តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ស.រ.អ.បានចាត់វិធានការដើម្បីដាក់ការរឹតត្បិតខាងទិដ្ឋាការលើបុគ្គល២៥នាក់ថែមទៀតក្នុងប្រទេសបេឡារុសដោយសារមុខនាទីរបស់ពួកគេក្នុងការធ្វើឱ្យអន្តរាយអន្តរកាលទៅកាន់លទ្ធិប្រជាធិបតេយ្យ។ ដោយបានបញ្ចូលជនទាំង២៥នាក់នេះ គឺក្រសួងការបរទេសស.រ.អ. បានដាក់កំហិតការរឹតត្បិតទិដ្ឋាការលើក្រុមបុគ្គលសរុបចំនួន៣២២នាក់ហើយ ដែលបានចូលដៃឃុបឃិតក្នុងការបោះឆ្នោតប្រធានាធិបតីមានការគៃបន្លំកាលពីឆ្នាំ២០២០និងការបង្ក្រាបយ៉ាងឃោរឃៅលើក្រុមប្រឆាំងដោយរបបគ្រប់គ្រង Lukashenko។
រដ្ឋមន្ត្រីការបរទេសស.រ.អ.លោក Antony Blinken បានកត់សម្គាល់ថា បុគ្គល២៥នាក់ដែលរងការរឹតត្បិតថ្មីៗបំផុតនេះ មានរួមពួកសមាជិកនៃរដ្ឋសភាជាតិនៃប្រទេសបេឡារុសផងដែរ។ នៅក្នុងសេចក្តីថ្លែងការណ៍មួយ លោកបានមានប្រសាសន៍ថា ពួកបុគ្គលទាំងនេះប្រឈមនឹងការរឹតត្បិតទិដ្ឋាការ «ដោយសារមុខនាទីរបស់ពួកគេក្នុងការអនុម័តសេចក្តីព្រាងច្បាប់អនុញ្ញាតឱ្យមានទោសប្រហារជីវិតសម្រាប់ពួកជនមានទោសពីការចោទប្រកាន់ «ក្នុងការប៉ុនប៉ងធ្វើសកម្មភាពភេរវកម្ម» ដែលជាការចោទប្រកាន់មួយត្រូវប្រើប្រាស់សម្រាប់បង្ក្រាប និងបំភិតបំភ័យក្រុមប្រជាធិបតេយ្យដែលជាក្រុមប្រឆាំង និងសង្គមស៊ីវិល»។
ក្រសួងការបរទេសស.រ.អ.បានប្រកាសអំពីសកម្មភាពថ្មីបំផុតរបស់ខ្លួននេះនៅពេលមានការបើកការកាត់ទោសដោយកំបាំងមុខលោកស្រី Svyatlana Tsikhanouskaya ប្រធានគណបក្សប្រឆាំង និងក្រុមសកម្មជនប្រជាធិបតេយ្យនាំមុខឯទៀតៗនៅក្នុងប្រទេសបេឡារុស។ អ្នកទាំងនេះត្រូវបានចោទប្រកាន់ពីបទឧក្រិដ្ឋកម្មសន្តិសុខជាតិ ដោយមានរួម«ភាពជ្រុលនិយម»នៅក្នុងអ្វីដែលលោករដ្ឋមន្ត្រី Blinken បានហៅថាជានីតិវិធីតុលាការដែល«មានលក្ខណៈនយោបាយ»។
លោកស្រី Tsikhanouskaya ដែលបានឈរឈ្មោះប្រឆាំងនឹងអ្នកកាន់អំណាចផ្តាច់ការយូរមកហើយ ឈ្មោះ Alyaksandr Lukashenko នៅក្នុងការបោះឆ្នោតប្រធានាធិបតីកាលពីឆ្នាំ២០២០ ហើយបានរត់គេចខ្លួនចេញពីប្រទេសនៅក្រោយការបង្ក្រាបមានការបង្ហូរឈាម បានពណ៌នាការកាត់ក្តីលោកស្រីថា ជា«ការគួរឱ្យហួសចិត្ត»។ លោកស្រីបាននិយាយថាលោកស្រីមិនអាចទទួលឯកសារតុលាការ ឬមានមេធាវីតែងតាំងដោយតុលាការទេនៅមុនដំណើរការកាត់ក្តីនេះ។
អាជ្ញាធរបេឡារុសកាត់ក្តីលោកស្រី Tsikhanouskaya ជាមួយពួកមេដឹកនាំលម្អៀងទៅខាងលទ្ធិប្រជាធិបតេយ្យឯទៀតៗមានរួមលោកស្រី Volha Kavalkova ប្រធាននៃក្រុមប្រឹក្សាសម្របសម្រួល ដែលជាអង្គការមួយមានភារកិច្ចសម្រួលអន្តរកាលប្រជាធិបតេយ្យនៃប្រទេសបេឡារុស។ លោករដ្ឋមន្ត្រី Blinken បានកត់សម្គាល់នៅក្នុងសេចក្តីថ្លែងការណ៍កាលពីពេលថ្មីៗនេះរបស់លោកថា នៅក្នុងការកាត់ក្តីមួយដាច់ដោយឡែកកាលពីខែធ្នូ របបគ្រប់គ្រងនេះបានកាត់ទោសអ្នកបង្កើតមូលនិធិសាមគ្គីភាពកីឡាបេឡារុស លោក Alex Apeikin និងកីឡាការិនីអូឡាំពិកបេឡារុសនាង Alyaksandra Herasimenia ឱ្យជាប់ឃុំឃាំងក្នុងពន្ធនាគារ១២ឆ្នាំ។
លោករដ្ឋមន្ត្រី Blinken បានមានប្រសាសន៍ថា «របបគ្រប់គ្រង Lukashenko ក៏បានបន្តឃុំឃាំងជាអ្នកទោសនយោបាយលោក Alex Bialiatski ជ័យលាភីរង្វាន់ណូបែលសន្តិភាព ដែលបានចំណាយពេលក្នុងជីវិតលោកការពារសិទ្ធិមនុស្ស និងជំរុញឱ្យមានការផ្លាស់ប្តូរបែបប្រជាធិបតេយ្យនៅក្នុងប្រទេសបេឡារុស»។
លោករដ្ឋមន្ត្រី Blinken បានប្រកាសថា ស.រ.អ.«នឹងបន្តប្រើគ្រប់មធ្យោបាយទាំងអស់ដើម្បីឱ្យក្រុមជននៅក្នុងប្រទេសបេឡារុស ដែលរារាំងសេចក្តីប្រាថ្នារបស់ក្រុមពលរដ្ឋរួមជាតិរបស់ពួកគេចង់បានលទ្ធិប្រជាធិបតេយ្យ ឲ្យមានការទទួលខុសត្រូវចំពោះសកម្មភាពរបស់ខ្លួន»៕
បទវិចារណកថា៖ ការខាតបង់ថែមទៀតដល់របបគ្រប់គ្រង Lukashenko ដោយសារការសង្កត់សង្កិនរបស់ខ្លួន
