តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
កាលពីថ្ងៃទី ២៣ ខែឧសភា អាជ្ញាធរនៃប្រទេសបេឡារុស បានជូនដំណឹងមិនត្រឹមត្រូវដល់យន្តហោះដឹកអ្នកដំណើរមួយគ្រឿងដែលហោះឆ្លងកាត់ដែនអាកាសប្រទេសបេឡារុសថា មានការគំរាមកំហែងដោយគ្រាប់បែក ដោយបានបញ្ចុះបញ្ចូលក្រុមអាកាសយានិកនៃយន្តហោះនេះ ឲ្យចុះចតនៅក្នុងរដ្ឋធានីមីនស្កិ៍។
យន្តហោះដឹកអ្នកដំណើរ Ryanair ដែលមានមូលដ្ឋាននៅប្រទេសអៀរឡង់នេះ ដឹកអ្នកដំណើរ ១២៦ នាក់ និងក្រុមអាកាសយានិក ៦ នាក់។ នៅពេលនោះ យន្តហោះនេះ កំពុងធ្វើដំណើរពីទីក្រុងអាថែន ប្រទេសក្រិក ទៅកាន់ទីក្រុងវីលនីញូស ប្រទេសលីទុយអានី។
មិនមានគ្រាប់បែកដូចការជូនដំណឹងរបស់អាជ្ញាធរបេឡារុសនោះទេ។ អ្វីដែលយើងដឹងគឺថា បន្ទាប់ពីយន្តហោះនោះបានចុះចត អាជ្ញាធរបេឡារុសបានចាប់ខ្លួនអ្នកកាសែតបេឡារុសលោក Raman Pratasevich និងអ្នកស្រី Sofiya Sapega ដែលជាដៃគូរបស់លោក។
ក្រុមប្រឹក្សានៃអង្គការអាកាសចរណ៍ស៊ីវិលអន្តរជាតិ (International Civil Aviation Organization) បានសម្រេចកាលពីថ្ងៃទី ២៧ ខែឧសភាថា នឹងធ្វើការស៊ើបអង្កេតលើការប្រើប្រាស់មិនត្រឹមត្រូវណាមួយនៃអាកាសចរណ៍ស៊ីវិល ដើម្បីធានានូវសុវត្ថិភាពនិងសន្តិសុខដល់ការហោះហើរអន្តរជាតិ។
លោក Pratasevich គឺជាអ្នករិះគន់ដ៏ល្បីឈ្មោះម្នាក់លើមេដឹកនាំផ្ដាច់ការនៃប្រទេសបេឡារុសលោក Alyaksandr Lukashenka។ លោករស់នៅនិរទេសខ្លួននៅប្រទេសលីទុយអានី។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បានបញ្ជាក់នៅក្នុងសេចក្ដីថ្លែងការណ៍ជាលាយលក្ខណ៍អក្សរមួយថា៖ «សហរដ្ឋអាមេរិកថ្កោលទោសខ្លាំងក្លាលើការចាប់បង្ខំយន្តហោះមួយគ្រឿងឲ្យបង្វែរទិសដៅហោះហើររបស់ខ្លួនរវាងប្រទេសពីរដែលជាសមាជិកសហភាពអឺរ៉ុប និងលើការចាប់ខ្លួនអ្នកកាសែតលោក Raman Pratasevich នៅក្នុងទីក្រុងមីនស្កិ៍»។
លោករដ្ឋមន្ត្រី Blinken បានបន្ថែមថា៖ «យើងទាមទារឲ្យមានការដោះលែងលោក [Pratasevich] ជាបន្ទាន់។ ទង្វើដ៏គម្រក់ដែលប្រព្រឹត្តិឡើងដោយរបបដឹកនាំរបស់លោក Lukashenka នេះ បានបង្កគ្រោះថ្នាក់ដល់អាយុជីវិតរបស់អ្នកដំណើរជាង ១២០ នាក់ ដែលក្នុងនោះមានទាំងពលរដ្ឋអាមេរិកាំងផងដែរ»។
លោក Pratasevich គឺជាអ្នកសរសេរប្លុកប្រឆាំង និងជាសកម្មជន។ លោក គឺជាសហស្ថាបនិកនៃបណ្ដាញទំនាក់ទំនង Telegram ឈ្មោះ Nexta និងជាអតីតបណ្ណាធិការនៃទីភ្នាក់ងារព័ត៌មាន Nexta Live នៃបណ្ដាញទំនាក់ទំនង Telegram។ ទីភ្នាក់ងារព័ត៌មាន Nexta Live នេះ អាចគេចផុតពីការបំបិទការផ្សាយព័ត៌មានដែលរដ្ឋាភិបាលបេឡារុសបានដាក់កំហិតដើម្បីរារាំងសេរីភាពនៃការបញ្ចេញមតិ។
កាលពីឆ្នាំមុន លោក Pratasevich បានរាយការណ៍ព័ត៌មានអំពីការបោះឆ្នោតប្រធានាធិបតីដែលមានបញ្ហានៅក្នុងប្រទេសបេឡារុស ក៏ដូចជាអំពីការតវ៉ាទ្រង់ទ្រាយធំប្រឆាំងនឹងជ័យជម្នះដែលនៅមានមន្ទិលសង្ស័យរបស់លោក Lukashenka នៅពេលបន្ទាប់មកផងដែរ។
សម្រាប់ការរាយការណ៍ព័ត៌មានរបស់លោក លោកត្រូវបានអាជ្ញាធរបេឡារុសចោទប្រកាន់ថាបានប្រព្រឹត្តិភេរវកម្មនិងញុះញង់ឲ្យមានកុបកម្ម។
លោករដ្ឋមន្ត្រី Blinken បាននិយាយថា៖ «ប្រព័ន្ធផ្សព្វផ្សាយឯករាជ្យគឺជាសសរស្ដម្ភដ៏សំខាន់មួយនៅក្នុងការគាំទ្រនីតិរដ្ឋ និងជាផ្នែកដ៏សំខាន់បំផុតមួយនៃសង្គមប្រជាធិបតេយ្យ»។
លោក Blinken បានបន្ថែមថា៖ «ជាថ្មីម្ដងទៀត សហរដ្ឋអាមេរិកថ្កោលទោសការយាយីជាបន្តនិងការចាប់ខ្លួនអ្នកកាសែតដាក់ឃុំដោយខុសច្បាប់ដែលធ្វើឡើងដោយរបបដឹកនាំរបស់លោក Lukashenka។ សហរដ្ឋអាមេរិកគាំទ្រប្រជាពលរដ្ឋបេឡារុសដែលមានក្ដីប្រាថ្នាចង់បានអនាគតមួយដែលមានលក្ខណៈសេរី ប្រជាធិបតេយ្យ និងរុងរឿង និងគាំទ្រការអំពាវនាវរបស់ពួកគេឲ្យរបបដឹកនាំរបស់លោក Kukashenka គោរពសិទ្ធិមនុស្សនិងសេរីភាពជាមូលដ្ឋាន»៕