តទៅនេះ គឺជាបទវិចារណកថាដែលឆ្លុះបញ្ចាំងឱ្យឃើញពីទស្សនៈរបស់រដ្ឋាភិបាលសហរដ្ឋអាមេរិក
នៅឯសន្និសីទកាសែតមួយក្នុងរដ្ឋធានីវ៉ាស៊ីនតោនជាមួយរដ្ឋមន្ត្រីការបរទេសឥណ្ឌាលោក Subrahmanyam Jaishankar រដ្ឋមន្ត្រីការបរទេសសហរដ្ឋអាមេរិកលោក Antony Blinken បានមានប្រសាសន៍ថា ភាពជាដៃគូរវាងសហរដ្ឋអាមេរិកនិងឥណ្ឌាជាកត្តាសំខាន់បំផុតមួយនៅក្នុងពិភពលោក»។ លោក Blinken បានថ្លែងថា៖
«ភាពជាដៃគូនេះមានសារៈសំខាន់ដើម្បីឆ្លើយតបគ្រប់បញ្ហាប្រឈមជាក់ស្តែងក្នុងសាកលលោកមិនថាតើវាជាបញ្ហាសន្តិសុខសុខភាព ការប្រែប្រួលអាកាសធាតុ សន្តិសុខម្ហូបអាហារ ការលើកស្ទួយសណ្តាប់ធ្នាប់អន្តរជាតិដោយសេរីនិងការបើកចំហរ។ នេះគ្រាន់តែជាឧទាហរណ៍តិចតួចតែប៉ុណ្ណោះ»។
ក្នុងប៉ុន្មានឆ្នាំថ្មីៗនេះ សហរដ្ឋអាមេរិកនិងឥណ្ឌាបានធ្វើឱ្យមានការជឿនលឿនជាដុំកំភួននៅក្នុងការលើកតម្កើងភាពជាដៃគូនេះតាមរយៈការបង្កើនការទាក់ទងទ្វេភាគីនិងការពិភាក្សាពហុភាគីនៅក្នុងក្រុមចតុភាគី ឬ Quad ប្រទេសមានឧស្សាហកម្មជឿនលឿន ឬ G-២០ និងអង្គការសហប្រជាជាតិ។
លោករដ្ឋមន្ត្រីការបរទេស Blinken បានថ្លែងថា ក្នុងអំឡុងនៃការថ្លែងសុន្ទរកថារបស់លោក Jaishankar រដ្ឋមន្ត្រីការបរទេសឥណ្ឌាទៅកាន់មហាសន្និបាតអង្គការសហប្រជាជាតិ លោក Jaishankar បានថ្លែងគាំទ្រធម្មនុញ្ញរបស់អង្គការសហប្រជាជាតិនិងគោលការណ៍នៃការបង្កើតធម្មនុញ្ញនោះ។ លោករដ្ឋមន្ត្រីការបរទេស Jaishankar ក៏បានផ្តោតលើបញ្ហាប្រឈមទាំងអស់ដែលសហរដ្ឋអាមេរិកបាននិយាយសង្កត់លើនៅឯអង្គការសហប្រជាជាតិដូចជា៖ វិបត្តិម្ហូបអាហារ ប្រេងឥន្ធនៈ និងជីជាដើម។ បញ្ហាទាំងអស់នេះបានកើនឡើងដោយសារសង្គ្រាមរបស់រុស្ស៊ីលើប្រទេសអ៊ុយក្រែន។ លោក Blinken បានថ្លែងទៀតថា៖
«យើងបានធ្វើការដើម្បីប្រមូលផ្តុំសម្ពន្ធមិត្តនិងដៃគូមិនត្រឹមតែជួយប្រជាពលរដ្ឋនៅទូទាំងពិភពលោកដែលរងផលប៉ះពាល់ភាគច្រើនដោយវិបត្តិទាំងនោះប៉ុណ្ណោះទេ ប៉ុន្តែយើងក៏ធ្វើឱ្យប្រាកដដែរថា យើងស្ថិតនៅជាផ្នែកមួយនៃដំណោះស្រាយដើម្បីបង្កើតមធ្យោបាយដ៏ស្ថិតស្ថេរមួយដើម្បីដោះស្រាយបញ្ហាប្រឈមទាំងនោះ»។
នៅក្រៅកិច្ចប្រជុំអង្គការសហប្រជាជាតិ បណ្តាប្រទេសក្នុងក្រុមចតុភាគី Quad បានជួបគ្នាដើម្បីបន្តការងារឆ្ពោះទៅរកទស្សន:រួមនៃតំបន់ឥណ្ឌូប៉ាស៊ីហ្វិកសេរីនិងបើកចំហ ដែលមានទំនាក់ទំនង មានសន្តិសុខ និងវិបុលភាព។ លោករដ្ឋមន្ត្រីការបរទេស Blinken បានមានប្រសាសន៍ទៀតថា៖ «យើងកំពុងបង្រួបបង្រួមកម្លាំងដើម្បីដោះស្រាយបញ្ហាដែលគ្មាននរណាម្នាក់អាចដោះស្រាយម្នាក់ឯងដោយមានប្រសិទ្ធភាពនោះទេ»។
ក្នុងអំឡុងនៃជំនួបរបស់ពួកអស់លោកក្នុងរដ្ឋធានីវ៉ាស៊ីនតោន លោករដ្ឋមន្ត្រីការបរទេស Blinken និងរដ្ឋមន្ត្រីការបរទេសឥណ្ឌាលោក Jaishankar ក៏បានស្វែងរកមធ្យោបាយដើម្បីបន្តការស្ថាបនាភាពជាដៃគូខាងសេដ្ឋកិច្ចរវាងសហរដ្ឋអាមេរិកនិងឥណ្ឌាដែរ។ សហរដ្ឋអាមេរិកជាដៃគូពាណិជ្ជកម្មដ៏ធំបង្អស់របស់ឥណ្ឌា ដោយមានទឹកប្រាក់១៥៧ ពាន់លានដុល្លារកាលពីឆ្នាំទៅនៅក្នុងពាណិជ្ជកម្មទ្វេភាគី ហើយសហរដ្ឋអាមេរិកជាប្រភពនៃការវិនិយោគទុនបរទេសដោយផ្ទាល់ដ៏ធំបង្អស់របស់ឥណ្ឌា។
លោករដ្ឋមន្ត្រីការបរទេស Blinken បានប្រកាសថា៖ «មិនមានប្រទេសដៃគូណាមានសមត្ថភាព ឱកាស និងការទទួលខុសត្រូវធំជាងនេះដើម្បីព្យាយាមបង្កើតអនាគតនៅក្នុងសតវត្សរ៍នេះទេ។ ហើយយើងកំពុងគិតជាមួយគ្នានិងធ្វើការជាមួយគ្នានៅក្នុងរបៀបនានាដែលយើងមិនបានគិត និងធ្វើកាលពីពេលមុន»៕
