តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ហុងកុង ជាទីក្រុងមួយក្នុងចំណោមទីក្រុងខ្លះក្នុងទ្វីបអាស៊ីដែលធ្លាប់មានបណ្តាញព័ត៌មានសេរីបំផុតនោះ នៅពេលនេះ កំពុងត្រូវបានដកហូតសំឡេងកាសែតឯករាជ្យចុងក្រោយបំផុត។ កាលពីពេលថ្មីៗបំផុតនេះ បណ្តាញព័ត៌មាន Citizens News ដែលជាបណ្តាញសារព័ត៌មានអនឡាញតូចមួយនៅក្រុងហុងកុង ហើយដែលល្បីឈ្មោះដោយសារការរាយការណ៍ស៊ីជម្រៅអំពីតុលាការ និងនយោបាយក្នុងស្រុក បានបិទប្រតិបត្តិការកាលពីថ្ងៃទី៣ ខែមករា។ បណ្ណាធិការនាយករបស់ Citizens News បាននិយាយយោងដល់កំណើននៃការចាប់ខ្លួនអ្នកកាសែត និងបណ្ណាធិការឯករាជ្យនៅហុងកុង។
កាលពីថ្ងៃទី២៩ ធ្នូ២០២១ អាជ្ញាធរហុងកុង បានឆ្មក់ចូលឆែក និងចាប់បុគ្គលិកជាន់ខ្ពស់៧នាក់របស់បណ្តាញព័ត៌មាន Stands News បង្ខិតបង្ខំឱ្យបណ្តាញព័ត៌មានសេរី និងឯករាជ្យមួយទៀតនៃបណ្តាញព័ត៌មានសេរីនិងឯករាជ្យដែលនៅសេសសល់តែពីរបីនេះ បញ្ឈប់ប្រតិបត្តិការរបស់ខ្លួន។ ជនទាំង៧នាក់នេះ ត្រូវបានចាប់ខ្លួនដោយសារជាប់សង្ស័យថា បានរួមគំនិតប្រព្រឹត្តអំពើទុច្ចរិតក្នុងការបោះពុម្ពផ្សាយអត្ថបទបំបះបំបោរ។ នេះ បើតាមពួកប៉ូលិស។
កាលពីខែមិថុនា២០២១ កាសែត Apple Daily ដែលជាសារព័ត៌មានគាំទ្រលទ្ធិប្រជាធិបតេយ្យល្បីល្បាញបំផុតនៅហុងកុង បានត្រូវបង្ខំឱ្យបិទ ក្រោយពីប៉ូលិសបានឆ្មក់ចូលឆែកជាច្រើនដងក្នុងបន្ទប់ព័ត៌មាន ហើយបានចាប់ខ្លួននិពន្ធនាយកមួយចំនួននិងលោក Jimmy Lai ស្ថាបនិកកាសែតនេះ។ កាលពីពេលថ្មីៗនេះ លោក Lai រងបទចោទប្រកាន់ថ្មីមួយទៀតពីបទបំបះបំបោរទាក់ទិននឹងកាសែតនេះ ហើយអតីតបុគ្គលិក ៦នាក់ទៀត ក៏ត្រូវបានចោទប្រកាន់ពីបទដូចគ្នានេះដែរ។ លោក Lai ត្រូវបានកាត់ទោសឱ្យជាប់ពន្ធនាគារ ២០ខែ ពីបទគាំទ្រចលនាដើម្បីប្រជាធិបតេយ្យ។ នៅពេលនេះ លោកប្រឈមនឹងទោសជាប់ពន្ធនាគារមួយជីវិតជាមួយការចោទប្រកាន់ថែមទៀត។
ក្រុងហុងកុង បានវិលត្រឡប់ទៅឋិតនៅក្រោមការគ្រប់គ្រងរបស់សាធារណរដ្ឋប្រជាមានិតចិន កាលពីឆ្នាំ១៩៩៧ ជាមួយការសន្យាការពារសិទ្ធិបុគ្គល និងសេរីភាពព័ត៌មាន។ តែ រដ្ឋាភិបាលក្រុងប៉េកាំង បានកាត់បន្ថយសេរីភាពទាំងនេះ ចាប់តាំងពីបានដាក់ច្បាប់សន្តិសុខជាតិនៅទីក្រុងហុងកុងកាលពីឆ្នាំ២០២០។
នៅក្នុងសេចក្តីថ្លែងការណ៍ជាលាយលក្ខណ៍អក្សរមួយ រដ្ឋមន្ត្រីការបរទេសសហរដ្ឋអាមេរិកលោក Antony Blinken បានប្រកាសថា «វិស័យសារព័ត៌មាន មិនមែនជាការបះបោរទេ»។ លោកបានអំពាវនាវឱ្យសាធារណរដ្ឋប្រជាមានិតចិន និងអាជ្ញាធរហុងកុង «ឈប់យកបណ្តាញព័ត៌មានសេរី និងឯករាជ្យនៅក្រុងហុងកុងជាទីដៅវាយប្រហារ និងឱ្យដោះលែងជាបន្ទាន់ ក្រុមអ្នកកាសែតទាំងនោះ និងនាយកប្រតិបត្តិបណ្តាញព័ត៌មានដែលត្រូវបានចាប់ខ្លួន និងចោទប្រកាន់ទាំងអយុត្តិធម៌»។
លោករដ្ឋមន្ត្រី Blinken បានមានប្រសាសន៍ថា «សេរីភាពខាងការនិយាយស្តីបញ្ចេញមតិ ដោយមានរួមបញ្ចូលទាំងសេរីភាពបណ្តាញព័ត៌មានផងដែរ និងការទទួលព័ត៌មានផ្តល់ដោយបណ្តាញព័ត៌មានឯករាជ្យ មានសារៈសំខាន់សម្រាប់ភាពសម្បូររុងរឿង និងសន្តិសុខសង្គម។ សេរីភាពទាំងនេះ អាចឱ្យក្រុងហុងកុងរីកចម្រើនជាមជ្ឈមណ្ឌលហិរញ្ញវត្ថុសាកលសម្រាប់ហិរញ្ញវត្ថុពាណិជ្ជកម្មការសិក្សាអប់រំ និងវប្បធម៌។ ការបិទមាត់បណ្តាញព័ត៌មានឯករាជ្យនេះ សាធារណរដ្ឋប្រជាមានិតចិន និងអាជ្ញាធរក្នុងស្រុកធ្វើឱ្យអន្តរាយដល់កេរ្តិ៍ឈ្មោះ និងលទ្ធភាពរបស់ហុងកុង។ រដ្ឋាភិបាលដែលមានការទុកចិត្ត គឺរដ្ឋាភិបាលដែលមិនខ្លាចការណ៍ពិត ឱបក្រសោបសារព័ត៌មានសេរី»៕