តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
បញ្ហាមួយក្នុងបណ្តាបញ្ហានានានៃពិភពលោកមានការទាក់ទងគ្នាច្រើនជាងមុនគឺសមត្ថភាពរបស់មេរោគក្នុងការរាលដាលពាសពេញពិភពលោកតាមល្បឿននៃយន្តហោះដឹកអ្នកដំណើរ។ ថ្លែងនៅឯមជ្ឈមណ្ឌលអភិវឌ្ឍន៍សាកលក្នុងរដ្ឋធានីវ៉ាស៊ីនតោនកាលពីចុងខែមេសា អ្នកអភិបាលទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) លោកស្រី Samantha Power បាននិយាយថា «កត្តាប្រថុយប្រថានដែលជួយឱ្យមានជំងឺថ្មីៗលេចឡើងនិងរាលដាលឆាប់រហ័សជាងមុន មានច្រើនលើសដើម ហើយវានៅតែកើនច្រើនឡើងថែមទៀត»។
លោកស្រីបាននិយាយថា៖ «នៅពេលដែលមនុស្សបំផ្លាញព្រៃឈើដើម្បីចិញ្ចឹមខ្លួនឯង និងធ្វើផ្ទះជាលំនៅដ្ឋានសម្រាប់ប្រជារាស្ត្រដែលកើនច្រើនជាងមុន ហើយនៅពេលដែលសង្គ្រាមនិងមហន្តរាយធាតុអាកាសដូចជាភ្លើងឆេះព្រៃនិងការរាំងស្ងួតយូរបានរុញច្រានសត្វនិងមនុស្សចេញពីកន្លែងរស់នៅរបស់ពួកគេ សត្វព្រៃនិងមនុស្សនៅជិតគ្នាជាងមុន នាំឱ្យជំងឺឆ្លងពីសត្វទៅមនុស្សងាយស្រួលជាងមុន។ ហើយនៅក្នុងពិភពលោកមានភាពសាកលកើនឡើង ជំងឺទាំងនេះអាចរាលដាលលឿននៅទូទាំងសហគមន៍ ប្រទេស និងទ្វីប»។
ជាការពិត ការជួបប្រទះកាលពីពេលថ្មីៗនេះដោយការរាលដាលជំងឺឆ្លងផ្សេងៗ មានរួមការរាតត្បាតជំងឺកូវីដ១៩ ជំងឺអាសន្នរោគនៅក្នុងប្រទេសច្រើន និងការមានជំងឺ Ebola ក្នុងប្រទេសអ៊ូហ្គង់ដា បញ្ជាក់ច្បាស់ថា ការឆ្លើយតបនឹងភាពអាសន្នខាងសុខភាពសាកល មានសេចក្តីត្រូវការបន្ទាន់មួយឱ្យមានដំណើរការកិច្ចប្រតិបត្តិការជាស្តង់ដារនិងបែបប្រមូលផ្តុំ។
លោកស្រីអភិបាល Power បានថ្លែងថា ព្រោះហេតុនេះហើយបានជាទីភ្នាក់ងារ USAID បានបង្កើតប្រព័ន្ធគ្រប់គ្រងភាពអាសន្នខាងសុខភាពសាកល ដែលជាការផ្តើមគំនិតថ្មីមួយដែលនឹង«ជួយយើងឱ្យដោះស្រាយវិបត្តិជាច្រើនឱ្យបានឆាប់រហ័ស នៅពេលតែមួយ»។
លោកស្រីបានថ្លែងថា៖ «ប្រវត្តិយូរយាមកហើយរបស់ទីភ្នាក់ងារ USAID ក្នុងការចាត់ចែងការឆ្លើយតបឆាប់រហ័សនិងមានប្រសិទ្ធភាពដល់វិបត្តិមនុស្សធម៌បានបង្រៀនយើងថា ជោគជ័យក្នុងគ្រាមានអាសន្នពឹងពាក់លើការណ៍នេះ។ ការពឹងពាក់មានលើប្រព័ន្ធមួយដើម្បីឱ្យមានប្រាក់កាសច្រើនជាងមុននិងបុគ្គលិកនិងសម្របសម្រួលការឆ្លើយតបមួយនៅទូទាំងការិយាល័យពាក់ព័ន្ធនៃទីភ្នាក់ងារ USAID និងនៅទាំងរដ្ឋាភិបាលដ៏ធំរបស់យើង។ ការឆ្លើយតបថ្មីដល់គ្រាអាសន្នខាងសុខភាពសាកលនឹងជួយយើងក្នុងការធ្វើការនេះ»។
ប្រព័ន្ធគ្រប់គ្រងភាពអាសន្នខាងសុខភាពសាកលនឹងអាចឱ្យទីភ្នាក់ងារ USAID គាំទ្រក្រុមបុគ្គលិកនៅប្រទេសក្រៅដឹងច្បាស់បានរហ័សនូវប្រភពប្រាក់កាសខាងការថែទាំសុខភាព។ ប្រព័ន្ធនេះក៏នឹងអនុញ្ញាតឱ្យមានការបញ្ជូនពួកបុគ្គលិកឱ្យបានរហ័សទៅកាន់ប្រទេសមានបញ្ហាដើម្បីបង្កើនសមត្ថភាពក្នុងប្រទេសនិងតំបន់ និងដើម្បីសម្របសម្រួលការអនុវត្តសេចក្តីសម្រេចនៅទូទាំងទីភ្នាក់ងារ USAID។ ជាទីបញ្ចប់ ប្រព័ន្ធនេះនឹងជួយពង្រឹងការទាក់ទងជាមួយពួកដៃគូអន្តរទីភ្នាក់ងារ។
លោកស្រីអភិបាល Power បានពោលថា៖ «យើងត្រូវតែកសាងសមត្ថភាពពិភពលោកដើម្បីបញ្ចៀស ដឹងជាមុននិងឆ្លើយតបនឹងការរាលដាលជំងឺឆ្លងទាំងអស់-ទោះជាវាបណ្តាលមកពីប្រភេទកូវីដថ្មីៗ ការគំរាមកំហែងកំពុងមានឬជំងឺកំពុងលេចឡើងក៏ដោយ»។
លោកស្រី Power បានមានប្រសាសន៍ទៀតថា៖ «ការរាលដាលជំងឺជាគ្រោះថ្នាក់សន្តិសុខជាតិបន្ទាន់ ហើយរដ្ឋាភិបាលនៅទូទាំងពិភពលោកត្រូវតែដោះស្រាយបញ្ហាទាំងនេះតាមវិធីនេះ-គឺកសាងការការពាររួមគ្នារបស់យើងប្រឆាំងនឹងការគំរាមកំហែងខាងជីវសាស្ត្រទាំងនេះ»៕
បទវិចារណកថា៖ កសាងការការពារសាកលប្រឆាំងនឹងជំងឺឆ្លង
