Blinken បានមានប្រសាសន៍ថា «មូលនិធីសម្រាប់វិស័យទាំងអស់នេះនឹងធានារ៉ាប់រងថា យើងអាចដោះស្រាយការប្រឈមមុខរបស់យើង ហើយបង្ហាញអំពីការតាំងចិត្តរបស់យើងសម្រាប់រយៈពេលវែងឆ្ងាយលើបញ្ហាដែលសំខាន់ជាងគេ សម្រាប់បណ្តាប្រទេសសំខាន់ៗនៅក្នុងតំបន់ ដើម្បីឱ្យសហរដ្ឋអាមេរិកអាចនៅជាដៃគូតាមការជ្រើសរើសដោយសេរី»។
លោករដ្ឋមន្ត្រី Blinken បានមានប្រសាសន៍ថា «នៅក្នុងទសវត្សរ៍នេះ ការប្រឹងប្រែងនិងវិនិយោគរបស់យើងនឹងកំណត់ថា តើយើងមានជោគជ័យក្នុងការជំរុញទស្សនៈវិស័យវិជ្ជមានសម្រាប់ប្រព័ន្ធអន្តរជាតិឬទេ ឬថាតើសាធារណរដ្ឋប្រជាមានិតចិនអាចធ្វើឱ្យរេចរិល ឬយកអ្វីផ្សេងមកជំនួសបទបញ្ញត្តិនិងបទដ្ឋានសាកលដែលធានារ៉ាប់រងសន្តិភាព សន្តិសុខ និងស្ថិរភាពក្នុងពិភពលោក»៕
បទវិចារណកថា៖ ពង្រឹងភាពប្រកួតប្រជែងរបស់ស.រ.អ.ក្នុងពេលមានការប្រឈមជាមួយសាធារណរដ្ឋប្រជាមានិតចិន
រូបឯកសារ៖ ប្រធានាធិបតីសហរដ្ឋអាមេរិកលោក Joe Biden នៅពេលធ្វើទស្សនកិច្ចនៅរោងចក្រផលិត Semiconductor។