តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ប្រធានបទចម្បងនៃកិច្ចប្រជុំរបស់បណ្ដារដ្ឋមន្ត្រីការបរទេសនៃក្រុមប្រទេស G-7 នៅក្នុងប្រទេសជប៉ុនកាលពីពេលថ្មីៗនេះ គឺវិធីដែលប្រទេសជាសមាជិកអាចរួមផ្សំកម្លាំងនយោបាយនិងសេដ្ឋកិច្ចរបស់ខ្លួន «ដើម្បីគាំទ្របណ្ដាប្រទេសនៅគ្រប់ទ្វីបទាំងអស់ឱ្យដោះស្រាយបាននូវបញ្ហាស្បៀងអាហារ ថាមពល អាកាសធាតុ ហេដ្ឋារចនាសម្ព័ន្ធ និងបច្ចេកវិទ្យារបស់ពួកគេ»។ នេះបើតាមការបញ្ជាក់របស់រដ្ឋមន្ត្រីការបរទេសសហរដ្ឋអាមេរិកលោក Antony Blinken។
លោក Blinken ថ្លែងដូច្នេះថា៖ «ករណីនេះមានន័យថា រៀបចំប្រព័ន្ធអន្តរជាតិមួយប្រកបដោយបរិយាបន្នជាងមុន ដែលក្នុងនោះរួមមានទាំងការកែទម្រង់អង្គការសហប្រជាជាតិ ការធ្វើឱ្យប្រព័ន្ធហិរញ្ញវត្ថុអន្តរជាតិមានការឆ្លើយតបជាងមុនចំពោះតម្រូវការពិតប្រាកដរបស់ប្រទេសនានា និងការស្វែងរកទម្រង់ថ្មីសម្រាប់ការប្រឹក្សាយោបល់ណាដែលស្វាគមន៍មតិផ្សេងៗ»។
លោកបានបន្ថែមថា៖ «វាមានន័យថា ផ្ដល់ឱ្យប្រទេសជាច្រើនបន្ថែមទៀតនូវវិធីប្រសើរជាងមុនដែលមានចីរភាពនិងសមធម៌ដើម្បីទទួលបានវិបុលភាព ហើយស្របពេលនោះដែរគោរពអធិបតេយ្យភាពរបស់ប្រទេសទាំងនោះ។ ចាប់ពីតំបន់អាស៊ីកណ្ដាលដល់បណ្ដាប្រទេសដីកោះប៉ាស៊ីហ្វិក រហូតដល់ទ្វីបអាហ្វ្រិក តំបន់អាមេរិកឡាទីន និងតំបន់មជ្ឈិមបូព៌ា គោលបំណងរបស់យើងគឺផ្ដល់ឱ្យមេដឹកនាំនិងពលរដ្ឋនានានូវជម្រើសប្រសើរជាងមុន ដែលនោះគឺការមិនមានការបង្ខំ មិនមានបំណុលដែលមិនអាចសងបាន និងមិនមានឥទ្ធិពលអាក្រក់»។
ក្រុមប្រទេស G-7 ក៏បានពិភាក្សាផងដែរអំពីបញ្ហាប្រឈមនានាចំពោះប្រព័ន្ធអន្តរជាតិដែលមានភាពសេរី បើកចំហ សុវត្ថិភាព និងវិបុលភាព ជាពិសេសគឺបញ្ហាសង្គ្រាមរបស់រុស្ស៊ីលើអ៊ុយក្រែន។
លោករដ្ឋមន្ត្រី Blinken បានកត់សម្គាល់ថា៖ «យើងបានប្ដេជ្ញាជាថ្មីចំពោះអ៊ុយក្រែន ដោយផ្ដល់នូវការគាំទ្រផ្នែកសន្តិសុខនិងសេដ្ឋកិច្ចដែលអ៊ុយក្រែនត្រូវការនៅពេលបច្ចុប្បន្នដើម្បីការពារអធិបតេយ្យភាពនិងប្រជាជនរបស់ខ្លួន និងសម្រាប់រយៈពេលវែងដើម្បីធានាថាអ៊ុយក្រែនមិនត្រឹមតែអាចរស់រានបន្តទៅមុខបានប៉ុណ្ណោះទេ ប៉ុន្តែថែមទាំងអាចរីកលូតលាស់បានទៀតផង និងដើម្បីធានាថា រុស្ស៊ីនឹងខ្លាចរអាមិនហ៊ានធ្វើការឈ្លានពានបន្ថែមទៀត»។
