តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
លោកប្រធានាធិបតី Joe Biden បានមានប្រសាសន៍នៅក្នុងសន្និសីទកាសែតរួមគ្នាជាមួយប្រធានាធិបតីកូរ៉េខាងត្បូងលោក Yoon Suk Yeol ថា សម្ព័ន្ធភាពរវាងសហរដ្ឋអាមេរិកនិង
សាធារណរដ្ឋកូរ៉េ គឺអំពីការកសាងអនាគតល្អប្រសើរជាងមុនសម្រាប់ប្រជារាស្ត្រទាំងអស់របស់យើង។
លោកប្រធានាធិបតី Biden បាននិយាយថា «គ្មានឧទាហរណ៍ណាល្អជាងទំនាក់ទំនងសេដ្ឋកិច្ចនិងភាពដៃគូរបស់យើងទេ ដែលនាំឱ្យមានអត្ថប្រយោជន៍ហួសនិស្ស័យដល់ប្រទេសជាតិទាំងពីររបស់យើង»។
លោក Biden បានមានប្រសាសន៍ថា «តាមរយៈក្របខណ្ឌសេដ្ឋកិច្ចឥណ្ឌូ-ប៉ាស៊ីហ្វិក យើងជំរុញការលូតលាស់សេដ្ឋកិច្ចផ្អែកលើស្តង់ដារខ្ពស់សម្រាប់កម្មករយើង សម្រាប់បរិដ្ឋាន និងសម្រាប់សហគមន៍នៅទូទាំងតំបន់។ យើងឈរជាមួយគ្នាប្រឆាំងនឹងឥទ្ធិពលសេដ្ឋកិច្ចដែលមានអានុភាពក្នុងវិធីបង្ខិតបង្ខំ។ ហើយតាំងពីពេលខ្ញុំចូលកាន់តំណែងមក ក្រុមហ៊ុនកូរ៉េបានបណ្តាក់ទុនជាងមួយរយពាន់លានដុល្លារក្នុងស.រ.អ. នាំឱ្យមានការជំរុញការបញ្ជូលរបៀបថ្មីៗ និងបង្កើនការងារថ្មីៗសម្រាប់កម្មករអាមេរិកាំងនិងកូរ៉េ»។
លោកប្រធានាធិបតី Biden បាននិយាយថា សន្ធិសញ្ញាការពារគ្នាទៅវិញទៅមករបស់យើងរឹងមាំ ហើយមានរួមការប្តេជ្ញារបស់យើងដល់ការរារាំងមិនឱ្យមានសង្គ្រាមនុយក្លេអ៊ែរផងដែរ។
លោក Biden បានថ្លែងថា «ការប្តេជ្ញាទាំងនេះមានសារៈសំខាន់ជាពិសេសក្នុងការប្រឈមនឹងការគំរាមកំហែងកើនឡើងដោយសាធារណរដ្ឋប្រជាធិបតេយ្យប្រជាមានិតកូរ៉េ DPRK និងការរំលោភឥតលាក់លៀមលើការដាក់ទណ្ឌកម្ម។ នៅពេលជាមួយគ្នានេះ យើងបន្តស្វះស្វែងរកការទម្លាយភាពទាល់ច្រកខាងការទូតដោយហ្មត់ចត់ជាមួយសាធារណរដ្ឋ DPRK កាត់បន្ថយការរីកសាយអាវុធនុយក្លេអ៊ែរ និងដោះស្រាយកង្វល់របស់យើងខាងមនុស្សធម៌ និងសិទ្ធិមនុស្សសម្រាប់ប្រជាជននៃសាធារណរដ្ឋ DPRK»។
សាធារណរដ្ឋកូរ៉េនិងស.រ.អ.កំពុងធ្វើការជាមួយគ្នា មានរួមតាមរយៈកិច្ចសហការត្រីភាគីជាមួយប្រទេសជប៉ុនផង ដើម្បីធ្វើឱ្យប្រាកដអំពីអនាគតនៃតំបន់ឥណ្ឌូ-ប៉ាស៊ីហ្វិកប្រកបដោយភាពសេរី បើកចំហ សំបូររុងរឿង និងមានសន្តិសុខ។ មេដឹកនាំពីរនាក់នេះក៏បានពិភាក្សាគ្នាដែរអំពីការប្តេជ្ញារបស់អស់លោកដល់សន្តិភាពនិងស្ថិរភាពក្នុងច្រកសមុទ្រតៃវ៉ាន់ ធ្វើឱ្យប្រាកដប្រជាអំពីសេរីភាពនាវាចរណ៍ក្នុងសមុទ្រចិនខាងត្បូង និងហួសពីទីនោះផងដែរ។
លោកប្រធានាធិបតី Biden បានអរគុណសាធារណរដ្ឋកូរ៉េដែលបានគាំទ្រខ្លាំងដល់អ៊ុយ ក្រែន។
លោកប្រធានាធិបតី Biden បានមានប្រសាសន៍ថា «ជម្រើសដែលយើងធ្វើនៅថ្ងៃនេះ នឹងកំណត់ទិសដៅរបស់ពិភពលោករបស់យើងនិងអនាគតនៃក្រុមកូនរបស់យើងក្នុងពេលច្រើនទសវត្សរ៍ខាងមុខ»។
លោកប្រធានាធិបតី Biden បានប្រកាសថា «តាំងពីការតាមដានវិបត្តិអាកាសធាតុនិងការពង្រឹងការប្រឹងប្រែងរបស់យើងដើម្បីប្រយុទ្ធនឹងវិបត្តិនេះ និងការពង្រឹងសុខភាពសាកល គ្មានប្រទេសពីរណាអាចទប់ទល់នឹងឧបសគ្គទាំងនេះបានល្អប្រសើរជាងសាធារណរដ្ឋកូរ៉េ និងស.រ.អ.ទេ»៕