តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
រដ្ឋមន្ត្រីក្រសួងពាណិជ្ជកម្មស.រ.អ.លោកស្រី Gina Raimondo បានប្រកាសនៅក្នុងកិច្ចប្រជុំវេទិកានាយកប្រតិបត្តិស.រ.អ.- ឥណ្ឌានិងអង្គការក្របខណ្ឌសេដ្ឋកិច្ចឥណ្ឌូ-ប៉ាស៊ីហ្វិកសម្រាប់វិបុលភាព IPEF ថា «នេះជាឱកាសសុទិដ្ឋិនិយមមួយសម្រាប់ទំនាក់ទំនងរវាងស.រ.អ.និងប្រទេសឥណ្ឌា»។
លោកស្រីរដ្ឋមន្ត្រី Raimondo បាននិយាយថា៖ «ភាពជាដៃគូរបស់យើងជាមួយប្រទេសឥណ្ឌាជាទំនាក់ទំនងមួយក្នុងបណ្តាការទាក់ទងសំខាន់ៗបំផុតរបស់យើង ហើយខ្ញុំអាចនិយាយថា ជាទំនាក់ទំនងទ្វេភាគីប្រកបដោយក្តីសង្ឃឹមបំផុតមួយរបស់យើង។ ហេតុផលសម្រាប់ការណ៍នេះគឺថា...យើងមានគុណតម្លៃមួយចំនួនដូចគ្នាទាក់ទងនឹងលទ្ធិប្រជាធិបតេយ្យជាប្រពៃណីរបស់យើង ជាមួយនឹងការប្តេជ្ញាលើកកម្ពស់របៀបរៀបរយដោយសេរីនិងបើកចំហផ្អែកតាមច្បាប់ ដើម្បីពង្រឹងសន្តិសុខនិងធ្វើឱ្យមានការចម្រើនលូតលាស់»។
លោកស្រីរដ្ឋមន្ត្រី Raimondo បានថ្លែងថា មានឱកាសសម្រាប់ស.រ.អ.និងឥណ្ឌាពង្រីកទំនាក់ទំនងសេដ្ឋកិច្ច បង្កើតការងារក្នុងប្រទេសទាំងពីរ និងបង្កើតឱ្យមានចង្វាក់ផ្គត់ផ្គង់មួយមានភាពធន់និងមានសន្តិសុខជាងមុន។
លោកស្រីបានពោលថា៖ «កាលពីពីរបីសប្តាហ៍មុននេះ ក្រុមហ៊ុន Boeing និងក្រុមហ៊ុនអាកាសចរណ៍ Air India បានប្រកាសអំពីការបញ្ជាទិញយន្តហោះចំនួន ២២៨ គ្រឿងដែលជាកិច្ចព្រមព្រៀងជាប្រវត្តិសាស្ត្រមួយដែលឆ្លុះបញ្ចាំងឱ្យឃើញកម្លាំងនៃទំនាក់ទំនងសេដ្ឋកិច្ចរបស់យើង និងជួយបង្កើតការងារជាច្រើននៅក្នុងស.រ.អ.»។
លោកស្រីរដ្ឋមន្ត្រី Raimondo បានប្រកាសថា៖ «ឧបករណ៍អេឡិចត្រូនិក semiconductors ជាឧទាហរណ៍ធំមួយទៀតនៃអាទិភាពរួមរបស់យើង»។
លោកស្រីបាននិយាយថា៖ «ទាំងស.រ.អ.ទាំងប្រទេសឥណ្ឌាកំពុងអនុវត្តកម្មវិធីលើកទឹកចិត្តចំពោះការផលិតឧបករណ៍អេឡិចត្រូនិក semiconductors ហើយយើងពិភាក្សាគ្នាអំពីការធ្វើបែបណាដើម្បីឱ្យយើងអាចសម្របសម្រួលការវិនិយោគទាំងនោះដែលឋិតក្នុងអត្ថប្រយោជន៍របស់ប្រទេសយើងទាំងពីរនិងធ្វើឱ្យប្រាកដប្រជាថានាំឱ្យមានលទ្ធផលល្អសម្រាប់ប្រទេសយើងទាំងពីរ។ យើងចង់ឃើញឥណ្ឌាសម្រេចបានគោលបំណងនេះក្នុងការបំពេញមុខនាទីធំជាងមុនក្នុងចង្វាក់ផ្គត់ផ្គង់ឧបករណ៍អេឡិចត្រូនិក។ ហើយដើម្បីឱ្យសម្រេចគោលដៅនេះ អនុស្សារណៈនៃការយល់គ្នា MOU ដែលខ្ញុំចុះហត្ថលេខាក្នុងការធ្វើដំណើរលើកនេះទាក់ទិននឹងឧបករណ៍អេឡិចត្រូនិក semiconductors ត្រូវបានចាត់ចែងឡើងដើម្បីឱ្យបានសម្រេចគោលដៅនេះ»។
លោកស្រីរដ្ឋមន្ត្រី Raimondo បានកត់សម្គាល់ថា៖ «យើងក៏រីករាយក្នុងការធ្វើការជាមួយប្រទេសឥណ្ឌា ជាផ្នែកមួយនៃក្របខណ្ឌសេដ្ឋកិច្ចឥណ្ឌូ-ប៉ាស៊ីហ្វិក IPEF ផងដែរ»។
លោកស្រីបាននិយាយថា៖ «តាមរយៈក្របខណ្ឌ IPEF ស.រ.អ. ប្រទេសឥណ្ឌានិងដៃគូ១២ទៀតក្នុងតំបន់នេះ កំពុងអភិវឌ្ឍគោលនយោបាយដើម្បីបង្កើតចង្វាក់ផ្គត់ផ្គង់មានភាពធន់និងមានសន្តិសុខជាងមុន បង្កើនការជឿនលឿនអំពីអន្តរកាលរបស់យើងទៅកាន់ការការពារបរិដ្ឋាន និងបង្ហាញការប្តេជ្ញារបស់យើងសម្រាប់ជម្រុញកំណើនបរិយាកាសធុរកិច្ចល្អប្រសើរជាងមុន»។
តាមរយ:ទំនាក់ទំនងទ្វេភាគីនិងជាមួយដៃគូនានានៅទូទាំងតំបន់នេះ មានកិច្ចការធំៗច្រើនទៀតដែលស.រ.អ.និងប្រទេសឥណ្ឌាអាចធ្វើបានដើម្បីជាអត្ថប្រយោជន៍នៃសេដ្ឋកិច្ចទាំងពីរប្រទេសរបស់យើង។ ស.រ.អ. និយាយថា លោកស្រីរដ្ឋមន្ត្រី Raimondo នៅតែមានសុទិដ្ឋិនិយមខ្លាំងណាស់អំពីឱកាសជាច្រើនដើម្បីពង្រីកនិងពង្រឹងទំនាក់ទំនងរវាងស.រ.អ.និងឥណ្ឌាក្នុងពេលច្រើនឆ្នាំតទៅទៀត៕