ទាក់ទិននឹងប្រទេសចិន ក្រុមប្រទេស G-7 «បានតាំងចិត្តនិងយល់ស្របគ្នាចំពោះសេចក្ដីត្រូវការនៅក្នុងការមានការពិភាក្សាគ្នាដោយស្មោះត្រង់ជាមួយនឹងរដ្ឋាភិបាលចិនអំពីការធ្វើពាណិជ្ជកម្មមិនយុត្តិធម៌ អំពីទង្វើរបស់ចិនដែលធ្វើឱ្យអន្តរាយដល់បទបញ្ញត្តិអន្តរជាតិដែលប្រទេសទាំងអស់ទទួលបានប្រយោជន៍ពីបទបញ្ញត្តិទាំងនេះ ហើយនឹងហានិភ័យ ប្រសិនបើចិនមិនធ្វើតាមការសន្យារបស់ខ្លួននិងចាប់ផ្ដើមផ្ដល់សព្វាវុធដល់រុស្ស៊ី»។ នេះបើតាមការព្រមានរបស់លោករដ្ឋមន្ត្រី Blinken។
លោកលើកឡើងដូច្នេះថា៖ «ជាការពិត ហើយរួបរួមគ្នានៅក្នុងការបញ្ជាក់ឱ្យបានច្បាស់ចំពោះរដ្ឋាភិបាលចិនអំពីការជំទាស់របស់យើងចំពោះការកែប្រែដោយឯកតោភាគីណាមួយលើស្ថានភាពបច្ចុប្បន្នជាមួយតៃវ៉ាន់»។
ការពិភាក្សារបស់ក្រុមប្រទេស G-7 ទាំងនេះក៏ផ្ដោតលើគ្រោះថ្នាក់នៃការរីកសាយភាពអាវុធនុយក្លេអ៊ែរផងដែរ។ លោករដ្ឋមន្ត្រី Blinken បានសម្ដែងការដឹងគុណចំពោះប្រទេសជប៉ុនដែលផ្ដល់អាទិភាពខ្ពស់លើការប្រឆាំងនឹងការគំរាមកំហែងនុយក្លេអ៊ែរ។
លោករដ្ឋមន្ត្រី Blinken ថ្លែងដូច្នេះថា៖ «ការគំរាមកំហែងទាំងនេះមានដូចជា ការបាញ់គ្រាប់ផ្លោងមីស៊ីលដ៏គ្រោះថ្នាក់របស់ប្រទេសកូរ៉េខាងជើង ការពង្រីកសកម្មភាពនុយក្លេអ៊ែររបស់ប្រទេសអ៊ីរ៉ង់ ដែលក្នុងនោះរួមមានទាំងប្រតិបត្តិការទំនើបនៃការបំបែកសារធាតុនិងការបង្កើនបរិមាណអ៊ុយរ៉ាញ៉ូមដែលមានគុណភាពខ្ពស់ដែលមិនមានការពន្យល់ ឬក៏គោលបំណងបែបស៊ីវិលដ៏គួរឱ្យទុកចិត្តផងដែរ ការផ្អាករបស់រុស្ស៊ីនៅក្នុងការចូលរួមនៅក្នុងសន្ធិសញ្ញា New START និងវោហារសាស្ត្រនុយក្លេអ៊ែរដែលគ្មានការទទួលខុសត្រូវរបស់រុស្ស៊ី និងការបង្កើនបរិមាណអាវុធនុយក្លេអ៊ែរមិនមានតម្លាភាពនិងឆាប់រហ័សរបស់ប្រទេសចិន»។
បណ្ដារដ្ឋមន្ត្រីការបរទេសនៃក្រុមប្រទេស G-7 បានតាំងចិត្តដើម្បីជំរុញឱ្យមានសង្គមបើកចំហ មានតម្លាភាព មានភាពធន់ និងប្រកបដោយចីរភាព ដែលគោរពសិទ្ធិមនុស្ស យុត្តិធម៌ និងសេចក្ដីថ្លៃថ្នូរ ហើយនឹងដោះស្រាយតម្រូវការរបស់ក្រុមមនុស្សដែលងាយរងគ្រោះជាងគេបំផុត៕